ވިޔަފާރިވެރިން ޑޮލަރު މާރުކުރަން ދެކޮޅުހަދަނީ މާރުކުރުމުގައި އަގުތަފާތުވާތީ ކަމަށާއި އެއީ ދެކޮޅުޖެހޭކަމެއް ނޫން ކަމަށް ވިދާޅުވެ، ބޭރު ފައިސާ ބެހޭ ގައިވަދަށް ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ރޭ ވަރަށް ބޮޑަށް ފާޑުވިދާޅުވެއްޖެއެވެ.
ޓޫރިސްޓު ރިސޯޓުތަކުން ކޮންމެ މަހެއްގެ ތެރޭ އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން އެ މަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު މާރުކުރަން މަޖުބޫރުކުރުމަށް މިދިޔަ މަހުގެ އެކެއްގައި އެމްއެމްއޭއިން ވަނީ ގަވައިދެއް ގެޒެޓުކޮށްފައެވެ.
އެ ގަވައިދަށް ހަމަ އެދުވަހު ވަނީ އަމަލުކުރަން ފަށައިފައެވެ.
ބޮޑެތި ބްރޭންޑްތައް ހިމެނޭގޮތަށް އެތައް ރިސޯޓަކުންނާއި ފަތުރުވެރިކަމުގެ ދާއިރާގެ ގިނަ ޖަމިއްޔާތަކުން އަންނަނީ ބޭރު ފައިސާއާ ބެހޭ ގަވާއިދުގެ ދަށުން ޑޮލަރު މާރު ކުރަން ހުރި ދަތިކަން ހާމަކުރަމުންނެވެ.
ޕީއެންއެފުން ކޮންމެ ހަފުތާއަކު ސިލްސިލާކޮށް ބާއްވާ ޖަލްސާތަކުގެ ތެރެއިން ރޭ ބޭއްވި ޖަލްސާގައި ޔާމީން ވިދާޅުވީ، އެ ގަވައިދަކީ އެމަނިކުފާނު ގަބޫލުކުރައްވާ ހަމައެއް ނޫން ކަމަށެވެ. އެގޮތުން، ފަތުރުވެރިކަމުގެ ދާއިރާގެ ވިޔަފާރިން ޑޮލަރު މާރުކުރަން ދައުލަތުން ދެނީ ރަސްމީ އަގު ކަމަށާއި ވިޔަފާރިވެރިން ޑޮލަރު މާރުކުރަން ދެކޮޅު ހަދަނީ މާރުކުރުމުގައި އަގު ތަފާތުވާތީ ކަމަށް ޔާމީން ތުހުމަތު ކުރެއްވިއެވެ.
"އެހެންވީމަ، މި ވާގޮތަކީ ދައުލަތަށް މާރުކޮށްދޭން ވީ 15.42ގެ ރޭޓުން ޑޮލަރު. އެކަމަކު މި މީހުންނަށް [ވިޔަފާރިވެރިންނަށް] އޭއްޗިހި މާރުކޮށް ނިމިގެން މި މީހުން އަތުން އިންވެސްޓުމަންޓަށް ނަގާފައި ހުރި ލޯނުތަކުގެ ފައިސާ ދައްކަންޏާ އެމީހުންނަށް ލިބިފައި ހުރި ޑޮލަރުގެ އިތުރުން ދެން ބާކީވާ ބައި ގަންނަން މި ޖެހެނީ ބްލެކް މާކެޓުން 19.50 އަށް. މީ ކޮން ކަހަލަ ދެކޮޅު ޖެހޭ ކަމެއް. ނުޖެހޭ ދެކޮޅެއް" ޔާމީން ވިދާޅުވިއެވެ.
ވިޔަފާރިވެރިންނަށް އެހާ އަގު ތަފާތުކޮށް ޑޮލަރު މާރު ނުކުރެވޭނެކަން ޔާމީން ވަނީ ފާހަގަކުރައްވާފައެވެ. އޭނާ ވިދާޅުވީ، ގްރީން ޓެކްސްތަކަށް ދަންދެން ރިސޯޓުތަކުން ދައުލަތަށް ދައްކަން ޖެހޭ ހުރިހާ ފައިސާއެއް ދައްކަނީ ޑޮލަރުން ކަމަށެވެ.
ކުރީގެ ރައީސް ޔާމީން އަބްދުލްގައްޔޫމް ޕީއެންއެފްގެ ޖަލްސާގައި:ވިޔަފާރިވެރިން ޑޮލަރު މާރުކުރަން ދެކޮޅުހަދަނީ މާރުކުރުމުގައި އަގުތަފާތުވާތީ، އެއީ ދެކޮޅުޖެހޭކަމެއް ނޫން ކަމަށް އޭނާ ވިދާޅުވި -- ސަން ފޮޓޯ/ މޫސާ ނަދީމް
ވިޔަފާރިތަކުން ލިބޭ ފައިދާއިން ބޮޑު ޚަރަދެއް ވިޔަފާރިވެރިން އިންވެސްޓުމަންޓަކަށް ކުރަން ޖެހޭ ކަމަށާއި އިންވެސްޓުމަންޓުތަކަށް ލޯނު ފައިސާ ނަގާފައި ހުރީ ދިވެހި ރުފިޔާއިން ނޫން ކަމަށް ޔާމީން ވިދާޅުވިއެވެ. އެހެންކަމުން އެ ލޯނު ދެއްކުމަށް ވެސް ވިޔަފާރިވެރިން ޑޮލަރު ބޭނުންވާކަން ޔާމީން ފަހަގަކުރެއްވިއެވެ.
މިދިޔަ ދިހަ ވަރަކަށް އަހަރު ހަދާފައި ހުރި ރިސޯޓުތަކުން ނަގާފައި ހުރި ލޯނުތަކަށް އަދިވެސް ފައިސާ ދައްކަމުން އަންނަ ކަަން ފާހަގަކުރައްވައި، ޔާމީން ވިދާޅުވީ މި ގަވާއިދުގެ ސަބަބުން ވިޔަފާރިވެރިންނަށް ބުރަ ބޮޑުވާ ކަމަށެވެ.
މީގެ އިތުރުން ޔާމީން ވިދާޅުވީ، ވެލާނާ އިންޓަނޭޝަނަލް އެއާޕޯޓު ބޮޑުކުރުމަށް ފަހު އެއާޕޯޓުގެ ބޭނުން ރަނގަޅުގޮތުގައި ހިފުމަށްޓަކައި، އިތުރު ރިސޯޓުތައް ރާއްޖޭގައި ގާއިމުކުރަން ޖެހޭކަމަށެވެ.
ރާއްޖޭގެ ފަތުރުވެރިކަން ތަރައްގީކުރުމުގައި އިސްކޮށް އުޅުއްވި ކުރީގެ ހެލްތު މިނިސްޓަރު އަހްމަދު ނަސީމް، ޔުނިވާސަލްގެ ވެރިޔާ މުހައްމަދު އުމަރު މަނިކު އަދި ކްރައުން ކުންފުނީގެ ޑިރެކްޓަރު ހުސައިން އަފީފް: ޔާމީން ވިދާޅުވީ ވިޔަފާރިވެރިން ޑޮލަރު މާރުކުރަން ދެކޮޅުހަދަނީ މާރުކުރުމުގައި އަގުތަފާތުވާތީ، އެއީ ދެކޮޅުޖެހޭކަމެއް ނޫން ކަމަށް -- ފޮޓޯ/ ރައީސް އޮފީސް
އެމްއެމްއޭއިން ނެރުނު ގަވާއިދުގައި ވާގޮތުން، ކެޓަގަރީ "އޭ"ގައި ހިމެނޭ ފަތުރުވެރިކަމުގެ ޚިދުމަތްދޭ ތަންތަނަށް އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން އެ މަހެއްގައި އައިސްފައިވާ ޖުމުލަ ފަތުރުވެރިންނަށް ޖެހޭ އަދަދު އެ މަހަށްފަހު ހިނގާ ތިންވަނަ މަހުގެ 28ވަނަ ދުވަހުގެ ކުރިން ބޭންކަށް މާރުކުރަން ވާނެއެވެ.
"އޭ" ކެޓަގަރީގައި ހިމެނެނީ ގްރީން ޓެކްސް ދައްކަންޖެހޭ ޓޫރިސްޓުން އަންނަ ތަންތަނުގެ ތެރޭގައި ހިމެނޭ ރާއްޖޭގައި ހިންގާ ޓޫރިސްޓު ރިސޯޓުތަކާއި އިންޓަގްރޭޓެޑް ޓޫރިސްޓު ރިޒޯޓުތަކާއި ރިޒޯޓު ހޮޓާތަކެވެ.
ބޭރުފައިސާއާ ބެހޭ ގަވާއިދުގެ ސަބަބުން ނުލިބޭ ޑޮލަރު މާރު ކުރަން ޖެހޭތީ، ކުރައުން އެންޑް ޗަމްޕާ ރިސޯޓު މިއަދު ވަނީ ބަންދުކޮށްފައެވެ.