ދެހާސް އަށާވީސް ވަނަ އަހަރު އޮންނަ ރިޔާސީ އިންތިޚާބުގައި ވާދަކުރެއްވުމާ މެދު ގޮތެއް ނިންމަން އަދި އަވަސް ކަމަށާއި، ޕާޓީގެ ރައީސްގެ ހައިސިއްޔަތުން މިވަގުތު މުޅި 'ފޯކަސް' ހުރީ މި ސަރުކާރު ޖަވާބުދާރީކުރުވުމަށް ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު މިރޭ ވިދާޅުވެއްޖެއެވެ.
އެ ޕާޓީގެ ޗެއާޕާސަން ފައްޔާޒު އިސްމާއީލް އިއްޔެ ވަނީ 2028ވަނަ އަހަރު އޮންނަ ރިޔާސީ އިންތިޚާބަށް އެމްޑީޕީގެ ޓިކެޓް ހޯއްދެވުމަށް ޕްރައިމަރީގައި ވާދަ ކުރައްވާނެކަން ހާމަކުރައްވާފައެވެ.
ރާއްޖެ ޓީވީގެ ޕްރޮގްރާމެއްގައި މިއަދު ވަނީ ޝާހިދުގެ ވެސް އެފަދަ ޝައުގުވެރިކަމެއް ހުންނަވާތޯ ސުވާލު ކޮށްފައެވެ. ނަމަވެސް އެ ސުވާލަށް ޝާހިދު ސީދާ ޖަވާބެއް ދެއްވާފައެއް ނުވެއެވެ.
މި ދައްކަނީ 2028ގެ ވާހަކަ ކަން ފާހަގަކޮށް ޝާހިދު ވިދާޅުވީ، މިއަދު އޮތް ސަރުކާރުގެ ހުދުމުޚްތާރުކަމާއި، ރާއްޖެއަށް މި ސަރުކާރުގެ ސަބަބުން ލިބެމުންދާ ގެއްލުންތަކުގެ ވާހަކަ މަޑުޖައްސާލައި، 2028ގައި އޮތް ކަމަކާ ދިމާލަށް މިސްރާބު ހިފައިފިނަމަ ރާއްޖެއަށް ލިބޭނެ ގެއްލުން އިންތިހާއަށް ބޮޑުވާނެ ކަމަށެވެ.
"އަޅުގަނޑު ގަބޫލުކުރާ ގޮތުގައި މިވަގުތު އަޅުގަނޑުމެން ޕާޓީގެ ރައީސްގެ ހައިސިއްޔަތުން އަޅުގަނޑުގެ މުޅި ފޯކަސްއަކީ މި ސަރުކާރު ޖަވާބުދާރީކުރުވުން،" ޝާހިދު ވިދާޅުވިއެވެ.
ޝާހިދު ވިދާޅުވީ މި ސަރުކާރުން ރައްޔިތުންނަށް ގެއްލުންދީ، ރާއްޖޭގެ އިގުތިޞާދު ހަލާކުކޮށްލުމަށް މިސްރާބު ޖަހާފައިވާއިރު، އެ މިސްރާބު ތެދުކުރުމަށް ކުރެވެން ހުރި ހުރިހާ މަސައްކަތެއް ކުރުން އެއީ ޕާޓީގެ ރައީސްގެ ހައިސިއްޔަތުން ކުރަންބޭނުންވާ ކަމެއް ކަމަށެވެ.
"ހަމައެއާއެކު 2026ގަ އެބައޮވޭ ލޯކަލް ކައުންސިލް އިންތިޚާބު. މިވަގުތަކީ އަޅުގަނޑުމެންގެ އެތެރޭގަ 2028ގަ އޮންނަ ކަމެއްގަ އަޅުގަނޑު ހަމަ ގައިމުވެސް އެދިމާލަށް އަމާޒު ހިފައިގެން ކަމެއް ކުރާނެ ދަނޑިވަޅެއް ނޫން. އަޅުގަނޑުގެ މުޅި މިސްރާބު ހުންނާނީ 2026ގަ މުޅި ރާއްޖެ ލޯކަލް ކައުންސިލް އިންތިޚާބުގައި ރީނދޫކޮށްލުމަށް،" ޝާހިދު ވިދާޅުވިއެވެ.
ޝާހިދު ވިދާޅުވީ ރައްޔިތުން މިއަދު އެދިއެދި ތިބި ޑިމޮކްރެޓިކް ނިޒާމު ރާއްޖެއަށް ދެވޭނެ ކަމުގެ އުންމީދު ރައްޔިތުންނަށް ލިބޭނެ މަގަށް ކަންތައްތައް ގެންދިޔުމަށް މަސައްކަތްކުރައްވާނެ ކަމަށެވެ.
"އެއްވެސް ހާލެއްގަ އަޅުގަނޑު ގަސްތެއް ނުކުރަން 2028ގަ އޮންނަ ކަމެއްގަ އަޅުގަނޑު ހުންނާނި ކޮންތަނެއްގަތޯ މިއަދު ނިންމާކަށް،" ޝާހިދު ވިދާޅުވިއެވެ.
އެމްޑީޕީ ގައުމީ މަޖިލީހުގެ ވަޓްސްއެޕް ގުރޫޕަށް އިއްޔެ 15:53ގައި ފައްޔާޒު ފޮނުއްވި މެސެޖެއްގައި ރިޔާސީ ޕްރައިމަރީގައި ވާދަ ކުރައްވާނެކަން އިއުލާން ކުރެއްވުމަށްފަހު އޭނާއަށް ތާއީދު ކޮށްދެއްވުމަށް ވަނީ އެދިވަޑައިގެންފައެވެ.
ނޮވެމްބަރު 11ވަނަ ދުވަހު ރާއްޖެ ޓީވީއަށް ދެއްވި އިންޓަވިއުއެއްގައި ކުރީގެ ރައީސް އިބްރާހީމް މުޙައްމަދު ޞާލިޙާ ވެސް, 2028ވަނަ އަހަރު އިންތިޚާބުގައި ވާދަކުރައްވާނަންތޯ ސުވާލު ކުރުމުން އެމަނިކުފާނު އެކަމަށް ސާފު ޖަވާބެއް ނުދެއްވިއެވެ.
ނަމަވެސް ވިދާޅުވީ އެމަނިކުފާނުގެ ސިޔާސީ ހަޔާތާއި ކުރިމަގާ ބެހޭގޮތުން ޕާޓީގެ އިސްވެރިންނާ ވާހަކަދައްކަވާފައި ވާނެ ކަމަށެވެ. އަދި އެމަނިކުފާނުގެ ނިންމުން އެއްވެސް ޝައްކެއް ނެތް މިންވަރަށް މިހާރު ޕާޓީގެ ލީޑާޝިޕަށް އެނގިވަޑައިގަންނަވާނެ ކަމަށް ވެސް އެމަނިކުފާނު ވިދާޅުވިއެވެ.
އެމްޑީޕީގެ ލީޑާޝިޕްގެ އިސްވެރިންގެ ތެރޭގައި ފަސް ބޭފުޅަކު ރިޔާސީ އިންތިޚާބުގައި ވާދަކުރައްވަން ޝައުގުވެރިކަން ފާޅުކުރައްވާ ކަމަށް އެމަނިކުފާނު ވިދާޅުވިއެވެ.
އެ ފަސް ބޭފުޅުންގެ ކިބައިން ޞާލިޙު އެދިވަޑައިގަތީ އަމިއްލަ ޝައުގުވެރިކަން އެކަމުގައި އޮތް ނަމަވެސް ޕާޓީއާއެކު ކުރިއަށް ވަޑައިގަތުމަށެވެ.
އެމްޑީޕީ ޓިކެޓަށް ވާދަ ކުރައްވާނެކަން އެހެން ބޭފުޅަކު އަދި އިއުލާން ނުކުރި ނަމަވެސް ރައީސް ޞާލިޙާއި ޝާހިދުގެ އިތުރުން މާލޭގެ މޭޔަރު އާދަމް އާޒިމް އެކަމަށް ޝައުގުވެރިވާ ކަމަށް ތުންތުންމަތިން ވާހަކަ ދެކެވެއެވެ. ނަމަވެސް މިހާތަނަށް އޭގެ ތެރެއިން އެއްވެސް ބޭފުޅަކު އެކަން ރަސްމީކޮށް ހާމައެއް ނުކުރައްވައެވެ.
ކުރިއަށް އޮތް ރިޔާސީ އިންތިޚާބުގައި ވާދަ ކުރައްވާނެކަން ކުރީގެ ރައީސް ޔާމީން އަބްދުލްގައްޔޫމް ވެސް ވަނީ އިއުލާން ކުރައްވައިފައެވެ.