މި ސަރުކާރުން ވެރިކަމަށް އައީ ދިވެހި ރައްޔިތުންގެ އިތުރުން ބައިނަލްއަގުވާމީ ދުނިޔެއަށް ވެސް ދޮގު ހަދައި އޮޅުވާލައިގެން ކަމަށާއި، މި ސަރުކާރަށް ލިބިފައިވަނީ އިތުބާރު ނުކުރެވޭ ބައިވެރިއެއްގެ ނަން ކަމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު މިރޭ ވިދާޅުވެއްޖެއެވެ.
ޝާހިދު މިހެން ވިދާޅުވީ "ފުދިއްޖެ، ފުނޑިއްޖެ"ގެ ނަމުގައި އެމްޑީޕީން މިރޭ ބޭއްވި ޖަލްސާ؛ގައި ވާހަކަ ދައްކަވަމުންނެވެ.
ޝާހިދުގެ ވާހަކައިގައިވަނީ ޚާރިޖީ ގުޅުންތަކަކީ އިތުބާރާއި އިޙްތިރާމުގެ އިތުރުން، އުސޫލުތައް ހިފަހައްޓައިގެން އުފެއްދޭ އެއްޗެއްކަން ފާހަގަ ކުރައްވައިފައެވެ. އެ ގޮތުން ދޮގާއި މަކަރު ހަދައި، އޮޅުވާލައިގެން ޚާރިޖީ ސިޔާސަތެއް ނުހިންގޭނެ ކަމަށް އޭނާ ވިދާޅުވިއެވެ.
"ބައިނަލްއަގުވާމީ ގުޅުންތަކަކީ ޒާތެއްގެ އެއްޗެއް. އެއީ ހަމަ ހިތަށް އަރާހާ އެއްޗެއް ހިތުހުރި ތާކު ބުނެފައި، ކުރަން ހިތަށް އެރި ކަމެއް ހިތުހުރި ގޮތަކަށް ކޮށްލީމާ ގުޅޭ އެއްޗެއް ނޫން," ޝާހިދު ވިދާޅުވިއެވެ.
އެހެން ނަމަވެސް މިއަދުގެ ސަރުކާރުން ކަންކުރަމުންދަނީ އެ ގޮތަށް ނޫންކަން ފާހަގަ ކުރައްވައި، ޝާހިދުވަނީ ރާއްޖެއާ އަވައްޓެރި އިންޑިއާއާ މެދު ސަރުކާރުން ކަންކުރި ގޮތުގެ ވާހަކައަށް އިޝާރާތް ކުރައްވައިފައެވެ.
"...އެންމެ ކައިރީގައި މި އޮތް އަޅުގަނޑުމެންގެ އެންމެ ޒަމާންވީ އެންމެ ގާތް އެކުވެރި ރަހުމަތްތެރި އިންޑިއާއާ ދިމާލަށް ނުކިޔާކަށް ނުބުނާކަށް ނުކުރާކަށް ހަޑިހުތުރުވެގެން ބަހެއް ނެތް. އެ ގައުމުގެ އެންމެ އިސްވެރީން މާލި ހައްދައިގެން މިހިރަ މަގުގައި ދެކޮޅަށް ދުއްވާ ހަދައިފި. މި ކަން ކޮށްފާމެ، މިދިޔަ މަހުގައި ރަތް ކާޕެޓުގައި އެ ގައުމުގެ މި ދެންނެވި ލީޑަރުންނާ އެކީގައި ހިންގަވާފައި ވަޑައިގެންނެވީ. މުޅި ދުނިޔެ ތިބީ ހޭން," ޝާހިދު ވިދާޅުވިއެވެ.
މިހާރު ވެރިކަމުގައި އޮތް ޕީއެންސީއާއި ޕީޕީއެމުން އިދިކޮޅުގައި ތިބެ، "އިންޑިއާ އައުޓް"ގެ ނަމުގައި، އިންޑިއާއާއި ދިވެހި ސަރުކާރާ ދެމެދު ހަދާފައިވާ ސިއްރު އެއްބަސްވުންތަކެއް ދަށުން އެ ގައުމުގެ ހަތިޔާރު އެޅި ސިފައިން ރާއްޖޭގައި ގާއިމްވެ ތިބޭ ކަމަށް ބުނެ، އެ ކަމާ ދެކޮޅަށް ކެމްޕޭނެއް ކުރިއަށްގެންދިޔައެވެ.
އެ ކެމްޕޭނާ ގުޅިގެން، ރައީސް ޑރ. މުޙައްމަދު މުއިއްޒަކީ 'ޕްރޯ އިންޑިއާ' ބޭފުޅަކަށް ނުވާނެ ކަމަށް ސިފަކޮށްފައި ވަނިކޮށް، މި ސަރުކާރުގެ ނައިބު ވަޒީރުންތަކެއް ބޮޑުވަޒީރު ނަރެންދުރަ މޯދީއާއި އެގައުމުގެ ރައްޔިތުންނަށް ކުޑައިމީސްކޮށް ވާހަކަ ދެއްކެވި މައްސަލައިގައި ދެ ގައުމުގެ ގުޅުން ގޯސްވިއެވެ.
އެ މައްސަލައިގައި ރާއްޖޭގެ ފަތުރުވެރިކަމާ ދެކޮޅަށް އިންޑިއާގައި ކެމްޕޭނެއް ވެސް ކުރިއަށްގެންދިޔައެވެ. ނަމަވެސް ސަރުކާރުން ވަނީ އިންޑިއާއާ ގުޅުން ރަނގަޅު ކުރުމަށް ގިނަ މަސައްކަތްތަކެއްކޮށްފައެވެ.
މި ސަރުކާރަށް އަހަރެއް ވެގެންދިޔައިރު، މިއީ އެމްޑީޕީން އިދިކޮޅުގައި ތިބެ ބޭއްވި ފުރަތަމަ ބޮޑު އެއްވުމެވެ.