އެންޓިކޮރަޕްޝަން ކޮމިޝަން (އޭސީސީ) މިނިވަންކަމާ އެކު މަސައްކަތް ކުރިޔަ ނުދިނުމަށް މި ސަރުކާރުން މަަސައްކަތް ކުރަނީ ކީއްވެގެންތޯ ކުރީގެ ރައީސް އަބްދުﷲ ޔާމީން އަބްދުލްގައްޔޫމް ސުވާލު އުފައްދަވައިފިއެވެ.
ޕީއެންއެފުން ކޮންމެ ހަފުތާއަކު ސިލްސިލާކޮށް ބާއްވާ ޖަލްސާތަކުގެ ތެރެއިން ރޭ ބޭއްވި ޖަލްސާގައި ވާހަކަ ދައްކަވަމުން ޔާމީން ވިދާޅުވީ އޭސީސީގެ ރައީސަކީ ރައީސުލްޖުމްހޫރިއްޔާ އައްޔަންކުރައްވާ ބޭފުޅެއްގެ ގޮތުގައި ނިންމަން މަސައްކަތް ފެށި ހިސާބުން، ރާއްޖެ ޑޮމިކްރަސީގައި 30 އަހަރު ފަހަތަށް ގޮސްފައި ވާކަމަށެވެ.
މި ސަރުކާރަށް ދެވޭނީ ނަޒާހަތްތެރިކަމުގެ މިންގަނޑުން ސުމެއްކަން ފާހަގަކުރައްވާ އެމަނިކުފާނު ވިދާޅުވީ، މި ސަރުކާރުގެ ބޮޑުންގެ މައްސަލަތައް ވެސް އޭސީސީގައި އެބަ އޮތް ކަމަށެވެ.
"އެންމެ މައްސަލައެއް ނޫން. އެތައް މައްސަލައެއް. ދައުލަތުން ބޮޑެތި އަދަދުގައި ފައިސާއިން ސެޓަލްމަންޓު ދައްކަން ޖެހިފައި ހުރީ މިހާރު މިހުރި ރައީސް ކަންތައްތައް ކުރައްވާފައި ހުރި ގޮތުން،" އެމަނިކުފާނު ވިދާޅުވިއެވެ.
އެހެންކަމުން ގާނޫނު އަސާސީން އުފަންކުރި ހުރިހާ މުސްތަގިއްލު މުއައްސަސާތައް ބަންދުކުރުން ވެސް މިހާރު މާ ރަނގަޅުވާނެ ކަމަށް އެމަނިކުފާނު ވިދާޅުވިއެވެ.
"ރައީސަކީ ގައުމުގެ ޚާދިމަކަށް މިވަނީ އެއީ ގަނޫނު އަސާސީގައި އެމަނިކުފާނަށް މަތިކޮށްފައި ހުރިކަންކަން ގާނޫނުގައި އެބުނާ ގޮތަކަށް ތަދުބީރުކުރަން ހަވާލުކޮށްފައި ހުންނަ މީހެއް އެއީ. އޭގެ ބަދަލުގައި ގާނޫނު އެބޭފުޅާއަށް ފަހިވާގޮތަށް ގާނޫނު ބަދަލުކޮށްލުމަކީ އޭގެ ޒާތުގައި ކުރެއްވޭނެ ކަމެއް ނޫން،" ޔާމީން ވިދާޅުވިއެވެ.
އެމަނިކުފާނު ވަނީ މި ސަރުކާރުގެ ނަޒާހަތްތެރިކަން ރައްޔިތުންނަށް ހާމަކޮށްދެއްވުމަށް ގޮވައިލައްވާފައެވެ. އަދި ރައްޔިތުން އެންމެ އެނގެން ބޭނުންވަނީ މި ސަރުކާރުން ބަޖެޓާމެދު އަމަލުކުރި ގޮތް ކަމަށާއި އެކަން ވެސް ހާމަކުރަން ޖެހޭ ކަމަށް އެމަނިކުފާނު ވަނީ ވިދާޅުވެފައެވެ.
އިލެކްޝަން ކޮމިޝަން (އީސީ) އަދި އޭސީސީއަށް ރައީސް ބޭނުންފުޅުވާ ބޭފުޅުން އައްޔަން ކުރެއްވި ނަމަވެސް، ރައްޔިތުންގެ ވޯޓު ކޮންޓްރޯލް ކުރެވޭނެކަމަށް ހީކުރެއްވުމަކީ ކުށްހީއެއް ކަމަށް އެމަނިކުފާނު ވިދާޅުވިއެވެ. އަދި ކަންކަން ހާމަކުރެއްވުމަށްފަހު ވޯޓަކަށް އެހުމުން ރައްޔިތުން ޚިޔާރުކުރާ ގޮތް ވެސް ވަރަށް ސާފުވާނެ ކަމަށް އެމަނިކުފާނު ވިދާޅުވިއެވެ.
"މި ސަރުކާރަށް ޖަވާބުދާރީ ނުވެވޭނެ ކަމަކީ އޭސީސީ މިނިވަންކަމާ މުސްތަގިއްލުކަމާ އެކީގައި ގާނޫނު އަސާސީން އެކަށައަޅާފައި އޮތްގޮތަށް ހިންގިޔަ ނުދޭން ތި އުޅެނީ ކިހިނެތް ވެގެންތޯއޭ،" އެމަނިކުފާނު ވިދާޅުވިއެވެ.
މިނިވަން މުއައްސަސާތަކުގެ ތެރެއިން އޭސީސީ އާއި އީސީގެ ރައީސުން އައްޔަންކުރުމުގެ ބާރު ރައީސުލްޖުމްޙޫރިއްޔާއަށް ދޭގޮތަށް ގާނޫނަށް ބަދަލުގެންނަން ރައްޔިތުންގެ މަޖިލީހަށް ހުށަހެޅި ދެ ބިލު މަޖިލީހުން ފާސްކުރީ މިއަދެވެ.
މި ދެ ބިލުގައި ވާގޮތުން، އޭސީސީ ނުވަތަ އީސީއަށް ރައީސަކާއި ނައިބު ރައީސެއް އައްޔަންކުރުމަށް، ކޮމިޝަންގެ މެންބަރުންގެ ތެރެއިން މެންބަރެއްގެ ނަން މަޖިލީހަށް ހުށަހަޅުއްވާނީ ރައީސުލްޖުމްހޫރިއްޔާއެވެ.
މި ނަން ފާސްކުރުމަށް މަޖިލީހުގެ ޖަލްސާއެއް ބާއްވަން ޖެހެއެވެ. އެ މަގާމުތަކުން އިސްތިއުފާދޭން ހުށަހަޅަން ޖެހޭނީ ވެސް ރައީސުލްޖުމްހޫރިއްޔާއަށް ކަމަށް އިސްލާހުގައި ބަޔާންކޮށްފައިވެއެވެ. އަދި، ގާނޫނަށް އަމަލުކުރަން ފެށުމުގެ ކުރިން ދެ ކޮމިޝަންގެ ރައީސާއި ނައިބު ރައީސް ވެސް ގާނޫނުގައިވާ ގޮތުގެ މަތިން މަގާމުން ވަކިވަންދެން އެ މަގާމުގައި ދެމިތިބޭނެއެވެ.
މިހާރު ގާނޫނުގައި އޮންނަ ގޮތުން ނަމަ އޭސީސީ އަދި އީސީގެ ރައީސް އަދި ނައިބު ރައީސް އައްޔަނުކުރަނީ އެ ދެ ކޮމިޝަންގެ މެންބަރުންގެ މެދުގައި ނަގާ ވޯޓަކުންނެވެ. މި ވޯޓުގެ ނަތީޖާ 28 ގަޑިއިރުތެރޭ ރައީސުލްޖުމްހޫރިއްޔާއަށާއި މަޖިލީހަށް ހުށަހަޅަން ޖެހޭނެއެވެ.