ކޮރަޕްޝަނަށް މަގުފަހިވާގޮތަށް އެތައް ކަމެއް ކުރިކަމުގެ ތުހުމަތު، އެންޓި ކޮރަޕްޝަން ކޮމިޝަން (އޭސީސީ)ގެ ނައިބު ރައީސް އަބްދުއްސަލާމާއި މެންބަރު ތޯހާ މުހައްމަދުގެ މައްޗަށް ކޮށްފިއެވެ.
މި މަހުގެ 12ގައި މަގާމުގެ މަސްއޫލިއްޔަތު އަދާނުކުރާ ކަމަށާއި، މަގާމުގައި ހުރެ ގަވާއިދާ ޚިލާފަށް އެތައް ކަމެއް ކޮށްފައިވާކަމުގެ ތުހުމަތުގައި އެ ދެ މެންބަރުންގެ މައްސަލަ މަޖިލީހަށް ވަނީ ހުށަހަޅާފައެވެ.
ކޮމިޓީން އެ މައްސަލަ ނިންމި ގޮތުގެ ރިޕޯޓު، ކޮމިޓީގެ މުގައްރިރު އަދި މާފުށީ ދާއިރާގެ މެންބަރު ހުސައިން ރިޒާ އާދަމް ވަނީ މިއަދު ތަޅުމަށް ހުށަހަޅުއްވާފައެވެ.
އެ ރިޕޯޓުގައި ބަޔާންކޮށްފައިވާ ގޮތުގައި އެ ދެ މެންބަރުން ވެސް ވަނީ ގާނޫނާ ޚިލާފަށް އެފަދަ އެތައް ކަމެއް ކޮށްފައެވެ. އަދި މަގާމުގައި ތިއްބަވައި، އިސްކުރައްވާފައި ވަނީ އަމިއްލަ މަސްލަހަތުކަމަށް ރިޕޯޓުގައި ބުނެފައިވެއެވެ.
އޭސީސީގެ ނައިބު ރައީސް ސަލާމްގެ މައްޗަށް ކޮށްފައިވާ ތުހުމަތުތައް:
- ކުރީގެ ބަންޑާރަނައިބެއްގެ މައްޗަށް ތުހުމަތުކުރެވުނު މައްސަލައެއްގައި ދައުވާ ކުރެވޭ ވަރަށް ހެކި ހުރި ނަމަވެސް އެ ފަރާތުގެ މައްޗަށް ދައުވާނުކުރެވޭނެ ކަމަށް ކަނޑައަޅާ އެ މައްސަލަ ފައިލްކުރުމުގައި އިސް ދައުރެއް އަދާކުރުން.
- ވަކި ސިޔާސީ ޕާޓީއަކަށް ގެއްލުންތަކެއް ވެދާނެތީ ބިންވެރިޔާ މައްސަލަ އިތުރަށް ތަހުގީގުކުރުމަށް ފުރުސަތު ނުދީ މައްސަލަ ހުއްޓުވައި، އެ މައްސަލައިގެ ހެކި ނައްތާލަން މަގުފަހިކޮށްދިނުން.
- ފޮރެންސިކް ސެކްޝަނުން ކުރާ މާ ބޮޑު މަސައްކަތެއް ވެސް ނެތް ނަމަވެސް، އެ ސެކްޝަން ހަދައި އެތަނުގެ ހެޑަކަށް ގާތް މުވައްޒަފެއްލައި އެތަން ކުރިއަރުވަން މަސައްކަތް ކޮށްފައިނުވުން.
- މައްސަލަތައް ނިންމަން ބޭނުންވާ ގޮތަކަށް ނިންމުމަށް މެންބަރުންނަށް ބާރު އަޅައި، މައްސަލަތައް ނިންމުމުގައި އަމިއްލަ މަސްލަހަތައް ބަލާފައިވުން.
- ނުފޫޒު ފޯރުވައިގެން މަސައްކަތްތައް ކުރިއަށް ގެންގޮސްފައިވުން.
އޭސީސީގެ މެންބަރު ތޯހާގެ މައްޗަށް ކޮށްފައިވާ ތުހުމަތުތައް:
- އޭސީސީން ވަކި ކުރި މުވައްޒަފެއްގެ މައްސަލަ ވަޒީފާއާ ބެހޭ ޓްރައިބިއުނަލުން ނިންމި ނިންމުން ހައި ކޯޓުގައި އިސްތިއުނާފު ކޮށްފައި ވަނިކޮށް، ނުފޫޒުން އެ އިސްތިއުނާފު ބާތިލުކޮށް، ކޮމިޝަންގެ ލީގަލް ޓީމުގެ ލަފަޔާ ޚިލާފަށް ދެ ލައްކައަށްވުރެ ގިނަ ރުފިޔާގެ ބަދަލުދިނުން.
- ކުރީގެ ބަންޑާރަނައިބެއްގެ މައްޗަށް ތުހުމަތުކުރެވުނު މައްސަލައެއްގައި ދައުވާ ކުރެވޭ ވަރަށް ހެކި ހުރިނަމަވެސް އެފަރާތުގެ މައްޗަށް ދައުވާނުކޮށް މައްސަލަ ފައިލްކުރުމުގައި އިސް ދައުރެއް އަދާކުރުން.
- އޭސީސީގެ މެންބަރުންނަށް އެހެން ވަޒީފާއެއް އަދާ ނުކުރެވޭއިރު، ލޯފާމެއްގެ އެޓާނީންގެ ތެރޭގައި ހިމެނުން.
މި ތިން މެންބަރުންނަށް އެފަދަ ތުހުމަތުތަކެއް ކޮށްފައިވާއިރު، ކޮމިޓީން ނިންމި ގޮތަށް، މިއަދުގެ ވޯޓުގެ ގަޑީގައި ތިން މެންބަރުން ވަކިކުރުމަށް މަޖިލީހުގެ ރުހުން ހޯދުމަށް ވޯޓަށް އަހާނެއެވެ.
ފާހަގަކޮށްލެވޭ ގޮތުގައި މަޖިލީހުގެ ތަޅުމުގައި ވޯޓަށް އެހުމުގެ ކުރިން އެ ދެ ބޭފުޅުން ވެސް މިއަދު މަގާމުން ވަނީ އިސްތިއުފާދެއްވާފައެވެ.