މޫސުން ގޯސްވުމުގެ ސަބަބުން ފުވައްމުލަކު ސިޓީއިން ފެށިގެން އައްޑޫ ސިޓީއާ ހަމައަށް ޔެލޯ އެލާޓް ނެރެފިއެވެ.
މޫސުމާ ބެހޭ ގައުމީ އިދާރާ، މެޓް އޮފީހުން މީގެ ކުރިން ވަނީ މި ހަފުތާ ބަންދުގައި ރާއްޖޭގެ ހުރިހާ ހިސާބަކަށް ވެސް މޫސުން ގޯސްވާނެ ކަމަށް ލަފާކުރެވޭތީ، ހުރިހާ ފަރާތްތަކުން ސަމާލުވުމަށް ވެސް އިލްތިމާސްކޮށްފައެވެ.
އެއާއެކު މެޓުން ވަނީ މިއަދު ހަވީރު 15:00 އިން ފެށިގެން މިރޭ 23:00 އާ ހަމައަށް، ފުވައްމުލަކުން އައްޑުއާ ހަމައަށް ޔެލޯ އެލާޓް ނެރެފައެވެ. އެ އޮފީހުން ބުނީ އެ ސަރަޙައްދަށް ގަޑިއަކު 25 މޭލާއި 30 މޭލާއި ދެމެދުގެ ބާރު މިނެއްގައި ވައި ޖެހި، ކަނޑުތައް ވެސް ގަދަވާނެ ކަމަށް ބުނެފައެވެ.
މިއީ ދެވަނަ ޓާމުގެ މިޑް ޓާމް ބްރޭކަށް ސްކޫލްތައް ބަންދު ދުވަސްވަރަކަށް ވެފައި، ކަނޑުމަގުންނާއި ވައިގެ މަގުން ވެސް ރާއްޖޭގެ އެކި ސަރަހައްދުތަކަށް ގިނަ ދަތުރުތަކެއް ކުރާ ދުވަސްވަރެކެވެ. އަދި ކުރިއަށް އޮތް ހަފުތާ ބަންދުގައި ގިނަ ބަޔަކު ދަތުރުކުރާނެ ކަމަށް ބެލެވެއެވެ.
އެހެން ކަމުން ދަތުރުކުރާއިރު ހުރިހާ ފަރާތްތަކުން ވެސް މޫސުމަށް ސަމާލުވުމަށް އެ އިދާރާއިން އެދެއެވެ.