ގައުމީ އެއާލައިން މޯލްޑިވިއަން ހިންގާ އައިލެންޑް އޭވިއޭޝަން ސާވިސަސް ލިމިޓެޑް (އައިއޭއެސްއެލް) އޮތީ މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)އަށް 1.12 ބިލިއަން ރުފިޔާއިން ދަރާފައި ކަމަށް އެމްއޭސީއެލްގެ މެނޭޖިން ޑިރެކްޓަރު އިބްރާހީމް ޝަރީފް މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީގައި އެމްއޭސީއެލްގެ މާލީ ހާލަތާ ގުޅޭގޮތުން ވާހަކަދައްކަވަމުން ޝަރީފް ވިދާޅުވީ، އެސްއޯއީ ކުންފުނިތަކުން އެ ކުންފުންނަށް ދައްކަންޖެހޭ ވަރަށް ގިނަ ފައިސާ އަދިވެސް ނުދައްކާ އެބަހުރި ކަމަށެވެ.
ޚާއްސަކޮށް އައިލެންޑް އޭވިއޭޝަނުން 1.12 ބިލިއަން ރުފިޔާ ނުދައްކާ އެބަހުރި ކަމަށް އޭނާ ވިދާޅުވިއެވެ.
އެމްއޭސީއެލްގެ މެނޭޖިން ޑިރެކްޓަރު އިބްރާހީމް ޝަރީފް، ސްޓޭޓް އޯންޑް އެންޓަޕްރައިޒަސް ކޮމިޓީގައި ވާހަކަދައްކަވަނީ: ވިދާޅުވީ, އައިލެންޑް އޭވިއޭޝަނުން އޮތީ 1.12 ބިލިއަން ރުފިޔާ އެމްއޭސީއެލްއަށް ދަރާފައި ކަމަށް -- ފޮޓޯ/ މަޖިލިސް
"އެއީ ގާތްގަނޑަށް އަހަރަކު 78 މިލިއަން ރުފިޔާގެ ޑިސްކައުންޓް އެ ބޭފުޅުންނަށް ދޭއިރު ވެސް 1.12 ބިލިއަން ރުފިޔާ އަޅުގަނޑުމެންނަށް އެ ބޭފުޅުން ދޭންވެފައި އެބައޮތް،" ޝަރީފް ވިދާޅުވިއެވެ.
އޭނާ ވިދާޅުވީ، އެ ފައިސާ ލިބުނު ނަމަވެސް ކުންފުނީގެ ޚަރަދުތައް ކޮންމެ ވެސް ވަރަކަށް ކުޑަކުރެވޭނެ ކަމަށެވެ.
"...އޭގެ ސަބަބުން އަޅުގަނޑުމެން ބޭންކުތަކަށް ގޮސް ވޯކިން ކެޕިޓަލް ނަގަން މި ޖެހެނީ. މި އެއްޗެހި ލިބިފައި އޮންނަނަމަ އަޅުގަނޑުމެންގެ ފައިނޭންޝަލް ޚަރަދު ވެސް ކޮންމެ ވެސް ވަރަކަށް ކުޑަވެގެންދާނެ،" ޝަރީފް އިތުރަށް ވިދާޅުވިއެވެ.
އައިލެންޑް އޭވިއޭޝަނުން އެމްއޭސީއެލްއަށް ނުދައްކާ 351 މިލިއަން ރުފިޔާ އެބައޮތް ކަމަށް މި އަހަރުގެ ޖުލައި މަހު އާންމުކުރި އޮޑިޓް ރިޕޯޓުން ވެސް ދެއްކިއެވެ. ނަމަވެސް، މިހާރު އެ އަދަދުތައް އިތުރުވެ، 1.12 ބިލިއަނަށް އެ ވަނީ އަރާފައެވެ.
އޮޑިޓުން ދައްކާ ގޮތުގައި އައިލެންޑް އޭވިއޭޝަނުން ނުދައްކާ ހުރި ފައިސާއަކީ 2016 ވަނަ އަހަރުން ފެށިގެން ނުދައްކާ ހުރި ފައިސާއެވެ. އެ ދެމެދުގައި އެންމެ ބޮޑު އަދަދެއް ނުދައްކާ އޮތީ 2021ވަނަ އަހަރެވެ. އެއީ، 248 މިލިއަން ރުފިޔާގެ ދަރަންޏެވެ.