އިދިކޮޅު އެމްޑީޕީއަކީ ދައުލަތުން ފައިސާދީގެން ހިންގާ މުއައްސަސާއެއް ކަމަށްބުނެ، އެ ޕާޓީން ހަގީގަތް އޮޅޭގޮތަށް މައުލޫމާތު ފަތުރާތީ ސަރުކާރު ހިންގާ ޕީއެންސީން މިއަދު އެ ކަން ކުށްވެރިކޮށްފިއެވެ.
ޕީއެންސީން މިއަދު ނެރުނު ބަޔާނެއްގައިވަނީ، ޒިންމާދާރު އިދިކޮޅު ސިޔާސީ ޕާޓީއެއްގެ މަގާމު އަދާކުރަންޖެހޭ އެމްޑީޕީއަކީ ދައުލަތުން ފައިސާދީގެން ހިންގާ މުއައްސަސާއެއް ކަމަށްވާއިރު، ހަގީގަތް އޮޅޭގޮތަށް އެ ޕާޓީން މައުލޫމާތު ފެތުރުމަކީ ބަލައިގަނެވޭނެ ކަމެއް ނޫން ކަމަށެވެ. އަދި ދޮގު މައުލޫމާތު ފެތުރުން ޕީއެންސީން ވަނީ ކުށްވެރިކޮށްފައެވެ.
ޕީއެންސީގެ ބަޔާނުގައިވަނީ ސަރުކާރަށް އަހަރުދުވަސްވީއިރު، ކުރެވުނު ބައެއް މުހިންމު މަސައްކަތްތައް ވެސް ފާހަގަކޮށްފައެވެ. ޕީއެންސީން ބުނީ މިދިޔަ އަހަރުދުވަހުގެ ތެރޭގައި ސަރުކާރު ހިންގާފައިވަނީ ޒިންމާދާރުކަމާއެކު ރައްޔިތުންގެ މާލިއްޔަތަށް އަމާނާތްތެރިކަމާއެކު، ހާމަކަން ބޮޑު ގޮތެއްގައި ރައްޔިތުންނަށް ހުރިހާ މައުލޫމާތެއް ފޯރުކޮށްދީގެން ކަމަށެވެ.
ފާއިތުވި ތިން އަހަރު ދައުލަތުގެ ޚަރަދުތައް އެވަރެޖުކޮށް އަހަރަކަށް 15 ޕަސަންޓު އިތުރުވަމުންދިޔަ ނަމަވެސް މި އަހަރު ދައުލަތުގެ ޚަރަދުތައް އިތުރުވީ 2.5 ޕަސަންޓު ކަމަށް އެ ބަޔާނުގައިވެއެވެ.
ޚަރަދުކުޑަ ކުރުމުގެ ނަތީޖާއެއްގެ ގޮތުން ބަޖެޓުގެ ޑެފިސިޓު ކުޑަކުރެވިފައިވާކަމާއި ޖުމްލަ ބަޖެޓު ޑެފިސިޓު 378 މިލިއަން ރުފިޔާއިން ކުޑަކުރެވިފައިވާކަން ވެސް އެ ބަޔާނުގައި އޮތީ ފާހަގަ ކޮށްފައެވެ.
ކޮންމެ ހަފުތާއަކު އެއްފަހަރު ދައުލަތުގެ ޚަރަދުބަރަދާއި އާމްދަނީގެ ތަފުސީލުތައް މިހާރު ފިނޭންސް މިނިސްޓްރީން އާންމުކުރެއެވެ. އެ ކަން ނުކުރެވި ދުވަސްތަކެއް ދިޔައީ ކުރީ ސަރުކާރުން ބޭރުގެ ފަރާތްތަކުގެ އެހީގައި ހިންގި މަޝްރޫއުތަކުގެ ޚަރަދުތައް ރެކޯޑުނުކޮށް މި އަހަރުގެ ޚަރަދުތަކުގެ ތެރޭގައި ހިމެނުމުން ކުރިމަތިވި މައްސަލަތައް ހައްލު ކުރުމުގެ ގޮތުން ކަމަށް ސަރުކާރުން ބުނެއެވެ.
މީގެ އިތުރުން ވެސް މި ސަރުކާރުން މައުލޫމާތު ލިބިގަތުމުގެ ހައްގަށް އިހުމާލުވެފައިނުވާނެކަން ތަފާސްހިސާބުތަކުން ފެންނަން އެބަހުރިކަމަށް އެ ބަޔާނުގައިވެއެވެ.
އެ ގޮތުން ރައީސް އޮފީހާއި މިނިސްޓްރީތަކުގެ އިތުރުން، ކުންފުނިތަކަށް ހުށަހެޅުނު ރައިޓް ޓު އިންފޮމޭޝަން (އާރްޓީއައި)ތަކުގެ ތެރެއިން ހުރިހާ އާރްތީއައިއަކަށް ވެސް ޖަވާބު ދެމުން އަންނަ ކަމަށް ބުނެފައިވެއެވެ. އަދި މިދިޔަ ސަރުކާރުގައި ދައުލަތުގެ ކުންފުނިތަކުން އެއްވެސް އާރްޓީއައިއަކަށް ޖަވާބުދީފައެއް ނެތް ކަމަށް ޕީއެންސީން ވަނީ ބުނެފައެވެ.
ފާއިތުވި އަހަރުގެ ތެރޭގައި 70އަށްވުރެ ގިނަ ނޫސްވެރިންގެ ބައްދަލުވުން ބާއްވައި، 700އަށްވުރެ ގިނަ ފަހަރު މިނިސްޓަރުން އެކިއެކި މީޑިއާތަކަށް މައުލޫމާތު ދެއްވާފައިވާކަން ރައީސް ޑރ. މުހައްމަދު މުއިއްޒު މީގެ ކުރިންވަނީ ހާމަކުރައްވައިފައެވެ. އަދި އެ މުއްދަތުގައި އެއްވެސް މީޑިއާއަކާމެދު ފިޔަވަޅު އަޅައި ދަތިކުރުމަށް އެއްވެސް ކަމެއް ކޮށްފައިނުވާއިރު، ޕީއެންސީގެ ބަޔާނުގައި އެ ކަން ފާހަގަކޮށްފައިވެއެވެ.
އަދި ރާއްޖޭގެ ތާރީޚުގައި ފުރަތަމަ ފަހަރަށް ކެބިނެޓުން ނިންމާ ނިންމުންތައް އާންމުންނަށް ފެންނާނެހެން އާންމުކުރަން ފެށީ މި ސަރުކާރުންކަން ވެސް ވަނީ ފާހަގަކޮށްފައެވެ. އެ ގޮތުން މި އަހަރުގެ މާޗުން ފެށިގެން ކެބިނެޓުގެ ކޮންމެ ނިންމުމެއް އެ ކަމަށް ޚާއްސަ ވެބްސައިޓެއްގައި އަންނަނީ އަދާހަމަކޮށް ޝާއިއުކުރަމުންނެވެ.
ސަރުކާރަށް އަހަރުދުވަސްވީއިރު، އިދިކޮޅު ފަރާތްތަކުން އެންމެ ބޮޑަށް ކަންބޮޑުވުން ފާޅުކުރަނީ، ރައްޔިތުންނަށް ލިބިދީފައިވާ އަސާސީ ހައްގުތައް ސަރުކާރުން ނިގުޅައިގަންނަމުންދާ ކަމަށް ބުނެއެވެ.