ތޫނު އެއްޗަކުން މީހަކަށް ހަމަލާ ދޭން އުޅެނިކޮށް، އެކަން ހުއްޓުވަން މަސައްކަތް ކުރި ފުލުހަކަށް ހަމަލާ ދިން ކަމުގެ ތުހުމަތުގައި ހުޅުމާލޭން މިއަދު މީހަކު ހައްޔަރުކޮށްފިއެވެ.
ފުލުހުން މީޑިއާތަކަށް ފޮނުވި މެސެޖެއްގައި ބުނީ، ހުޅުމާލޭ ފުރަތަމަ ފިޔަވަހީގައި ތޫނު އެއްޗަކުން މީހަކަށް ހަމަލާ ދޭން އުޅުން ކަމުގެ ތުހުމަތުގައި މީހަކު 18:30 ހާއިރު ހައްޔަރުކޮށްފައިވާ ކަމަށެވެ.
އެ ހަމަލާ ދޭން އުޅުނު މީހާ ހުއްޓުވަން އުޅުނު ފުލުހަކަށް ވެސް ތޫނު އެއްޗެއް ބޭނުންކޮށްގެން ހަމަލާ ދިނުމަށް މަސައްކަތް ކޮށްފައިވާ ކަމަށް ފުލުހުން ވަނީ ބުނެފައެވެ.
މި މައްސަލާގައި ހައްޔަރުކޮށްފައި ވަނީ އުމުރުން 33 އަހަރުގެ ދިވެހި ފިރިހެނެކެވެ.
މި މައްސަލައާ ގުޅުން ހުރި ވީޑިއޯއެއް ވެސް ސޯޝަލް މިޑިއާގައި ވަނީ ދައުރުވެފައެވެ. އެ ވީޑިއޯއިން ދެ ފުލުހަކު މީހަކު ހައްޔަރުކޮށްގެން އުޅޭ މަންޒަރު ފެނެއެވެ. އަދި، އެ ސަރަހައްދުގައި ގިނަ އަދަދަކަށް މީހުން ވެސް އެ ވަގުތު ހަރަކާތްތެރިވާ މަންޒަރު ފެނެއެވެ.