ގދ. ތިނަދޫން ސިޓީއެއްގެ ދަރަޖަ އުނިކުރުމަށް އެދި، ދައުލަތާ ދެކޮޅަށް ކޯޓަށް ދިއުމާ ގުޅިގެން، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީގެ ޑެޕިއުޓީ މިނިސްޓަރު މުހައްމަދު ރާޣިބު އަހްމަދު މިއަދު އެމަގާމުން ވަކިކޮށްފިއެވެ.
މިކަން ހާމަކުރައްވާފައި ވަނީ ރައީސް އޮފީހުގެ ތަރުޖަމާނު ހީނާ ވަލީދު އެކްސްގައި ކުރެއްވި ޕޯސްޓެއްގައެވެ. ހީނާގެ ޕޯސްޓުގައި ވަނީ ރާޣިބް މަގާމުން ވަކިކުރަން ނިންމެވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަމަށެވެ.
ގާނޫނީ ވަކީލު ރާޣިބް ހައިކޯޓަށް ހުށަހެޅި ދުސްތޫރީ މައްސަލައިގައި ވަނީ، ގދ. ތިނަދޫގެ އާބާދީގައި 10،000 މީހުން ހަމަނުވާ ކަމަށާއި، އެ ކަން ކޮށްފައި އޮތީ އޮޅުވައިލައިގެންކަމަށެވެ. އެހެންކަމުން ކުރީގެ ރައީސް އިބްރާހީމް މުޙައްމަދު ޞާލިޙް އެ ރަށަށް ދެއްވި ސިޓީއެއްގެ ދަރަޖަ އުނިކުރުމަށް ވަނީ އެދިފައެވެ.
އެއާއެކު، އޭނާ ވަނީ އެ ރަށުގެ އާބާދީގައި ސިޓީއެއްގެ ދަރަޖަ ދޭ މިންވަރަށް މީހުން ހަމަނުވާ ކަމަށް ބުނެ، ސަބަބުތަކެއް ހިއްސާކޮށްފައެވެ.
މިގޮތުން، އެރަށުގެ އާބާދީގައި 10،150 މީހުން އިތުރުކުރުމަށް ޓަކައި މަރުވެފައިވާ 115 މީހެއްގެ ނަން ލިސްޓުގައި ހިމަނާފައިވާ ކަމަށާއި ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު) އިން ބަލަހައްޓާ އާބާދީގެ ލިސްޓާއި އެރަށު ކައުންސިލްގެ ރަޖިސްޓްރީގައިވާ އާބާދީ ލިސްޓުން ގިނަ ގާނޫނީ މައްސަލަތަކެއް ފާހަގަވާކަމަށް ބުނެފައިވެއެވެ.
އާބާދީ ލިސްޓުގައި އެންމެ މީހެއްގެ ނަމުގައި ތަކުރާރުކޮށް އައިޑީކާޑު ބޭނުންކޮށްފައި ހުރި ކަމަށާއި ލިސްޓަށް މީހުން އިތުރުކުރުމަށް ގާނޫނުގައިވާ ގޮތަށް އެލްޖީއޭ މެދުވެރިކޮށް ތިނަދޫގެ އާބާދީގައި ރަޖިސްޓްރީވެފައިވާ މީހުންގެ ތެރެއިން އެހެން ރަށެއްގެ މީހަކު އެ ލިސްޓުގައި ރަޖިސްޓްރީވެފައި ވޭތޯ ބަލާފައިނުވާ ކަމަށް ވެސް އެ ލިޔުމުގައި ބުނެފައިވެއެވެ.
މީގެއިތުރުން، ޑީއެންއާރްއިން ހޯދި މައުލޫމާތުން މިހާރު ތިނަދޫގެ އަބާދީގައި ތިބީ 7,924 މީހުން ކަމަށް ވެސް ވަނީ ބުނެފައެވެ.
އެ ސަބަބުތަކަށް ރިއާޔަތްކޮށް އެ މައްސަލާގައި އެދިފައި ވަނީ، ތިނަދޫއަކީ ސިޓީއެއްކަމަށް ނިންމި ނިންމުމާއި އެ ނިންމުމާ ގުޅިގެން އަޅާފައިވާ ހުރިހާ އިދާރީ ފިޔަވަޅުތައް ބާތިލުކުރުމަށެވެ.
ސިޔާސީ މަގާމެއްގައި ހުރެ ދައުލަތާ ދެކޮޅަށް ވަކާލާތު ނުކުރެވޭނެ ކަމަށް މީގެ ކުރިން ހައިކޯޓުން ވަނީ ހުކުމް ކޮށްފައެވެ. ނަމަވެސް، މިމަހުގެ ހަވަނަ ދުވަހު ދައުލަތާ ދެކޮޅަށް ވަކާލާތު ކުރުމުގެ ފުރުސަތު ކްރިމިނަލް ކޯޓުން ވަނީ ރާޣިބަށް ދީފައެވެ.
އެއާއެކު އޭނާ ވަނީ ކޭ ޕާކް ރެސިޑެންސްގެ ފްލެޓްތައް މަކަރާއި ހީލަތުން ވިއްކިކަމަށް ތުހުމަތުކުރެވޭ މައްސަލައިގައި ދައުވާކޮށްފައިވާ ހަސަން މަމްދޫހުގެ ވަކީލެއްގެ ގޮތުގައި މަސައްކަތް ކޮށްފައެވެ.
ތިނަދޫއަށް ސިޓީއެއްގެ ދަރަޖަ ދިންކަން ކުރީގެ ރައީސް ޞާލިޙް އިއުލާންކުރެއްވީ މިދިޔަ އަހަރުގެ އޮގަސްޓު މަހުގެ 30ވަނަ ދުވަހު އެ ރަށުގައި ބޭއްވި ރިޔާސީ ކެންޕޭން ޖަލްސާއެއްގައެވެ.
ތިނަދޫ ސިޓީއަކަށް ހެދުމަކީ ރައީސް ޑރ. މުހައްމަދު މުއިއްޒުގެ ވެސް ރިޔާސީ ވައުދުފުޅެކެވެ.