މަގާމުގެ މަސްއޫލިއްޔަތު އަދާކުރުމުގައި އިހުމާލުވެ، ގާނޫނާ ޚިލާފު އެތައް ކަމެއް ކުރިކަމުގެ ބޮޑެތި ތުހުމަތުތަކާ އެކު އިލެކްޝަންސް ކޮމިޝަން (އީސީ)ގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފް ވަކިކުރަން ރައްޔިތުންގެ މަޖިލީހުން މިއަދު ފާސްކޮށްފިއެވެ.
ސިވިލް ސާވިސް ކޮމިޝަން (ސީއެސްސީ)ގެ ރައީސް މުހައްމަދު ނާސިހުގެ ނަން ހިމެނޭ ގޮތަށް، މިނިވަން މުއައްސަސާތަކުގެ މެންބަރުންތަކެއް ވަކިކުރަން ހުށަހަޅައި ކޮމިޓީއަށް ފޮނުވީ މި މަހުގެ 12ގައެވެ.
އެހެންނަމަވެސް, ކޮމިޓީން ނިންމީ ނާސިހު މަގާމުން ވަކިނުކުރުމަށެވެ. ދެން ވަކިކުރުމަށް ނިންމި މެންބަރުންނަކީ:
- އޭސީސީގެ ނައިބު ރައީސް އަބްދުއްސަލާމް
- އޭސީސީގެ މެންބަރު ތޯހާ މުހައްމަދު
- އީސީގެ ނައިބު ރައީސް އަލީ ނަޝާތު
- އީސީގެ މެންބަރު މުހައްމަދު އާސިފް
- އީސީގެ މެންބަރު ޑރ. މުހައްމަދު ޒާހިރު
އޭގެ ތެރެއިން އޭސީސީގެ ދެ މެންބަރުން ވަނީ މަގާމުން ވަކިކުރުމަށް މިއަދު ވޯޓަށް އެހުމުގެ ކުރިން މަގާމުން އިސްތިއުފާދީފައެވެ. އެހެންކަމުން އެ ވޯޓު ނަގާފައެއް ނުވެއެވެ.
ނަމަވެސް, ކޮމިޓީން ނިންމި ގޮތާ ޚިލާފަށް އީސީގެ މެންބަރު ޒާހިރު ވަކިނުކުރުމަށް މަޖިލީހުން ވަނީ ފާސްކޮށްފައެވެ.
މެންބަރުން ވަކިކުރުމަށް މިއަދު ނެގި ވޯޓުގައި އީސީގެ ނައިބު ރައީސް އަލީ ނަޝާތު ވަކިކުރުމަށް 69 މެންބަރުން ވޯޓުދެއްވިއިރު، 10 މެންބަރުން ވަނީ ދެކޮޅަށް ވޯޓުދެއްވާފައެވެ. އަދި، އީސީގެ މެންބަރު މުހައްމަދު އާސިފް ވަކިކުރުމަށް 68 މެންބަރުން ވޯޓުދެއްވިއިރު، 10 މެންބަރުން ވަނީ ދެކޮޅަށް ވޯޓުދެއްވާފައެވެ.
ނަމަވެސް، އީސީގެ މެންބަރު ޑރ. މުހައްމަދު ޒާހިރު މަގާމުން ވަކިނުކުރުމަށް 70 މެންބަރުންގެ އިއްތިފާގުން ވަނީ ފާސްކޮށްފައެވެ.
އަބްދުއްރަހީމާއި ސީއެސްސީގެ ރައީސް މުހައްމަދު ނާސިހް -- ފޮޓޯ/ ސީއެސްސީ
އަދި، ސިވިލް ސާވިސް ކޮމީޝަން (ސީއެސްސީ)ގެ ރައީސް މުހައްމަދު ނާސިހު މަގާމުން ވަކިކުރުމާ ދެކޮޅަށް 64 މެންބަރުން ވޯޓު ދެއްވިއިރު 12 މެންބަރުން ވަނީ ނާސިހު މަގާމުން ވަކިކުރުމަށް ވޯޓު ދެއްވާފައެވެ. ވަކި ގޮތަކަށް ވޯޓު ދިނުމާ ދެކޮޅަށް ދެ މެންބަރަކު ވޯޓު ދެއްވިއެވެ.
މަޖިލީހުގެ މިނިވަން މުއައްސަސާތަކުގެ ކޮމިޓީން އެ މައްސަލަ ނިންމި ރިޕޯޓުގައިވާ ގޮތުން ނަމަ، ރިޔާސީ އިންތިޚާބުގައި އެ ކޮމިޝަންގެ ޑޭޓާބޭސްއިން މައުލޫމާތު ނަގައިގެން ނަޝާތު ވަނީ އެޕްލިކޭޝަންތައް ހަދައި، އެ އެޕްލިކޭޝަންތައް ވިއްކައި ބައެއް ސިޔާސީ ޕާޓީތަކަށް ދީފައެވެ. އަދި، ވަކި ސިޔާސީ ޕާޓީއަކަށް ރިޔާސީ އިންތިޚާބު ކާމިޔާބުކޮށްދިނުމަށް އެ ތިން މެންބަރުން އެކުގައި މަސައްކަތް ކޮށްފައިވާ ކަމަށް ވެސް ރިޕޯޓުގައި ބުނެފައިއެވެ.
ރިޔާސީ އިންތިޚާބުގެ ރީ ރެޖިސްޓްރޭޝަންގައި މަކަރުހަދައި އޮޅުވާލުމުގެ އަމަލުތަކެއް ހިންގާފައިވާ ކަމަށް އެ ރިޕޯޓުގައި ވަނީ ތުހުމަތުކޮށްފައެވެ. އަދި، ވަކި ޕާޓީއެއް އުފެއްދުމަށް ސޮއިކުރި މެންބަރުންގެ ލިސްޓު އޭރު ރައީސް އޮފީހުގެ އިސް ފަރާތަކަށް ފޮނުވައި، ޕާޓީ އުފެއްދުމަށް ހުރަސްއަޅައި ގިނަ މަސައްކަތްތަކެއް ކޮށްފައިވާކަމަށް ވެސް އެ ރިޕޯޓުގައި ބުނެފައިވެއެވެ.
މި ނޫނަސް ބައިވަރު ބޮޑެތި ތުހުމަތުތަކެއް ތިން މެންބަރުންނަށް ކޮށްފައިވެއެވެ.
ކޮމިޓީން ހުށަހެޅި ރިޕޯޓުގައި ވާގޮތުން އޭސީސީގެ ދެ މެންބަރުން ވަނީ ކުރީގެ ބަންޑާރަނައިބެއްގެ މައްޗަށް ތުހުމަތުކުރެވުނު މައްސަލައެއްގައި ދައުވާކުރެވޭ ވަރަށް ހެކި ހުރި ނަމަވެސް އެ ފަރާތުގެ މައްޗަށް ދައުވާނުކުރެވޭނެ ކަމަށް ކަނޑައަޅާ އެ މައްސަލަ ފައިލްކުރުމުގައި އިސް ދައުރެއް އަދާކޮށްފައެވެ.
އަދި، ގާނޫނާ ޚިލާފަށް އެފަދަ އެތައް ކަމެއް ކޮށްފައިވާ ކަމަށާއި މަގާމުގައި ތިއްބަވައި، އިސްކުރައްވާފައިވަނީ އަމިއްލަ މަސްލަހަތުކަމަށް ރިޕޯޓުގައި ބުނެފައިވެއެވެ.