ހުޅުމާލޭ ކެފޭއަކަށް ވަދެ ރޭ މާރާމާރީ ހިންގި މައްސަލައެއްގައި ދިވެހި ފިރިހެނަކު ހައްޔަރުކޮށްފިއެވެ.
ފުލުހުން މިއަދު މީޑިއާތަކާ ހިއްސާކުރި މެސެޖެއްގައި ވަނީ ހުޅުމާލޭގެ ރާކަނި ބީޗްގައި ދެމީހެއްގެ މެދުގައި ހިނގި މާރާމާރީއެއްގެ މައްސަލަ ފުލުހުންނަށް ރިޕޯޓުކޮށްފައި ވާކަމަށެވެ.
އެ މައްސަލައާ ގުޅިގެން ދިވެހި ފިރިހެނަކު ހައްޔަރުކޮށްފައިވާ ކަމަށް ފުލުހުން ވަނީ މައުލޫމާތު ދީފައެވެ. ނަމަވެސް އެ މައްސަލައިގައި ހައްޔަރުކޮށްފައި ވަނީ ކާކު ކަމާއި އަދި އެ މާރާމާރީގައި މީހަކަށް އަނިޔާވި ކަމެއް ފުލުހުން ހާމައެއް ނުކުރެއެވެ.
ފުލުހުން ބުނީ އެ މައްސަލަ މިހާރު ތަހުގީގު ކުރަމުން އަންނަ ކަމަށެވެ.
އެ ހާދިސާގެ ވީޑިއޯއެއް ސޯޝަލް މީޑިއާގައި އާންމުވެފައިވާއިރު، ވީޑިއޯއިން ފެންނަނީ ދެ މީހަކު ކެފޭ ތެރޭގައި އިށީނދެގެން ތިއްބާ، ސައިކަލެއް އައިސް ކެފޭ ކުރިމައްޗަށް މަޑު ކުރާ ތަނެވެ.
އެ ސައިކަލުގައި ތިބި ދެ މީހުންގެ ތެރެއިން އެކަކު އައިސް ގޮނޑިއެއް ނަގައި، އިށީނދެގެން އިން ފިރިހެނެއްގެ ގައިގައި ޖަހާ މަންޒަރު ވީޑިއޯއިން ފެނެއެވެ. އެއަށްފަހު ސައިކަލުގައި ދެން އިން މީހާ ވެސް އެ ދެ މީހުންގެ ދޭތެރެއަށް ވަދެ، އެކަކު ކޮށްޕާލާ މަންޒަރު ފެނެއެވެ.
އެ މާރާމާރީ ހުއްޓުވީ ކެފޭގައި ދެން ތިބި މީހުން ގޮސްގެންނެވެ.
މާރާމާރީގެ މައްސަލަތަކެއް މިފަހުން މާލޭ ސަރަހައްދުގައި ހިނގައިފައިވާއިރު، ފުލުހުންގެ ތަފާސްހިސާބުން ދައްކާ ގޮތުގައި މިއަހަރުގެ މިހާތަނަށް ހަމަލާ ދިނުމުގެ 589 މައްސަލައެއް ހުށަހަޅައިފައިވެއެވެ.