ގާނޫނު އަސާސީއަށް މިއަދު އިސްލާހު ގެނައި ގޮތުން ރައްޔިތުންގެ ބާރު ކަނޑުވައިލެވޭ ކަމަށް ވިދާޅުވެ، އެ މައްސަލަ ކޯޓަށް ހުށަޅަން ކުރީގެ ބަންޑާރަ ނައިބު ފާތިމަތު ދިޔާނާ ސައީދު ގޮވައިލައްވައިފިއެވެ.
ރައްޔިތުންގެ މަޖިލީހަށް ސަރުކާރުން މިއަދު ހުށަހެޅި ބިލުގައި ވަނީ މަޖިލީހުގެ މެންބަރުން ސިޔާސީ ޕާޓީން ވަކިވުމުން ނުވަތަ އެހެން ޕާޓީއަކަށް ބަދަލު ވުމުން ގޮނޑި ގެއްލޭ ގޮތަށް ގާނޫނު އިސްލާހު ކުރަން ހުށަހަޅައިފައެވެ. އަދި ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށާއި ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ވެސް ބިލުގައި ހިމަނައިފައިވެއެވެ.
ގާނޫނުއަސާސީއަށް އިސްލާހެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައިގެ އަޣުލަބިއްޔަތުން ފާސްކުރާ ގާނޫނަކުންނެވެ. އެއީ، 70 މެންބަރުންނެވެ.
ވެރިކަން ކުރާ ޕީއެންސީގެ ސުޕަމެޖޯރިޓީ އޮންނަ މަޖިލީހުން މިއަދު މުޅި މަޖިލީހުގެ ކޮމިޓީގައި އެ ބިލް ފާސްކުރުމަށް ފަހު، ހަވީރު އޮތް ޖަލްސާއެއްގައި 78 މެންބަރުންގެ އަޣުލަބިއްޔަތުން ވަނީ ފާސްކޮށްފައެވެ.
އެއަށްފަހު ރައީސް ޑރ. މުޙައްމަދު މުއިއްޒު ވަނީ އެ ބިލް ތަސްދީގުކުރައްވައި، މިއަދުން ފެށިގެން އަމަލުކުރާ ގޮތަށް ގާނޫނު އަސާސީއަށް ބަދަލު ގެންނަވައިފައެވެ.
އެ ބަދަލާ ގުޅޭ ގޮތުން ފޭސްބުކްގައި ކުރެއްވި ޕޯސްޓެއްގައި ދިޔާނާ ވިދާޅުވީ ގާނޫނު އަސާސީއަކީ އެކަށޭނަ އިޖުރާއަތެއް ނެތި ހިތުހުރި ގޮތަކަށް ބަދުލުވާ އެއްޗަކަށްވިޔަ ދީގެން ނުވާނެ ކަމަށެވެ. އަދި އެ ބަދަލާއެކު ރައްޔިތުންނަކީ އަގެއް ނެތް، ބާރެއް ނެތް ބަޔަކަށް ހެދުމަށް ފުރުސަތު ދެވޭ ކަމަށް ވެސް އޭޏާ ވިދާޅުވިއެވެ.
"އަޅުގަނޑު ގޮވާލަން ބާ ކައުންސިލަށް މި ބަދަލު ކޯޓުގައި ޗެލެންޖުކުރަން، ގާނޫނުގެ ވެރިކަން ނަގަހައްޓަން ކުރެވެން އޮތް އެންމެހާ މަސައްކަތްތައް ކުރަން،" ދިޔާނާ ލިޔުއްވާފައިވެއެވެ.
އެ މައްސަލަ ކޯޓަށް ހުށަހަޅާއިރު ފާހަގަކުރެވޭނެ ބައެއް ކަންތައްތައް ވެސް ދިޔާނާ ވިދާޅުވިއެވެ. އެއީ:
1/ ގާނޫނު އަސާސީ އިސްލާހު ކުރެވޭނީ ބިލަކުން؛ ބިލާ މެދު އަމަލުކުރާނެ އިޖުރާއަތު މަޖިލީހުގެ ގަވައިދުގައި ބަޔާންކޮށްފައިވޭ. އެ އިޖުރާއަތަށް ބެލުމުން ވިސްނުމާއި މަޝްވަރާއާއި ދިރާސާއަށް ޓަކައި އެއް މަރުހަލާއާއި އަނެއް މަރުހަލާއާ ދެމެދު އެކަށޭނަ ވަގުތު އޮތުން ގަވައިދު ތަސައްވުރުކުރާކަން އެނގޭ
2/ ގާނޫނު އަސާސީގެ ދެވަނަ މާއްދާގައި ދިވެހި ރާއްޖެއަކީ ޑިމޮކްރެޓިކް ދައުލަތެއް ކަމަށް ބުނޭ
3/ ގާނޫނު އަސާސީގެ ހަތަރު ވަނަ މާއްދާގައި ދައުލަތުގެ އެންމެހާ ބާރުތައް ފެށިގެން އަންނަނީ ރައްޔިތުންގެ ކިބައިން ކަމަށާއި ދެމި އޮންނާނީ ރައްޔިތުންގެ ކިބައިގައި ކަމަށް ބުނޭ
4/ ގާނޫނު އަސާސީގެ 27 ވަނަ މާއްދާއިން ޚިޔާލު ފާޅުކުރުމުގެ މިނިވަންކަން ކަށަވަރުކޮށްދޭ. މި މިނިވަންކަމުގެ އަނެއް ފުށުގައި އޮތީ ޚިޔާލު ފާޅުކުރުން ފަހިކުރަން ދައުލަތުގެ މައްޗަށް އޮތް އީޖާބީ އިލްތިޒާމް. ގާނޫނު އަސާސީއަށް ބަދަލުގެނައުން ފަދަ އަސާސީ ކަމެއްގައި ޚިޔާލު ފާޅުކުރަން ފުރުސަތު ނުދިނުން އެއީ އެ މާއްދާއާ ޚިލާފުވުން
5/ ގާނޫނު އަސާސީއަކީ ރައްޔިތުންނާ ވެވުނު ސިޔާސީ އަގުދުގެ އެންމެ އަސާސީ އިންތިޒާމް ބަޔާންކުރާ މަސްދަރު، ރައްޔިތުންގެ މަޝްވަރާ ނެތި އެއަށް ގެނެވޭ ބަދަލު ގާނޫނީ ގޮތުން ބަލައި ނުގަނެވޭނެ
އެ ބިލް މަޖިލީހުން ފާސްކުރުމުގެ ކުރިން ބާ ކައުންސިލުން ނެރުނު ބަޔާނެއްގައި، އިސްލާހުތަކަށް ޚިޔާލު ހުށަހެޅުމުގެ ފުރުސަތު ދިނުމަށް މަޖިލީހުގައި އެދިފައިވެއެވެ. އެގޮތުން އެ ބިލާ ގުޅޭގޮތުން ކައުންސިލްގެ އާންމު މެންބަރުންނާއި ގާނޫނީ ދާއިރާގެ އެކި ފަރާތްތަކުގެ ކަންބޮޑުވުން ހުރުމުން އެ ބިލާ ގުޅިގެން އެ ކައުންސިލްގެ އާންމު މެންބަރުންގެ ޚިޔާލު މަޖިލީހަށް ހުށަހެޅުމަކީ މުހިންމު ކަމެއް ކަމުގައި ދެކޭ ކަމަށް ބަޔާނުގައި ބުނެފައިނުވެއެވެ.
އަވަސް އަރުވާލައިގެން އެ ބިލް ފާސްކުރާތީ އިދިކޮޅު އެމްޑީޕީން ވެސް ކަންބޮޑުވުން ފާޅުކޮށްފައިވެއެވެ. އެގޮތުން އެ ޕާޓީން ވަނީ ގާނޫނުއަސާސީއަށް ގެންނަ އިސްލާހުތަކުގެ ސަބަބުން، ޚާއްސަކޮށް މެންބަރުންގެ ގޮނޑި ގެއްލޭ އިސްލާހުގެ ސަބަބުން ގާނޫނުއަސާސީގެ ބާރު ކެނޑޭ ކަމަށް ބުނެފައެވެ.
އެ ބިލުގެ ބަހުސް ކުރިއަށްދިޔައިރު އެމްޑީޕީގެ ސަޕޯޓަރުން މަޖިލިސް ކައިރީގައި މުޒާހަރާކުރިއެވެ. އަދި ބިލް ފާސްކުރަން ޖަލްސާ ކުރިއަށްދިޔައިރު އެ ޕާޓީގެ މެންބަރުން 'ގާނޫނު އަސާސީގެ ދިފާއުގައި' ކަމަށް ލިޔެފައިވާ ބެނާއެއް ހިފައިގެން ތަޅުމުގައި އިހުތިޖާޖު ވެސް ކުރިއެވެ.