ވައިގެ މަގުންނާއި ކަނޑު މަގުުން މުދާ އެއްތަނުން އަނެއް ތަނަށް އުފުލައިދޭ ސީ-ޓު-އެއާ ކާގޯގެ ޚިދުމަތުން މިހާތަނަށް ތިން މިލިއަނަށް ވުރެ ގިނަ ޑޮލަރު ލިބިފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ސީއީއޯ މުހައްމަދު ވަޖީހު އިބްރާހީމް އިއްޔެ ވިދާޅުވެއްޖެއެވެ.
ވަޖީހު ފޭސްބުކްގައި ކުރެއްވި ޕޯސްޓެއްގައި ވިދާޅުވީ، މި ސަރުކާރުގައި ރާއްޖޭގެ އިގްތިޞާދު ހަރުދަނާކުރުމަށް ފެށި މަސައްކަތްތަކުގެ ތެރެއިން ސީ-ޓު-އެއާ ކާގޯގެ ޚިދުމަތް ވަރަށް ބާރަށް ފުޅާ ވަމުން އަންނަ ކަމަށެވެ.
އެގޮތުން، މެއި މަހު ފެށި މި ޚިދުމަތުން މިހާތަނަށް ތިން މިލިއަނަށް ވުރެ ގިނަ އެމެރިކާ ޑޮލަރު ރާއްޖޭގެ އިގްތިސާދަށް ލިބިފައިވާ ކަމަށާއި މިއީ އިގްތިޞާދަށް ބޮޑު މަންފާއެއް ކުރާނެ ސިނާއަތަކަށް ހެދުމަށް މަސައްކަތް ކުރަމުން އަންނަ ކަމަށް ވަޖީހު ވިދާޅުވިއެވެ.
އޭނާ ވިދާޅުވީ މިހާތަނަށް ކަނޑު މަގުން ރާއްޖެ އައި 210 ކޮންޓެއިނަރުން 1،008،000 ކިލޯގެ މުދާ ދުނިޔޭގެ އެކި ގައުމުތަކަށް ވައިގެ މަގުން ފޮނުވާފައިވާ ކަމަށެވެ.
ވަޖީހު ވިދާޅުވީ، އެ މުދާ ރާއްޖޭން ބޭރަށް ގެންދަން 11 އެއާލައިނަކުން ބައިވެރިވެފައިވާ ކަމަށާއި މުދާ ފޮނުވޭ ގައުމުތަކުގެ ތެރޭގައި އެމެރިކާއާއި ކެނެޑާއާއި އިނގިރޭސި ވިލާތުގެ އިތުރުން ޔޫރަޕްގެ ގައުމުތައް ހިމެނޭ ކަމަށެވެ.
މީގެއިތުރުން، މިދިޔަ އަހަރާ އަޅައިބަލާއިރު ރާއްޖެއަށް އައި ކާގޯގެ އަދަދު 16 ޕަސެންޓަށް އިތުރުވެފައިވާ ކަމަށް އެމްޕީއެލްގެ ހިސާބުތަކުން ދައްކާފައިވާކަން އޭނާ ފާހަގަކުރެއްވިއެވެ. އެއީ ކޮންޓެއިނަޒް ކާގޯގެ ނުވަ އިންސައްތަ އާއި ޖެނެރަލް ކާގޯގެ 22 އިންސައްތަ އިތުރުވުމެއް ކަމަށް އޭނާ ވިދާޅުވެފައިވެއެވެ.
އެމްޕީއެލްއިން ސީ-ޓު-އެއާ ކާގޯ ޓްރާންސްޝިޕްމަންޓް ޚިދުމަތް ފެށީ މިދިޔަ މާޗު މަހުގެ ތެރޭގައެވެ. އެ ހައިބްރިޑް މޮޑެލްގެ ސަބަބުން މި ސަރަޙައްދުގެ ވިޔަފާރިތަކާއި ސިނާޢަތްތަކުގެ ބޭނުންތައް ފުއްދައިދީ މުދާ އުފުލުމުގެ ޚިދުމަތް ހަރުދަނާ ގޮތެއްގައި ބެލެހެއްޓޭނެ ކަމަށް އެމްޕީއެލްއިން ބުނެފައިވެއެވެ.
މި ޚިދުމަތް ކުރިއަށް ގެންދަނީ އެމްޕީއެލް އާއި މޯލްޑިވްސް އެއާޕޯޓްސް ކޮމްޕެނީ ލިމިޓަޑް (އެމްއޭސީއެލް) އާއި ބައިނަލްއަގުވާމީ އެއާލައިންތަކާ ގުޅިގެންނެވެ.