ޒުވާނުން ރަނގަޅަށް ބާރުވެރިކޮށް، މުޖުތަމައަށް ފައިދާހުރި ބަޔަކަށް ހެދުމަށްޓަކައި ސްކޫލު ނިންމާފައި މުޖުތަމައަށް ނުކުންނަ ކުދިންނަށް މިލިޓަރީ ޓްރެއިނިން ދޭން އެބަޖެހޭ ކަމަށް ރައްޔިތުންގެ މަޖިލީހުގެ ހުޅުމާލެ އުތުރު ދާއިރާގެ ޕީއެންސީ މެންބަރު ހުސައިން ޝަރީފް މިއަދު ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި ކުޅިވަރުގެ ގާނޫނަށް އިސްލާހު ހުށަހަޅާފައިވާ ބިލަށް ބަހުސްކުރައްވާ މެންބަރު ޝަރީފް ވަނީ އެކި އުމުރުފުރާގެ ކުދިން، ވަކިން ޚާއްސަކޮށް އަދުގެ ޒުވާން ޖީލު މަސްތުވާތަކެތީގެ ވަބާގައި ޖެހިގެން އެ ކަމުން މިއަދު ހާސިލުވީ ކޮންކަމެއްތޯ ސުވާލު އުފައްދަވާފައެވެ.
ޒިންމާދާރުކަމާ އެކު އެ ކުދިންގެ މުސްތަގުބަލައިގެން ކުރިއަށްދެވޭނެ މަގުތަކެއް މިއަދު ކޮށައިދޭން އެބަ ޖެހޭ ކަމަށް ޝަރީފް ވިދާޅުވިއެވެ. މިއަދު މި ހާލަތަށް ގައުމު އަންނަން ޖެހުނީ އެހެން ސަރުކާރުތަކުން އެ މަގުތައް ކޮށައިނުދޭތީ ކަމަށް ވެސް ޝަރީފް ވިދާޅުވިއެވެ.
"2040އަށް ދާންވާއިރަށް އާބާދީގެ ނިސްބަތުން ބޮޑުބައެއް ބޮޑެތި ބަލިތަކަށް ހުށަހެޅޭނެކަމަށް ސިއްޙީ މާހިރުން އިންޒާރުދެމުން އެދަނީ. ދަންވަރަށް ފޮޅޭހެން އަޅުގަނޑުމެންގެ ޒުވާނުން ނުފޮޅުވާ، އާދަކަދަތައް ވެސް ބަދަލުކުރުވަން އެބަޖެހޭ،" މެންބަރު ޝަރީފް ވިދާޅުވިއެވެ.
މުޅި ނިޒާމު ބަދަލުކުރަން ޖެހޭކަން ފާހަގަކުރައްވާ ޝަރީފް ވިދާޅުވީ، ޒުވާނުން ރަނގަޅަށް ބާރުވެރިކުރުވުމަށްޓަކައި މިލިޓަރީ ޓްރެއިނިން މުހިންމު ކަމަށެވެ. އެގޮތުން، މީގެ ކުރިން މިލިޓަރީ ޓްރެއިނިން ހަދާފައިވާ ކުދިން، އެ ކުދިންގެ ޒިންމާ އަދާކުރުމުގެ ވަގުތު އައިއިރު ގައުމާ ދޭތެރޭ ވަފާތެރިވެފައި އެބަހުރި ކަމަށް ޝަރީފް ވިދާޅުވިއެވެ.
"އަޅުގަނޑުމެންގެ ޒުވާނުން ރަނގަޅަށް ބާރުވެރިކުރުވުމަށްޓަކައި ކުޅިވަރުން ވެސް ކާމިޔާބު ހޯދަން ބޭނުންކަމުގައި ވާނަމަ ސްކޫލުތައް ނިމޭ ކުދިން ޚާއްސަކޮށް މީގެ ތެރެއަށް އަޅުގަނޑު [ހިމަނާ]ލަން ބޭނުން. ދިވެހި ދައުލަތަށް ޚިދުމަތްކުރަން އަންނަ ކުއްޖަކުވިއްޔާ އެ ކުއްޖެއްގެ ފަހަތުގައި މިލިޓަރީ ޓްރެއިނިން އެ ކުއްޖަކަށް ވަރަށް ފުރިހަމައަށް ލިބިފައިވާ ކުއްޖެއްގެ ގޮތުގައި ގާނޫނުގެ ތެރެއިން ހަދަންޖެހޭ،" މެންބަރު ޝަރީފް ވިދާޅުވިއެވެ.
އޭރުން މުސްތަގުބަލުގައި ވެށި އަމާންވެ، ރަނގަޅު ޖީލެއް ބިނާކުރެވޭނެ ކަމަށާއި ގައުމަށް ވަފާތެރި، ކިޔަމަންތެރި، އިހުތިރާމުކުރާ މުޖުތަމައެއް ބިނާވެގެންދާނެ ކަމަށް ޝަރީފް ވިދާޅުވިއެވެ.
ކިޔެވުމުގެ ފުރުސަތު ނެތް، ނުވަތަ ވަޒީފާއެއް ނެތް ކޮންމެ ޒުވާނަކު ސަލާމަތީ ބާރުތަކުގެ ތަމުރީނުތަކުގައި ބައިވެރިކުރުވާ ގޮތަށް، ނެޝަނަލް ސާވިސް ޕްރޮގްރާމެއް ފަށަން ކަމަށް ރައީސް ޑރ. މުހައްމަދު މުއިއްޒު ވަނީ ތިނެއް ނޮވެމްބަރުގައި އިއުލާނުކުރައްވާފައެވެ. އެ މަނިކުފާނު ވިދާޅުވީ، ސިފައިންގެ ދައުރު ފުޅާކުރުމަށްޓަކައި ކުރިއަށް އޮތް ހަތަރު އަހަރުތެރޭ، ކޮންމެ އަހަރަކު 1،000 ސިފައިން ތަމްރީނުކުރަންޖެހޭ ކަމަށެވެ.
ހަމައެއާ އެކު ފުލުހުންގެ ދައުރު ފުޅާކުރުމަށްޓަކައި ކުރިއަށް އޮތް ހަތަރު އަހަރުން 1،000 ފުލުހުން ތަމުރީނުކުރަންޖެހޭ ކަމަށް ރައީސް ވިދާޅުވިއެވެ.
އޭގެ ސަބަބުން އޯލެވެލް ނިމި އޭލެވެލްއަށް ނުދެވި ތިބޭ އަދި އޭލެވެލް ނިންމައި ޑިގްރީއަށް ނުދެވި ތިބޭ ބައިވަރު ކުދިން މަސްތުވާތަކެއްޗާއި އެކި ކަހަލަ ނުބައި އަމަލުތަކަށް ހުށަހެޅުމުން ދުރުކުރެވޭނެ ކަމަށް އެ މަނިކުފާނު ވިދާޅުވިއެވެ.