އައްޑޫ ސިޓީގައި ގާމެންޓް ފެކްޓްރީއެއް އެޅުމަށްޓަކައި ބިޒްނަސް ސެންޓާ ކޯޕަރޭޝަން (ބީސީސީ) އަށް ދޫކުރި ބިން ދޫކޮށްލަން އެ ކޯޕަރޭޝަނުން ނިންމާފައި ވަނީ ސަރުކާރުގެ ބޮޑު މަޝްރޫއަކަށް އެ ބިން ބޭނުންވާތީ ކަމަށާއި، ނަމަވެސް ގާމަންޓް ފެކްޓްރީ ނާޅަން އެއްގޮތަކަށް ވެސް ނިންމައިފައިނުވާ ކަމަށް އެ ކޯޕަރޭޝަނުން ބުނެފިއެވެ.
ގާމަންޓް ފެކްޓްރީ އެޅުމަށް އައްޑޫ ސިޓީ ކައުންސިލުން ބީސީސީއަށް ބިން ދޫކޮށްފައި ވަނީ މި އަހަރުގެ ޖޫން ނުވައެއްގައެވެ. ނަމަވެސް އެ ބިން، ކޮންސްޓްރަކްޝަން މިނިސްޓްރީއަށް ދޫކޮށްލާ ކަމަށް ބުނެ ބީސީސީން ވަނީ އައްޑޫ ސިޓީ ކައުންސިލަށް ސިޓީއެއް މިދިޔަ ހަފުތާގައި ފޮނުވާފައެވެ.
އެހާ ފަސޭހައިން ބީސީސީން އެ ބިން ދޫކުރުމަށް ނިންމީތީ އައްޑޫގެ މޭޔަރު އަލީ ނިޒާރު ވަނީ ކަންބޮޑުވުން ފާޅުކުރައްވާފައެވެ. މޭޔަރު ވިދާޅުވީ އެ ޕްރޮޖެކްޓް ޑިޒައިން ކުރުމުގެ މަސައްކަތް ވެސް ހަވާލުކޮށް، ފަންޑު ވެސް ހަމަޖެހިފައިވާކަމަށެވެ.
މޭޔަރު ފާހަގަކުރެއްވީ ފެކްޓްރީގެ މަސައްކަތް ހުއްޓުމަކަށް އައިސްދާނެ ކަމުގެ ކަންބޮޑުވުމެވެ.
އެކަމާ ގުޅިގެން ބީސީސީން "ސަން" އަށް ބުނީ އެއްވެސް ހާލެއްގައި ފެކްޓްރީގެ މަސައްކަތް ހުއްޓާލާކަށް ނުވަތަ ފެކްޓްރީ ނާޅާކަށް އެ ކޯޕަރޭޝަނުން ވެސް އަދި ސަރުކާރުން ވެސް ނިންމާފައި ނުވާނެ ކަމަށެވެ.
އެހެންނަމަވެސް އެ ޕްރޮޖެކްޓް ހިންގުމަށްޓަކައި ސިޓީ ކައުންސިލުން ބީސީސީއާ ހަވާލުކުރި 30،000 އަކަފޫޓުގެ ބިން، ސަރުކާރަށް ދޫކޮށްލަން ނިންމީ ސަރުކާރުގެ މުހިންމު ބޮޑު ޕްރޮޖެކްޓެއް ހިންގުމަށްޓަކައި އެ ބިން ބޭނުންވާތީ ކަމަށް އެ ކޯޕަރޭޝަނުން ބުންޏެވެ.
ނަމަވެސް ސަރުކާރުން ހިންގާ ކޮންމެ މަޝްރޫއަކީ ވެސް ރައްޔިތުންނަށް ފައިދާވާނެ މަޝްރޫއެއްކަން ފާހަގަކުރައްވާ ބީސީސީން ބުނީ، އެ ބިން ދޫކޮށްލި ނަމަވެސް އިތުރު ބިމެއް ގާމަންޓް ފެކްޓްރީ އެޅުމަށް ޓަކައި ހޯދުމަށް ސިޓީ ކައުންސިލްގައި އެދިފައިވާނެ ކަމަށެވެ.
އެކަމާ ގުޅިހެން މޭޔަރު ވިދާޅުވީ ދޫކޮށްފައިވާ ބިން ސަރުކާރުގެ މަޝްރޫއަށް ދިނުމަށްފަހު އާ ބިމެއް ހޯދުމަށް ބީސީސީން ބުނި ނަމަވެސް، އެކަމުގެ އެއްވެސް މަޝްވަރާއެއް ވެސް އެ ކައުންސިލާއެކު ކޮށްފައިނުވާ ކަމަށެވެ.
ބީސީސީން އިތުރަށް ބުނީ ސިޓީ ކައުންސިލުން މިދިޔަ ޖޫން މަހު ދޫކުރި 30،000 އަކަފޫޓުގެ ބިމުގައި މަސައްކަތް ފެށުމަށް ޓަކައި ބިން އެއްކޮށް ހުސްކޮށްދިނުމަށް އެކި ފަހަރު މަތިން އެދުނު ނަމަވެސް މިހާތަނަށް އެކަން ކޮށްދީފައި ނެތް ކަމަށެވެ.
އައްޑުއަކީ މީގެ ކުރިން ވެސް ގާމަންޓް ފެކްޓްރީ ހިންގާފައިވާ ސިޓީއެކެވެ. ލަންކާގެ ކުންފުނިތަކަކުން ވަރަށް ފުޅާ ދާއިރާއެއްގައި ހިންގި ގާމަންޓް ފެކްޓްރީގެ ސަބަބުން އައްޑުއަށް ވަރަށް ގިނަ ފައިދާތަކެއް ވެސް ވިއެވެ.
ގިނަ ބަޔަކަށް ވަޒީފާގެ ފުރުސަތުތައް ވެސް ލިބުނެވެ. ނަމަވެސް އެ ފެކްޓްރީގެ މަސައްކަތް ވަކި ހިސާބަކުން ހުއްޓުނެވެ. ދެ ފަހަރަކު ފަށައި ފެކްޓްރީގެ މަސައްކަތް އެންމެ ފަހުން ހުއްޓާލާފައި ވަނީ 2005 ވަނަ އަހަރެވެ.
އެއަށްފަހު އައްޑޫގައި ގާމެންޓް ފެކްޓްރީއެއް ހަދަން ބީސީސީން އިއުލާންކުރީ 2020 ވަނަ އަހަރެވެ.
ގާމެންޓް ފެކްޓްރީ ހަދަނީ އައްޑޫ ހިތަދޫގެ ޕޯޓު އޭރިއާ ސަރަހައްދުގައެވެ. މިއީ ވޯލްޑް ބޭންކްގެ އެހީގައި ކުރިއަށް ގެންދަން ހަމަޖެހިފައިވާ މަޝްރޫއެކެވެ.