ސަރުކާރުން ހިންގަން އިއުލާން ކުރާ ބައެއް ޕްރޮޖެކްޓްތައް ހޯދުމަށް ފަހު އެޑްވާންސް ފައިސާ ނަގައިގެން އެ ޕްރޮޖެކްޓް ނުހިންގާ އަމިއްލަ ވިޔަފާރި ކުރާ ކުންފުނިތަކެއް އެބަ އުޅޭ ކަމަށް, އިންފްރާސްޓްރަކްޗަރު މިނިސްޓަރު، ޑރ. އަބްދުﷲ މުއްތަލިބު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް މިނިސްޓަރު މުއްތަލިބު ހާޒިރުކޮށް, މެންބަރުން ވަނީ ގިނަ ސުވާލުތަކެއް ކުރިމަތި ކުރުވާފައެވެ. އޭގެ ތެރޭގައި އެ ދާއިރާތަކުގައި ހިންގަން ފަށާފައިވާ ގިނަ ޕްރޮޖެކްޓްތަކެއް ލަސްވުމުގެ ކަންބޮޑުވުން މެންބަރުން ފާހަގަ ކުރެއްވިއެވެ.
ސުވާލުތަކަށް ޖަވާބު ދެއްވަމުން މިނިސްޓަރު ވިދާޅުވީ 2023ވަނަ އަހަރާއި އޭގެ ކުރިން ވެސް ދައުލަތުން ހިންގާ އެކި ޕްރޮޖެކްޓްތައް ބިޑް ކޮށްގެންނާއި އެހެން ގޮތްގޮތުން ހޯދައިގެން އެޑްވާންސް ޕޭމަންޓް ނެގުމަށް ފަހު ފިލާ ކުންފުނިތަކެއް އެބައުޅޭ ކަމަށެވެ.
އެ ޕްރޮޖެކްޓެއް ހިންގުމަށް ދައުލަތުން ފައިސާ ނެގުމަށް ފަހު އެއްވެސް މަސައްކަތެއް ނުކުރާ ކުންފުނިތައް އޭގެ ތެރޭގައި ހިމެނޭ ކަމަށް މިނިސްޓަރު ވިދާޅުވިއެވެ.
"ފިލާފައި ދެން މި ކުރައްވާ ކަމަކީ ވިޔަފާރި ކުރައްވަނީ. ވިޔަފާރިކޮށްގެން ފައިދާ ހޯއްދަވައިގެން ފަސް އަހަރު 10 އަހަރު ފަހުން ދެން އާ ޕްރޮޖެކްޓެއް ހިންގަން މަސައްކަތް ކުރަނީ." މިނިސްޓަރު ވިދާޅުވިއެވެ.
"ހަގީގަތުގައި ދައުލަތުން ހިންގާ ޕްރޮޖެކްޓްތަކުން ފައިސާ މި ނަގަނީ ވިޔަފާރި ކުރުމަށްޓަކައި. އޭގެ ސަބަބުން ދައުލަތަށް ވަރަށް ގެއްލުންވާ ވާހަކަ ދަންނަވާލަން."
މިނިސްޓަރު މުއްތަލިބު އެގޮތަށް ވިދާޅުވެފައިވާއިރު ނިމިދިޔަ އެމްޑީޕީގެ ވެރިކަމުގައި އެ ޕާޓީގެ މަޖިލިސް މެންބަރުންނާއި ޕާޓީގެ އެހެން އިސް ބޭފުޅުންނަށް ސަރުކާރުގެ ގިނަ ޕްރޮޖެކްޓްތަކެއް ދީގެން ވަރަށް ބޮޑެތި ނަފާތަކެއް ނެގި ކަމަށް ގިނަ ތުހުމަތުތައް ކުރެވެއެވެ.
ފެނަކަ ފަދަ ކުންފުނިތަކާއި އެހެން ޕްރޮޖެކްޓްތައް ވެސް ސަރުކާރުން މެންބަރުންގެ މަސްލަހަތު އޮތް ކުންފުނިތަކަށް ދީގެން ވަކި ބަޔަކަށް ބޮޑެތި މާލީ މަންފާތަކެއް ލިބޭ ގޮތަށް އަމަލު ކޮށްފައިވާ ކަމަށް ތުހުމަތު ކުރެވެއެވެ.
އޭރަކު އޮންނަ ސަރުކާރަކާއި ސަރުކާރު ހިއްސާވާ ކުންފުނިތައް ބޭނުންކޮށްގެން ވަކި ބަޔަކަށް ނާޖާއިޒު ފައިދާ ހޯދައި ދިނުމަކީ ކޮންމެ ވެރިކަމެއްގައި ވެސް ރާއްޖޭގައި ހިނގާ ކަމަށް ތުހުމަތު ކުރެވޭ ކަމެކެވެ. އޭގެ ސަބަބުން ސިޔާސީ ބާރުވެރިކަމެއް ނެތް މީހުންނަށް ވިޔަފާރިތައް ކުރަން ގިނަ ގޮންޖެހުންތަކަކާ ކުރިމަތިވެއެވެ.