މީގެ ތިރީހަކަށް އަހަރު ކުރީއްސުރެ ޓޫރިޒަމް ސިނާއަތުން ޑޮލަރު މާރުކުރަމުން އައިނަމަ، މި ސަރަހައްދުގެ އެންމެ މުއްސަނދި އެއް ގައުމަށް ރާއްޖެވީސް ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ރޭ ވިދާޅުވެއްޖެއެވެ.
މި ދައުރުގެ ފަހު ޖަލްސާ ބޭއްވުމަށް ފަހު މަޖިލިސް ޗުއްޓީއަށް ދިޔައީ އިއްޔެއެވެ.
މަޖިލީހުގެ މަސައްކަތްތަކާ ގުޅޭ ގޮތުން ދައުލަތުގެ މީޑިއާއަށް ދެއްވި އިންޓަވިއުއެއްގައި އަބްދުއްރަހީމް ވަނީ، މިއަދު މަޖިލީހުން ފާސްކުރި ބޭރު ފައިސާއާ ބެހޭ ގާނޫނާ ގުޅޭގޮތުން މުހިންމު ވާހަކަފުޅުތަކެއް ދައްކަވައިފައެވެ.
މަރުކަޒީ ބޭންކު، އެމްއެމްއޭއިން ބޭރު ފައިސާއާބެހޭ އާ ގަވާއިދެއް އެކުލަވާލައި، ޓޫރިޒަމް ވިޔަފާރިތައް އެ ގަވާއިދުގެ ތެރެއަށް ވެއްދިއިރު، ގާނޫނުގައި އެ ކަން ހިމެނުމަށް މިދިޔަ ހޯމައިގައި މަޖިލީހަށް ވެއްދި ބިލު ފާސްކުރީ މިއަދެވެ. ބިލު ފާސްކުރީ، ސިނާއަތުގެ ތަޖުރިބާކާރުންނާއި ވިޔަފާރިވެރިން ކަންބޮޑުވުން ފާޅުކުރަމުންދަނިކޮށެވެ.
އަބްދުއްރަހީމް ވިދާޅުވި ގޮތުގައި މީގެ ތިރީހަކަށް އަހަރު ކުރީއްސުރެ ޓޫރިޒަމް ވިޔަފާރުތަކުން ޑޮލަރު މާރުކުރަންޖެހޭގޮތަށް ހަދައި، އެ ގޮތަށް އަމަލުކުރަމުން ދިޔަނަމަ، މި ސަރަހައްދުގެ އެންމެ މުއްސަނދި ގައުމުތަކުގެ ތެރޭގައި ރާއްޖެ ހިމެނުނީހެވެ. އަބްދުއްރަހީމް ދެކެވަޑައިގަންނަވާ ގޮތުގައި ރާއްޖޭގައި ބޭރު ފައިސާ ދަތިކަން ދިމާވެގެން އުޅޭ ސަބަބަކީ އެއީއެވެ.
"އަޅުގަނޑު ދަންނަވާނީ، މިއީ މީގެ ތިރީހަކަށް އަހަރު ކުރިން ފާސްކޮށްފައި އޮންނަންޖެހޭ ގާނޫނެކޭ. އެ ގާނޫނު މީގެ ތިރީހަކަށް އަހަރު ދުވަސް ކުރިން ފާސްކޮށްފައި އޮތްނަމަ، ދިވެހިރާއްޖެ ވެގެންދާނީ މި ސަރަހައްދުގެ އެންމެ މުއްސަނދި އެއް ގައުމަށް،" އަބްދުއްރަހީމް ވިދާޅުވިއެވެ.
އެ މަނިކުފާނު ވިދާޅުވީ، ބޭރު ފައިސާއާބެހޭ ބިލު ކޮމިޓީން ދިރާސާ ކުރުމުގައި ކަމާގުޅުންހުރި ބޭފުޅުންނާ މަޝްވަރާ ކުރެއްވި ކަމަށެވެ. ބިލު ފާސްކުރީ އެ ބޭފުޅުންގެ ގިނަ ކަންބޮޑުވުންތަކަށް ހައްލު ލިބޭނެ ގޮތަށް ކަމަށް އަބްދުއްރަހީމް ވިދާޅުވިއެވެ. ބިލު ފާސްކޮށްފައި އޮތީ ރައީސް ކުރިން ވެސް ވިދާޅުވި ގޮތަށް އެއްވެސް ބަދަލެއް ނުގެނެސް ކަމަށް ވިދާޅުވިއެވެ.
ނަމަވެސް، ޓޫރިޒަމް ވިޔަފާރިވެރިންގެ ކަންބޮޑުވުންތަކަށް ރިއާޔަތްނުކޮށް، ސިނާއަތް ފުނޑުނަސް ހެޔޮކަމަށް ނިންމައިގެން މަޖިލީހުން ބިލު ފާސްކުރިކަމުގެ ތުހުމަތު އިދިކޮޅުން ވަނީ ކޮށްފައެވެ.
ޓޫރިޒަމް ވިޔަފާރިތަކުން ޑޮލަރު މާރުކުރަންޖެހޭ ގޮތަށް މަރުކަޒީ ބޭންކު، އެމްއެމްއޭއިން އޮކްޓޯބަރު މަހުގެ އެކެއްގައި ތަންފީޒުކުރަން ފެށި ގަވާއިދާ ގުޅިގެން އިންޑަސްޓްރީގެ ބޭފުޅުންވަނީ އެއަށް އަމަލު ކުރެވެން ނެތް ކަމަށް ވިދާޅުވެފައެވެ. އެއީ، އާމްދަނީން ބޭރުން، ބޭންކަށް ޑޮލަރު މާރުކުރަން ޖެހޭގޮތަށް އެ ގަވާއިދު އޮތް ކަމަށް ބުނެއެވެ.
އެ ގަވާއިދާ ގުޅިގެން ވިޔަފާރިވެރިންގެ ބޮޑެތި ކަންބޮޑުވުންތަކެއް އޮއްވައި ރައީސް ޑރ. މުހައްމަދު މުއިއްޒުވަނީ ސަރުކާރަށް އަހަރުފުރުން ފާހަގަކުރަން ބޭއްވި ރަސްމިއްޔާތުގައި ގަވާއިދު ބަދަލުނުކުރައްވާނެ ކަމަށް ޗެލެންޖު ކުރައްވައި ވިދާޅުވެފައެވެ.