ނިއުދިއްލީ (28 ނޮވެންބަރު 2024) : އިންޑިއާގެ އަދާނީ ގްރޫޕްގެ ވެރިޔާ ގޯތަމް އަދާނީ އާއި އެ ކުންފުނީގެ ބައެއް އިސްވެރިން އެމެރިކާގެ އިންވެސްޓަރުންނަށް އޮޅުވާލައިގެން ރިޝްވަތުގެ ސްކޭމެއް ހިންގިކަން ބޭޒާރުވެ ގޯތަމް އަދާނީ ހައްޔަރުކުރުމުގެ އަމުރެއް އެމެރިކާއިން ނެރެފައި ވީނަމަވެސް އޭނާ އިންޑިއާގައި ވަރަށް މިނިވަންކޮށް އުޅޭކަމަށާއި އޭނާގެ މައްޗަށް އިންޑިއާގެ އެއްވެސް އިދާރާއަކުން ތަހުގީގެއް ހިންގަމުން ނުދާކަމަށް އެ ގައުމުގެ އިދިކޮޅު ލީޑަރު ރާހޫލް ގާންދީ ވިދާޅުވެއްޖެއެވެ.
ނިއުދިއްލީގައި ބޭއްވި ނޫސް ކޮންފަރެންސެއްގައި ރާހޫލް ގާންދީ ވިދާޅުވީ އަދާނީއަށް ހިމާޔަތް ދެނީ ސީދާ އިންޑިއާގެ ބޮޑުވަޒީރު ނަރަންދުރަ މޯދީ ކަމަށެވެ. އަދާނީ އާއި އޭނާގެ ގްރޫޕުން ހިންގި ކޮރަޕްޝަނާއި ރިޝްވަތުގެ ސްކޭމްގައި މޯދީ ވެސް ބައިވެރިވެ ވަޑައިގަންނަވާ ކަމަށް ރާހޫލް ތުހުމަތު ކުރެއްވިއެވެ.
އެމެރިކާގެ ޑިޕާޓްމަންޓް އޮފް ޖަސްޓިސް ބުނާގޮތުން އަދާނީ އާއި އޭނާގެ ގްރޫޕް ގައި ހިމެނޭ އަށް މީހަކު ވަނީ އެމެރިކާގެ އިންވެސްޓަރުންނަށް އޮޅުވާލައިގެން ރިޝްވަތުގެ ސްކީމެއް ހިންގާފައެވެ. މި އަށް މީހުންގެ ތެރޭގައި އަދާނީގެ އާއިލާގެ މީހުން ވެސް ހިމެނެއެވެ.
މި ސްކޭމްގައި، މަޝްރޫއުތަކަށް ރުހުން ހޯދުމަށާއި އަދި ބައެއް ހަރަކާތްތައް ފޮރުވުމަށް އެމެރިކާގެ އިންވެސްޓަރުންނަށް ރިޝްވަތު ދިނުންވެސް ހިމެނޭކަމަށްވެއެވެ. އަދާނީ އާއި އޭނާގެ ގްރޫޕްގެ އަށް މީހަކު ހައްޔަރުކުރުމަށް އެމެރިކާގެ ޖަސްޓިސް ޑިޕާޓްމަންޓުން އަމުރު ނެރުނީ އެމެރިކާގެ ފޮރިން ކޮރަޕްޓް ޕްރެކްޓިސެސް އެކްޓްގެ ދަށުންނެވެ.
ރާހޫލް ގާންދީ
މި ގާނޫނުގައި އެމެރިކާގައި މަޝްރޫއުތައް ހިންގައި އެމެރިކާގެ ބާޒާރުން މާލީ ފައިދާ ނަގާ ބޭރުގެ ކުންފުނިތަކާ ދެކޮޅަށް ތަހުގީގު ހިންގުމުގެ ބާރު އެމެރިކާގެ ކަމާބެހޭ މުއައްސަސާތަކަށް ލިބިދެއެވެ. ނަމަވެސް ތުހުމަތު ކުރެވޭ ބޭރުގެ ފަރާތް އެހެން ގައުމެއްގައި އުޅޭނަމަ އެ މީހަކު ހައްޔަރު ކުރެވޭނީ އެ ގައުމަކުން އެމެރިކާއަށް އެއްބާރުލުން ދީފި ހާލަތެއްގައެވެ.
މުހައްލިލުން ވިދާޅުވާގޮތުގައި މިއީ ވިޔަފާރިއާ ގުޅޭ މައްސަލައެއް ނަމަވެސް މިކަމުގެ ސިޔާސީ ޑައިމެންޝަން ނުވަތަ ސިޔާސީ ނޭދެވޭ އަސަރު އިންޑިއާގެ ބޮޑުވަޒީރު މޯދީ އަށާއި އޭނާގެ ކަނާތު ފިޔައިގެ ހިންދޫ ގައުމީ ފިކުރުގެ ހަރުކަށި ޕާޓީ ކަމަށްވާ ބީޖޭޕީގެ ކުރިމަގަށް ކުރާނެއެވެ. އެމެރިކާއިން އަދާނީގެ މައްޗަށް ކުރާ މިތުހުމަތުތައް ބަރުލަމާނީ ކޮމިޓީއަކުން ބަލައި ތަހުގީގު ކުރުމަށް އިންޑިއާގެ މައި އިދިކޮޅު ޕާޓީކަމަށްވާ ކޮންގްރެސް ޕާޓީއާއި ވާތު ފިޔައިގެ ޕާޓީތަކުން އިއްޔެ ވަނީ ޕާލަމެންޓްގެ ރައީސްގެ ކިބައިން އެދިފައެވެ.
އިންޑިއާގެ ސިޔާސީ މުހައްލިލެއްކަމަށްވާ އަދަވާން ޑިޗްނިޔާ ބުނިގޮތުގައި ބޮޑުވަޒީރު މޯދީ އާއި އަދާނީގެ ގުޅުމަކީ ވަރަށް ޒަމާންވީ ވަރަށް ގާތްގުޅުމެކެވެ. މޯދީ 2011 ވަނަ އަހަރު އިންޑިއާގެ ބޮޑުވަޒީރު ކަމަށް ވަޑައިގަތުމުގެ ކުރިން އޭނާ ގުޖުރާތުގެ ޗީފް މިނިސްޓަރަކަށް ހުންނެވި ދުވަސްވަރުގައި ވެސް އަދާނީ އާއި މޯދީގެ ގުޅުންތައް ބޮޑެވެ.
ދެހާސް ސާދަ ވަނަ އަހަރުގެ އިންތިޚާބުގެ ކެމްޕެއިންގައި މޯދީ ބޭނުންކުރި ޝިއާރަކީ "ހިންދުތުވާ" ގެ ޝިއާރެވެ. މިއީ އިންޑިޔާގެ ބައިމަދު ދީންތަކާއި ދަރިކޮޅު ތަކުގެ މީހުން ނިކަމެތިކޮށް އިންޑިއާގައި ބައިގިނަ ހިންދޫންނަށް ހުރިހާ ފުރުސަތުތަކެއް ދީގެން އެ މީހުންގެ ގައުމީ ރޫހު ކައްކުވައިގެން އެ މީހުންގެ ވޯޓު ހޯދުމަށް މޯދީ ގެންގުޅުއްވި ހަރުކަށި ހިންދޫ ގައުމީ އައިޑިއޮލޮޖީ އެކެވެ. ނުވަތަ ފިކުރެކެވެ.
މޯދީގެ ވެރިކަމުގައި ނަޖާއިޒު ފައިދާ ނަގަމުން ގެންދިޔަ އިންޑިއާގެ ވިޔަފާރިވެރިން (އަދާނީ ވެސް ހިމެނޭގޮތަށް) މި އައިޑިއޮލޮޖީއަށް ތާއީދުކޮށް އެ މީހުންގެ ވިޔަފާރި ކުރިއެރުވުމަށްޓަކައި އޭރު މޯދީ ހިންގެވި "ހިންދުތުވާ" ކޭންޕޭނަށް އެތައް މިލިޔަން އިންޑިޔާ ރުޕީ އިންވެސްޓް ކުރި ކަމަށް ބުނެއެވެ. ނަތީޖާ އަކީ އެ ފަހަރުގެ އިންތިޚާބުގައި އާދަޔާ ޚިލާފު ކާމިޔާބީއެއް މޯދީގެ ބީޖޭޕީ ހޯދުމެވެ.
އިންޑިއާގެ މުހައްލިލު އަދަވާން ޑިޗްނިޔާ ބުނާގޮތުން އެ ފަހަރުގެ އިންތިޚާބުގެ ކޭންޕޭންގެ ދަތުރުތަކުގައި މޯދީ އާއި ބީޖޭޕީގެ އިސްވެރިން، ގޯތަމް އަދާނީގެ ޕްރައިވެޓް ޖެޓްތައްވެސް ވަރަށް ބޮޑަށް ބޭނުންކުރިއެވެ. އެއަށްފަހު މޯދީ ދުނިޔޭގެ ގައުމުތަކަށް ކުރި ދަތުރުތަކުގައި އަދާނީގެ ގްރޫޕަށް ބޮޑެތި ޕްރޮޖެޓްތައް ހޯދައިދިނުމުގެ މަސައްކަތްވެސް (އިންޑިއާގެ ސަރުކާރުގެ ނުފޫޒު ބޭނުންކޮށްގެން) ކުރެއްވިއެވެ. މިކަމުގެ ސަބަބުން ބޭރުގެ އެތައް ގައުމަކުން އަދާނީގެ ގްރޫޕަށް އެތައް ބިލިޔަން ޑޮލަރެއްގެ ޕްރޮޖެކްޓްތައް ލިބިގެންދިޔައެވެ.
އެމެރިކާ އަދާނީއަށް ކުރި ތުހުމަތުތަކަށްފަހު އެފްރިކާގެ ގައުމެއްކަމަށްވާ ކެންޔާއިން ވަނީ އެ ގައުމުގައި އައު އެއާޕޯޓެއް ބިނާކުރުމުގެ ޕްރޮޖެކްޓް އަދާނީ ގްރޫޕަށް ދޭން ތައްޔާރު ވެފައިވަނިކޮށް އެކަން ކެންސަލް ކޮށްފައެވެ. މިއީ ގާތްގަނޑަކަށް ދެ ބިލިޔަން ޑޮލަރުގެ މަޝްރޫއެކެވެ. މީގެ އިތުރުން ވެސް ކެންޔާއިން ވަނީ އަދާނީއަށް ދިނުމަށް ނިންނާފައިވާ ހަކަތައިގެ 736 މިލިޔަން ޑޮލަރުގެ އެހެން މަޝްރޫއެއް ވެސް އެ ކުންފުންޏަށް ނުދޭން ނިންމާފައެވެ.
އަދަވާން ޑިޗްނިޔާ ބުނިގޮތުގައި އަދާނީގެ ރިޝްވަތުގެ އަމަލުތަކުގެ ސަބަބުން ބައިނަލްއަގުވާމީ ފެންވަރުގައި ދުނިޔޭގެ އެކި ގައުމުތަކުގައި ބޮޑެތި މަޝްރޫއުތައް ހިންގާ އިންޑިއާގެ ކުންފުނިތަކުގެ ނަންވެސް ވަރަށް ބޮޑަށް ހުތުރުވެ އެ ކުންފުނިތަކުގެ އިތުބާރު ގެއްލިގެންދާނެއެވެ.
އަދާނީ ގްރޫޕުން ބުނާގޮތުން އެމެރިކާއިން ކުރި ތުހުމަތުތަކަށްފަހު އެ ކުންފުންޏަށް ވަނީ 55 ބިލިޔަން ޑޮލަރުގެ ގެއްލުމަކާ ކުރިމަތިލާން ޖެހިފައެވެ.