މިދިޔަ ރިޔާސީ އިންތިޚާބުގައި އިލެކްޝަންސް ކޮމިޝަން (އީސީ)ގެ ޑޭޓާބޭސްއިން މައުލޫމާތު ނަގައިގެން އެޕްލިކޭޝަން ހަދައި، ވަކި ޕާޓީއަކަށް އިންތިޚާބު ކާމިޔާބުކޮށްދޭން މަސައްކަތްކުރުން ފަދަ ބޮޑެތި ތުހުމަތުތަކެއް، އެ ކޮމިޝަންގެ ނައިބު ރައީސް އަލީ ނަޝާތާއި އިތުރު ދެ މެންބަރުންގެ މައްޗަށް ކޮށްފިއެވެ.
ނަޝާތުގެ އިތުރުން އީސީގެ މެންބަރު މުހައްމަދު އާސިފް އަދި މެންބަރު ޑރ. މުހައްމަދު ޒާހިރު ވަކިކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން އިއްޔެ ވަނީ ފާސްކޮށްފައެވެ.
މިމަހުގެ 12ގައި މަގާމުގެ މަސްއޫލިއްޔަތު އަދާނުކުރާ ކަމަށާއި، މަގާމުގައި ހުރެ ގަވާއިދާ ޚިލާފަށް އެތައް ކަމެއް ކޮށްފައިވާކަމުގެ ތުހުމަތުގައި އެ ތިން މެންބަރުންގެ މައްސަލަ މަޖިލީހަށް ވަނީ ހުށަހަޅާފައެވެ.
ކޮމިޓީން އެ މައްސަލަ ނިންމި ގޮތުގެ ރިޕޯޓު، ކޮމިޓީގެ މުގައްރިރު އަދި މާފުށީ ދާއިރާގެ މެންބަރު ހުސައިން ރިޒާ އާދަމް ވަނީ މިއަދު ތަޅުމަށް ހުށަހަޅުއްވާފައެވެ.
އެ ރިޕޯޓުގައި ބުނެފައިވާ ގޮތުގައި ރިޔާސީ އިންތިޚާބުގައި އީސީގެ ޑޭޓާބޭސްއިން މައުލޫމާތު ނަގައިގެން ނަޝާތު ވަނީ އެޕްލިކޭޝަންތައް ހަދައި، އެ އެޕްލިކޭޝަންތައް ވިއްކައި ބައެއް ސިޔާސީ ޕާޓީތަކަށް ދީފައެވެ. އަދި ވަކި ސިޔާސީ ޕާޓީއަކަށް ރިޔާސީ އިންތިޚާބު ކާމިޔާބުކޮށްދިނުމަށް އެ ތިން މެންބަރުން އެކުގައި މަސައްކަތް ކޮށްފައިވާ ކަމަށް ވެސް ރިޕޯޓުގައި ބުނެފައިއެވެ. އަދި ރިޔާސީ އިންތިޚާބުގެ ރީ ރެޖިސްޓްރޭޝަންގައި މަކަރުހަދައި އޮޅުވާލުމުގެ އަމަލުތަކެއް ހިންގާފައިވާ ކަމަށް އެ ރިޕޯޓުގައި ވަނީ ތުހުމަތުކޮށްފައެވެ.
އަދި ވަކި ޕާޓީއެއް އުފެއްދުމަށް ސޮއިކުރި މެންބަރުންގެ ލިސްޓު އޭރު ރައީސް އޮފީހުގެ އިސް ފަރާތަކަށް ފޮނުވައި، ޕާޓީ އުފެއްދުމަށް ހުރަސްއަޅައި ގިނަ މަސައްކަތްތަކެއް ކޮށްފައިވާކަމަށް ވެސް އެ ރިޕޯޓުގައި ބުނެފައިވެއެވެ.
ތިން މެންބަރުން ވަނީ ވަކި ސިޔާސީ ޕާޓީއެއް އުވާލުމުގެ މަގުސަދުގައި ވަގުފޯމު ހެދުމާއި އެ ޕާޓީއަށް 3،000 މެންބަރުން ހަމަވިޔަނުދޭން މަސައްކަތް ކޮށްފައި ކަމަށް ވެސް ތުހުމަތު ކޮށްފައިވެއެވެ. އަދި އީސީގައި ހުރި ދިވެހި ރައްޔިތުންގެ މައުލޫމާތު ވިއްކައިގެން ވެސް އެ ތިން މެންބަރުން ނަފާ ހޯދާފައިވާ ކަމަށް ކަމަށް ރިޕޯޓުގައި ބުނެފައިވެއެވެ.
ކޮމިޓީން ފާހަގަކުރި އިތުރު ކަންތައްތައް:
- ވިޔަފާރިކުރާ ފަރާތަކާ ގުޅިގެން އީސީއަށް ކޮމްޕިއުޓަރު ސިސްޓަމްތަކެއް ވަކި ވިޔަފާރި ކުންފުންޏެއް މެދުވެރިކޮށް ހޯދައި އެނޫންވެސް އެހެން ތަކެތި ވަކި ކުންފުންޏެއްގެ ފަރާތުން ހޯދައި ނަފާ ލިބިގަތުން.
- އީސީގެ މުވައްޒަފުންނާ މުއާމަލާތްކުރުމުގައި އިހުތިރާމް ކުޑަކޮށް، އަދި ބޭއަދަބީ ބަހުން ނަޝާތު މުއާމަލާތްކޮށްފައިވާކަން.
- ތިން މެންބަރުން ކޮމިޝަންގެ މުވައްޒަފުންނާ ވާހަކަދައްކާއިރު، ކޮރަޕްޝަނަކީ މައްސަލައެއް ނޫންކަމަށް ވިދާޅުވާ ކަމަށާއި، ފައިސާއަށްތަކައި ވޯޓު ވިއްކާނެ ކަމަށާއި، އެކަންކަމަކީ މައްސަލައެއް ނޫން ކަމަށް ވިދާޅުވުން.
- ނަޝާތު، އީސީގެ ސީނިއާ ބައެއް މުވައްޒަފުން ކޮންޓްރޯލްކުރައްވައިގެން ގެންގުޅުއްވާ ކަމަށާއި، އެގޮތުން އެ މުވައްޒަފުންނަށް ކެއުމާއި ސައި ދިނުމުގެ އިތުރުން އެކި ގޮތްގޮތުން އެމީހުންނަށް މަންފާ ހޯދައިދިނުމަށް މަސައްކަތްކޮށްފައިވާކަން.
- ވަކި ވިޔަފާރި ކުންފުންޏަކާއެކު ސިއްރު މުއާމަލާތްތަކެއް ކުރައްވާ، އީސިއަށް ބޭނުންވާ އައިޓީ ތަކެތި ހޯދުމަށްފަހު، އެއިން ކޮންމެ މުއާމަލާތަކުން ބޮޑެތި މަންފާ އެ ތިން މެންބަރުން ހޯދާފައިވާކަމަށް.
- އީސީގެ ބައެއް މުވައްޒަފުންނާ ލޯބީގެ ގުޅުން ނަޝާތު ބާއްވާފައިވާކަން. އަދި ބައެއް މުވައްޒަފުންނާ ޒާތީ ގޮތެއް ބަހައްޓަވައި، މުވައްޒަފުންގެ މަސައްކަތަށް ހުރަސްއަޅާފައިވާ ކަމަށް.
- މުވައްޒަފުންނާ ބޭއަދަބީކޮށް ވާހަކަދެއްކުމާއި ވަޒީފާގެ ބިރު ދެއްކުން.
- ކޮމިޝަނަށް ހާޒިރުނުވާ ދުވަސްތަކުގައި ވެސް ހާޒިރުވީ ކަމަށް ގަސްތުގައި ނުބައިކޮށް ގަޑިޖެއްސެވުން.
- ސިޔާސީ އެކި ފަރާތްތަކާ ގާތް ގުޅުން ބާއްވައި ކުރީގެ ރައީސް އޮފީހުގެ މުވައްޒަފަކާ ގިނަގިނައިން ނަޝާތު ބައްދަލުކުރެއްވާފައިވާކަން.
މި ތިން މެންބަރުންނަށް އެފަދަ ތުހުމަތުތަކެއް ކޮށްފައިވާއިރު، ކޮމިޓީން ނިންމި ގޮތަށް، މިއަދުގެ ވޯޓުގެ ގަޑީގައި ތިން މެންބަރުން ވަކިކުރުމަށް މަޖިލީހުގެ ރުހުން ހޯދުމަށް ވޯޓަށް އަހާނެއެވެ.
އީސީގެ ތިން މެންބަރުން ވަކިކުރަން މަޖިލީހުގެ މެޖޯރިޓީ އޮތް ޕީއެންސީއިން މަސައްކަތް ކުރަމުން އަންނައިރު އެކޮމިޝަންގެ ރައީސްއަކަށް ހުންނެވި ފުއާދު ތައުފީގުގެ މެންބަރު ކަމުގެ މުއްދަތު މިދިޔަ ހޮނިހިރު ދުވަހަށް ވަނީ ހަމަވެފައެވެ. އެއާއެކު ތައިލޭންޑުން ރާއްޖެއަށް ކަނޑައަޅުއްވާފައި ހުންނަވާ ސަފީރުގެ މަގާމަށް ފުއާދު އައްޔަން ކުރަން މިއަދު ރައީސް ޑރ. މުޙައްމަދު މުއިއްޒު ވަނީ މަޖިލީހަށް ނަން ފޮނުއްވައިފައެވެ.