މި މަހުގެ އެއްވަނަ ދުވަހުން ފެށިގެން 17 ވަނަ ދުވަހުގެ ނިޔަލަށް ރާއްޖެއަށް ލައްކަ އަކަށްވުރެގިނަ ފަތުރުވެރިން ޒިޔާރަތް ކޮށްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
އެ މިނިސްޓްރީއިން މިއަދު ނެރެފައިވާ އެންމެ ފަހުގެ ތަފާސްހިސާބުތަކުން ދައްކާގޮތުން އިއްޔެގެ ނިޔަލަށް ޖުމްލަ 103،560 ފަތުރުވެރިން ވަނީ ރާއްޖެއަށް ޒިޔާރަތް ކޮށްފައެވެ. މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތް ކޮށްފައިވަނީ 100،652 ފަތުރުވެތިންނެވެ.
ތަފާސްހިސާބުތަކުން ދައްކައިގޮތުގައި މި މުއްދަތުގެ ތެރޭގައި ކޮންމެ ދުވަހަކު ވެސް ރާއްޖެއަށް 5،000 އަށްވުރެ ގިނަ ފަތުރުވެރިން ޒިޔާރަތްކުރިއެވެ. އަދި އެންމެ ގިނަ އަދަދަކަށް ފަތުރުވެރިން ޒިޔާރަތް ކޮށްފައިވަނީ މި މަހުގެ އެއްވަނަ ދުވަހާއި 15 ވަނަ ދުވަހެވެ. އެގޮތުން މި މަހުގެ އެއްވަނަ ދުވަހު 7،100 ފަތުރުވެރިން ޒިޔާރަތްކުރިއިރު މި މަހުގެ 15 ވަނަ ދުވަހު، 8،934 ފަތުރުވެރިއަކު ވަނީ ރާއްޖެއަށް ޒިޔާރަތްކޮށްފައެވެ.
ފަތުރުވެރިން ޒިޔާރަތްކޮށްފައިވާ ޖުމްލަ އަދަދަށް ބަލާއިރު މިއަހަރުގެ މިހާތަނަށް 1,941,195 ފަތުރުވެރިއަކު ވަނީ ރާއްޖެއަށް ޒިޔާރަތް ކޮށްފައެވެ. މިއީ މިދިޔަ އަހަރު ރާއްޖެއަށް ޒިޔާރަތް ކޮށްފައިވާ ޖުމްލަ 1,878,543 ފަތުރުވެރިންނާ އަޅައިބަލާއިރު 3.2 އިންސައްތަ އިތުރު އަދަދެކެވެ.
ތަފާސްހިސާބުތަކުން ދައްކައިގޮތުގައި އަހަރުގެ މިހާތަނަށް ރާއްޖެއަށް އެންމެ ގިނަ އަދަދެއްގެ ފަތުރުވެރިން ޒިޔާރަތްކޮށްފައި ވަނީ ޗައިނާއިންނެވެ. އެގޮތުން ޗައިނާއިން 259,222 ފަތުރުވެރިން ޒިޔާރަތް ކޮށްފައިވާއިރު ލިސްޓުގެ ދެވަނައިގައި ވާދަކުރާ ރަޝިއާއިން ވަނީ 214,271 ފަތުރުވެރިން ޒިޔާރަތް ކޮށްފައެވެ. އަދި ލިސްޓުގެ ތިން ވަނައިގައި ޔޫކޭ އުޅޭއިރު ޔޫކޭއިން 170,906 ފަތުރުވެރިއަކު ވަނީ ޒިޔާރަތް ކޮށްފައެވެ.
އަހަރު ނިމެން 14 ވަރަކަށް ދުވަހަށް ވެފައިވާއިރު ސަރުކާރުން އަމާޒު ހިފާފައިވަނީ މި އަހަރުގެ ނިޔަަލަށް ރާއްޖެއަށް ދެ މިލިއަން ފަތުރުވެރިން ގެނައުމަށެވެ.