އިންޑިއާއިން ރާއްޖެއަށް ޒަރޫރީ ބައެއް ތަކެތި ފޮނުވުމަށް ހަދައިފައިވާ އެއްބަސްވުމުގެ ދަށުން ރާއްޖެއަށް އެކްސްޕޯޓުކުރާ ހަކުރު ލަންކާއަށް ޑައިވާޓުކުރާ ކަމުގެ ތުހުމަތުގައި އެގައުމުން ތަހުގީގެއް ފަށައިފިއެވެ.
އިންޑިއާ ޝިޕިން ނިއުސްއިން ރިޕޯޓުކޮށްފައިވާ ގޮތުގައި، އެގައުމުން އެކްސްޕޯޓް ކުރާ މުދަލާ ގުޅުންހުރި ކަންތައްތައް ބަލާ ޑައިރެކްޓަރޭޓް-ޖެނެރަލް އޮފް ފޮރިން ޓްރޭޑް (ޑީޖީއެފްޓީ)އިން ބަލަނީ، ރާއްޖެއަށް އެކްސްޕޯޓްކުރުމަށް ކަނޑައަޅާފައިވާ 64,494.33 ޓަނު ހަކުރުގެ ތެރެއިން ބައެއް ނަހަމަގޮތުގައި ބޭނުންކޮށްފައިވާ ކަމުގެ ތުހުމަތުވާ މައްސަލައެކެވެ. މި މައްސަލައިގައި ޑީޖީއެފްޓީން ތަހުގީގެއް ފަށައި، ރާއްޖެއަށް ހަކުރު އެކްސްޕޯޓް ކުރުން ހުއްޓުވައިފައިވާ ކަމަށް ވެސް ވިޔަފާރި މަސްދަރުތަކާ ހަވާލާދީ އެ ނޫހުން ބުނެފައިވެއެވެ.
މި މަސްދަރުތަކުން ބުނާ ގޮތުގައި، ރާއްޖެއަށް އެކްސްޕޯޓްކުރުމަށް ހަމަޖެހިފައިވާ ގާތްގަނޑަކަށް ހަތް ޕާރުސަލްގެ ހަކުރު، އެހެން ތަނަކަށް ޑައިވާޓްކުރަން އުޅުނު ކަމަށް ބެލެވިގެން އެ މުދާ ގެންދާ އިންޑިއާގެ ނާވާ ޝެވާ ބަނދަރުން އެ ތަކެތި ވަނީ ހިފަހައްޓައިފައެވެ.
އެހެން ރިޕޯޓަކާ ހަވާލާދީ އެ ނޫހުން ބުނެފައިވާ ގޮތުން، މި މައްސަލައިގެ އެލާޓެއް ލިބިފައިވަނިކޮށް، ލަންކާއަށް ޑައިވާޓްކުރި 70 ކޮންޓެއިނަރުގެ ހަކުރު އެ ގައުމުގެ ކަސްޓަމުންވަނީ ހިފަހައްޓައިފައެވެ.
މި މައްސަލަ ތަހުގީގު ކުރަން ފެށުމާއެކު، ރާއްޖެއަށް ހަކުރު އެކްސްޕޯޓް ކުރުން ވަނީ ގާތްގަނޑަކަށް މުޅިން ހުއްޓިފައި ކަމަށް އެ ނޫހުން ބުނެއެވެ. ވިޔަފާރީގެ ދާއިރާގެ މަސްދަރުތަކުން ބުނާ ގޮތުގައި ސްރީލަންކާގެ އޮފިޝަލުން ވަނީ ކޮލަމްބޯގައި ވެސް ކްލިއަރަންސް ދިނުން ހުއްޓާލައި، އެ ގައުމުގައި ހަކުރު ގަންނަ ފަރާތްތަކާ ދެކޮޅަށް ވަކި ތަހުގީގެއް ފަށާފައެވެ.
އިންޑިއާ ޝިޕިން ނިއުސްއިން ބުނީ އެ މުދާ ކަސްޓަމްސްގެ ބެލުމުގެ ދަށުން ދޫކޮށްލުމާއެކު، ބިލް އޮފް ލޭޑިން ބަދަލުކުރަނީ މުދާ ބަދަލުކުރަން ބޭނުންވާ މަންޒިލަށް ކަމަށެވެ. އަދި އިންވޮއިސްވެސް ބަދަލުކޮށް، ބައެއް ޝިޕްމަންޓްތައް އިންޑިއާގެ ނާވާ ޝެވާ ބަނދަރުން މެލޭޝިއާގެ ޕޯޓް ކްލާން އަށްވެސް ގޮސްފައި އެބަހުރި ކަމަށް ބުނެފައިވެއެވެ.
މިދިޔަ އޭޕްރިލް މަހު، ޑީޖީއެފްޓީއިން ވަނީ ދިވެހިރާއްޖެއަށް ހަނޑޫ، ފުށް، ހަކުރު، ބިސް، އަލުވި، ލޮނުމެދު، އަދި ހިލައާއި ހިލަވެލި އެކްސްޕޯޓްކުރުމާ ގުޅޭ ޚާއްސަ އެއްބަސްވުން އައުކޮށްފައެވެ.
މިދިޔަ އަހަރާއި މި އަހަރުގެ ތެރޭގައި ވެސް އިންޑިއާގައި ހަކުރު އުފެއްދުން ދަށްވި ނަމަވެސް، ރާއްޖެ ފަދަ މަދު ގައުމުތަކަށް ލިމިޓުކޮށްގެންވަނީ ހަކުރު އެކްސްޕޯޓުކޮށްފައެވެ.
އޭގެ ފަހުން މިދިޔަ އޭޕްރިލް މަހުގެ 15ގައި، ޑީޖީއެފްޓީއިން ބުނެފައިވަނީ ދެ ގައުމުގެ އެއްބަސްވުމުގެ ދަށުން މުދާ އެކްސްޕޯޓް ކުރުމަށް ހުއްދަދެވޭނީ މުންދްރާ، ޓުޓިކޮރިން އަދި ނާވާ ޝެވާގެ ބަނދަރުތަކުގެ އިތުރުން އިންލޭންޑް ކޮންޓެއިނަރު ޑިޕޯ، ތުގްލަކްއާބާދު މެދުވެރިކޮށް އެކަނި ކަމަށެވެ.