އިޒްރޭލު ޕާސްޕޯޓު މަނާ ކުރުމަށް ރައްޔިތުންގެ މަޖިލީހަށް ހުށަހަޅާފައިވާ ބިލުގެ މަސައްކަތް ކޮމިޓީގައި ފެށީކަމަށް ބުނީ ރައީސް، ޑރ. މުޙައްމަދު މުއިއްޒު ފަލަސްތީނު މައްސަލާގައި ވާކާލާތު ކުރައްވަން ސައުދީއަށް ފުރާވަޑައިގަންނަވަން ޖެހުމުންކަމަށް ކުރީގެ ރައީސް އަބްދުﷲ ޔާމީން އަބްދުލްޤައްޔޫމް މިރޭ ތުހުމަތުކުރައްވައިފިއެވެ.
ޔާމީން މިފަދައިން ވިދާޅުވެ ތުހުމަތެއް ކުރެއްވިއިރު އިޒްރޭލު ޕާސްޕޯޓު މަނާ ކުރުމުގެ ބިލު މިހާރު ވަނީ ރައްޔިތުންގެ ސަލާމަތީ ޚިދުމަތްތަކާބެހޭ (241) ކޮމިޓީގައި އެޖެންޑާކޮށްފައެވެ. އަދި ރައީސް ހުންނެވީ ފަލަސްތީނު މައްސަލައިގައި އިސްލާމީ ގައުމުތަކުގެ ވެރިންގެ ކުއްލި ބައްދަލުވުމަށް ސައުދީއަށް ފުރައިވަޑައިއިގެން މި ވަގުތު އެ ގައުމުގެ ވެރިރަށް ރިޔާދުގައެވެ.
ޕީއެންއެފުން ސިލްސިލާކޮށް ކޮންމެ ހަފްތާއަކު ބާއްވަމުން އަންނަ ޖަލްސާތަކުގެ ތެރެއިން މިރޭގެ ޖަލްސާގައި ޔާމީން ވިދާޅުވީ، އިޒްރޭލު ޕާސްޕޯޓު ބިލުގެ މަސައްކަތް ފެށިކަން އިއުލާނުކުރީ ފަލަސްތީނުގެ މައްސަލައިގެ ކޮންފަރެންސަކަށް ރައީސް ފުރާވަޑައިގަންވަން ޖެހުމުން ކަމަށެވެ.
ކުރީގެ ރައީސް އަބްދުﷲ ޔާމީން، ޕީއެންއެފްގެ ޖަލްސާއެއްގައި: ވިދާޅުވީ އިޒްރޭލު ޕާސްޕޯޓުގެ މައްސަލަ ކޮމިޓީއަށް ފޮނުވީ ފަލަސްތީނަށް ވާކާލާތު ކުރަން ރައީސް ފުރާތީ ކަމަށް -- ފޮޓޯ/ ޗެނަލް 13
މިހާރު ކުއްލިއަކަށް މިބުނީ އެ މައްސަލަ ކޮމިޓީގައޭ. މާތްކަލަކޯ މިއީ ކޮމިޓީއަށް ދާން ޖެހޭވަރުގެ ކަމެއް ނޫނޭ. މިހާރު ފަލަސްތީނު މައްސަލާގައި ވާހަކަދައްކަން ޖެހޭތީ މޫނޫ އޮމާންކޮށްލާފައ، މަތި އޮމާންކޮށްލާފައި، ރީތި ކޮށްލާފަ ބުނީމަ މައްސަލަ ކޮމިޓީއަށް ދިޔައީކުރީގެ ރައީސް އަބްދުﷲ ޔާމީން އަބްދުލްޤައްޔޫމް
އެހެންވެ، ކޮމިޓީގައި މިހާރު އެ މައްސަލަ އޮތުމުން އެ މަސައްކަތް ވަރަށް ބާރަށް ހިނގާ ވާހަކަ ސަރުކާރަށް ބުނެވެން އޮންނާނެ ކަމަށް ޔާމީން ވިދާޅުވިއެވެ.
ތުރުކީއަށް ރައީސް މުއިއްޒު ކުރެއްވި ރަސްމީ ދަތުރުފުޅަށް ފަހުގައި ޖަލްސާއެއްގައި ވާހަކަދައްކަވަމުން އިސްލާމީ އުންމަތުގެ މިއަދުގެ ލީޑަރަކީ ތުރުކީކަމަށް އެމަނިކުފާނު ވިދާޅުވި ކަމަށް ޔާމީން ވިދާޅުވިއެވެ.
ރޭގެ ޖަލްސާގައި ވާހަކަދައްކަވަމުން ވެސް ރައީސް ވަނީ ސައުދީ އަރައިބިއާ އަކީ އިސްލާމީ ދުނިޔޭގެ ލީޑަރު ކަމަށް ވިދާޅުވެފައެވެ.
އެ ވާހަކަފުޅުތަކަށް އިޝާރާތްކުރައްވައި، ޔާމީން ތުހުމަތު ކުރެއްވި ގޮތުގައި ތުރުކީއާ ގުޅޭގޮތުން ރައީސް ދެއްކެވި ވަހަކަފުޅަކީ ތުރުކީ މޮޅުކޮށް އެ ގައުމު "ޅޮސް އުނދޯއްޔަށް" ލާން ދެއްކެވި ވާހަކައެއްގެ ގޮތުގައި ސިފަކުރެއްވިއެވެ. އަދި ސައުދީއަކީ އިސްލާމީ އުންމަތުގެ ލީޑަރުކަމަށް ވިދާޅުވީ ސައުދީއަށް ފުރާވަޑައިގަންނަވާތީ ކަމަށް ޔާމީން ވިދާޅުވިއެވެ.
އިޒްރޭލު ޕާސްޕޯޓު މަނާކުރުމުގެ ބިލު ކޮމިޓީ މަރުހަލާގައި ތާށިވެފައި އޮންނަތާ އިއްޔެއަށް 153 ދުވަސް ވަނީ ވެފައެވެ.
އެކަމާ ގުޅުވައި ޕީއެންސީގެ ޕީޖީ ލީޑަރު، އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު "ސަން"އަށް އިއްޔެ ވިދާޅުވީ، ކޮމިޓީ މަރުހަލާގައި މި ބިލު ދިރާސާ ކުރުމަށް ފަހު، ކަމާ ގުޅުންހުރި އިދާރާތަކުގެ ކޮމެންޓު ހޯއްދަވާނެ ކަމަށެވެ. އަދި, ވީހާ ވެސް އަވަހަކަށް މި ބިލުގެ މަސައްކަތް ނިންމުމުގެ މަސައްކަތް ފަށާފައިވާ ކަމަށް އޭނާ ވިދާޅުވިއެވެ.
ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ހުށަހެޅުއްވި މި ބިލުގައިވާ ގޮތުން، އިޒްރޭލު މީހުންނާއި އެ ގައުމުގެ ޕާސްޕޯޓު ގެންގުޅޭ އެހެނިހެން ގައުމުގެ ތަކުގެ މީހުންނަށް ވެސް ރާއްޖެ އެތެރެއެއް ނުވެވޭނެއެވެ.
މި މައްސަލަ ކޮމިޓީ މަރުހަލާގައި ހުއްޓިފައި އޮތުމާ ގުޅިގެން އެކި ފަހަރުމަތިން އިދިކޮޅު މެންބަރުން ވަނީ، އެ ބިލުގެ މަސައްކަތް އަވަސްކުރުމަށް ގޮވާލައި، ކުއްލި މައްސަލަތައް ވެސް މަޖިލީހަށް ހުށަހަޅާފައެވެ. އެހެން ނަމަވެސް ސަރުކާރުގެ ސުޕަމެޖޯރިޓީ އޮންނަ މަޖިލީހުން ދިޔައީ އެ މައްސަލަތައް ބޭރުކޮށްލަމުންނެވެ.
އިޒްރޭލު ޕާސްޕޯޓު މަނާކުރަން ވަޒީރުންގެ މަޖިލީހުން ނިންމައި، އެކަން އިއުލާނުކުރުމާ އެކު މުޅި ދުނިޔޭގެ ސަމާލުކަން ލިބުނެވެ.