ގޭންގު ކުށުގެ ނަމުގައި ޒުވާނުން ތަހުގީގަށް ހައްޔަރުކޮށް "ވާނުވާ" ބަންދު ޖަހަނީ މަގުމައްޗަށް ނުކުމެ މި ވެރިކަން ވައްޓާލަން މަސައްކަތްކޮށްފާނެތީ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ރޭ ތުހުމަތުކުރައްވައިފިއެވެ.
އަމިއްލަފުޅު ޕާޓީ، ޕީއެންއެފުން ބޭއްވި ޖަލްސާއެއްގައި ވާނުވާ ބަންދާ މެދު ކަންބޮޑުވުން ފާޅުކުރައްވައި އެ މަނިކުފާނު ވިދާޅުވީ، ބޮޑެތި ޖިނާއީ ކުށްތަކުގައި ކުށުގެ ވެށިން ހައްޔަރުކުރާ މީހުންގެ ތަހުގީގު ނިންމަން ވަކި މުއްދަތެއް ޖެހިދާނެ ކަމަށެވެ.
ނަމަވެސް، އެ ނޫން ހާލަތެއްގައި ފުލުުހުން މައްސަލަ ތަހުގީގުކޮށް ނުނިމެނީސް ވާނުވާ ނުޖެހޭނެ ކަމަށް އެ މަނިކުފާނި ވިދާޅުވިއެވެ.
"ޝަރީއަތަށް އަދި މައްސަލަ ދަނީކީ ވެސް ނޫން. މި ދަނީ ފުރަތަމަ ވާނުވާ ޖަހަން. އަދި ފުލުހުން މައްސަލަ ތަހުގީގުކޮށް ނުނިމޭ. ތަހުގީގުކޮށް ނުނިމެންޏާ ކިހިނެއްތޯ ކުށުގެ ވެށިން ހައްޔަރުކުރާ މީހެއް ނޫނިއްޔާ، ކިހިނެއްތޯ ވާނުވާ ޖަހަން ފުލުހުންނަށް ނިންމޭނީ އޭނާ އެއީ ކުށްވެރިއެއް ކަމަށް،" ޔާމީން ވިދާޅުވިއެވެ.
ވާނުވާ ބަންދުގައި ގިނަ ދުވަސްތަކެއް ހޭދަކުރާ މީހުންނަށް ނުހައްގުން ލިބޭ އަނިޔާއަށް ބަދަލު ދޭނެ އުސޫލެއް ރާއްޖޭގައި ނޯންނަކަން އެ މަނިކުފާނު ފާހަގަކުރެއްވިއެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމް: ގޭންގުގެ ނަމުގައި ޒުވާނުންނަށް ވާނުވާ ޖަހަނީ ވެރިކަމުން ބާލަން މަސައްކަތް ކޮށްފާނެތީ ކަމަށް ވިދާޅުވި -- ސަން ފޮޓޯ/ އަމަން ލަތީފް
މި ސަރުކާރުގެ ހޯމް މިނިސްޓަރު އަލީ އިހުސާނަކީ ވެރިކަމުގެ ކުރީކޮޅު ވަރަށް ގަދަޔަށް ވާނުވާ ބަންދުގެ ވާހަކަ ދެއްކެވި ބޭފުޅެއް ކަމަށް ޔާމީން ވިދާޅުވިއެވެ. އެކަމަކު، މިހާރު އެ ވާހަކަ ނުދައްކަވާ ކަމަށް އެ މަނިކުފާނު ވިދާޅުވިއެވެ.
"ވާނުވާގެ ކަންތައް އިސްލާހުނުކޮށް މި ދަންމާލަނީ އަޅުގަނޑު ހިތަށް މި އަރަނީ އެއްވުންތަކާ ކަންކަން އަންނާނެކަން [ރައީސް ޑރ. މުހައްމަދު] މުއިއްޒަށް އެނގޭތީ. މުއިއްޒު އިމްޕީޗް ނުކުރެވޭ ވަރު މަޖިލީހުގެ ތެރެއިން އެ ކުރައްވަނީ. އެކަމަކު މުއިއްޒަށް އެބަ އެނގޭ ރައްޔިތުންގެ ދަރުބާރުގައި މުއިއްޒަކަށް ތާއީދެއް ނެތްކަން،" ޔާމީން ވިދާޅުވިއެވެ.
"އެހެންވީމާ މިކަން ހުއްޓުވުމަށް އެ މީހުން ބޭނުންވާ ބައެއް ގޭންގުތަކުގެ ނަމުގައި ނަގާފައި ވާނުވާ ޖެހީމައި ދެން އެ މީހުންގެ ހައްގުގައި އުޅޭނެ ބަޔަކު ނޫޅޭނެ. ހަމަ ސިސްޓަމުގެ ތެރޭގައި ތެޅިތެޅި ތިބެންޖެހޭނީ،"
ގޭންގު ކުށްތަކާ ދެކޮޅުކަމާއި އަދި އެކަން ހުއްޓުވަން ޖެހޭކަން ފާހަގަކުރައްވައި އެ މަނިކުފާނު ވިދާޅުވީ، ވަކި ގޮތަކަށް ހެދުން އަޅައި ނުވަތަ ވަކި ނިޝާންތަކެއް ބޭނުންކުރާ ބަޔަކީ ގޭންގުގެ ގޮތުގައި ދެކުން ވެސް ގޯސް ކަމަށެވެ.
ގޭންގު ކުށްތައް ހުއްޓުވުމަކީ މި ސަރުކާރުން ޚާއްސަ އިސްކަމެއް ދީގެން ކުރަމުން އަންނަ ކަމެއް ކަމަށާއި ނަން މަޝްހޫރު ބޮޑެތި ހުރިހާ ގޭންގުތަކެއް ހުއްޓުވާނެ ކަމަށް ހޯމް މިނިސްޓަރު އިހުސާން މީގެ ކުރިން ވިދާޅުވެފައިވެއެވެ.
އެ މަސައްކަތުގެ ތެރެއިން ބާރުތައް އިތުރަށް ހަރުކަށިކޮށް، މަސްތުވާތަކެތީގެ ގާނޫނަށް ވެސް ސަރުކާރުގެ ފަރާތުން ވަނީ އިސްލާހެއް ހުށަހަޅުއްވައިފައެވެ. އެ ބިލުގައި ވަނީ އިދާރާތަކަށް ލިބޭ ބާރުތައް އިތުރަށް ހަރުކަށިކޮށްފައެވެ.
ވާނުވާ ބަންދުގެ މައްސަލަ ހައްލުކުރުމަކީ ރައީސް މުއިއްޒުގެ ރިޔާސީ ވައުދުފުޅެކެވެ.