ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ އޮފީސް ހިންގުމަށްޓަކައި ކުއްޔަށް ނަގާފައިވާ އިމާރާތުގެ ދެ ފްލޯގައި މޯލްޑިވްސް މީޑިއާ ހައުސް ޕްރައިވެޓް ލިމިޓެޑްއިން "އެމްއެމްޓީވީ" ހިންގުމަށް ހަދައިފައިވާ އެއްބަސްވުން ނިމުމަކަށް ގެންނަން އެ އޭޖެންސީން މިއަދު ނިންމައިފިއެވެ.
އެންސްޕާއިން ނެރުނު ބަޔާނެއްގައިވަނީ، އެ އޭޖެންސީ ހިންގަމުންދާ މޫކައި ސުއިޓްސް އިމާރާތް މަރާމާތު ކުރުމަށް ޓަކައި ހުސްކުރުމަށް އަންގައިފައިވާތީ، އެ އޭޖެންސީ ހިންގާނެ ތަނެއް ހޯދުމަށް ފިނޭންސް މިނިސްޓްރީގެ އޯޕަން ޓެންޑާއިން ހުޅުވާލައިގެން، އެކަމާ ގުޅުންހުރި ގަވައިދުތަކާއި އުސޫލުތަކުގެ މަތިން އެމްއެމްޓީވީއަށް އިމާރާތުގެ ފަންގިފިލާތަކެއް ކުއްޔަށް ދިން ކަމަށެވެ.
އެހެން ނަމަވެސް އެ މުއާމަލާތާ ގުޅިގެން އެމްއެޓީވީގެ އަގު ވައްޓާލައި، ބަދުނާމުކުރުމަށް ހަގީގަތާ ޚިލާފު އެތައް ވާހަކަތަކެއް ދައްކައިމ މީޑިއާގެ އެކި ވަސީލަތްތައް ބޭނުންކޮށްގެން އެއްވެސް އަސްލެއް ނެތް ދޮގު ވާހަކަތައް ފަތުރަމުން ދިޔުމުގެ ސަބަބުން އެ ކުންފުންޏަށް މާއްދީ ގޮތުންނާއި މައުނަވީ ގޮތުން ފޫނުބެދޭ ވަރުގެ ބޮޑު ގެއްލުމާ ކުރިމަތިވެފައިވާ ކަމަށް އެ ބަޔާނުގައިވެއެވެ.
އެހެންވެ، އެ އެއްބަސްވުން ބާތިލުކުުރުމަށް އެމްއެމްޓީވީން ހުށަހަޅައިފައިވާތީ، އެންސްޕާއިން ފިނޭންސް މިނިސްޓްރީއާ މަޝްވަރާކުރުމަށް ފަހު އެއްބަސްވުން ބާތިލުކުރަން ނިންމައިފައިވާ ކަމަށް އެ އޭޖެންސީން ބުންޏެވެ.
"އަދި މިކަމާ ގުޅިގެން އިތުރަށް ކުރަންޖެހޭ މުއާމަލާތްތައް ކުރުމާއި މި އެއްބަސްވުން ނިމުމަކަށް ގެނައުމަށް ފަހު ފުރިހަމަ ކުރަން ޖެހޭ އިޖުރާއަތްތައް ފުރިހަމަ ކުރުމުގެ މަސައްކަތްތައް މާލީ ވުޒާރާގެ އިރުޝާދުގެ ދަށުން ކުރިއަށް ގެންދާ ވާހަކަ ދަންވަމެވެ." އެ ބަޔާނުގައިވެއެވެ.
އެ އިމާރާތުގެ ހަތަރު ފްލޯއަށް ފަސް އަހަރު ދުވަހުގެ ކުލީގެ ގޮތުގައި 34.8 މިލިއަން ރުފިޔާ އެކީ އެއްފަހަރާ ދިނުމަށް ފަހު، އެ ކުންފުނިން ހަތަރު ފްލޯ ކުއްޔަށް ހިފުމަށް ފަހު، އޭގެ ތެރެއިން ދެ ފްލޯ މޯލްޑިވްސް މީޑިއާ ހައުސް އިން މިދިޔަ ބުރާސްފަތި ދުވަހު ހިންގަން ފަށާފައިވާ އެމްއެމްޓީވީ ހިންގުމަށްޓަކައި، ކުއްޔަކާ ނުލާ އެ ކުންފުންޏަށް ދީފައިވާކަމަށް ސޯޝަލް މީޑިއާގައި ތުހުމަތުކޮށްފައިވެއެވެ.
އެ ތުހުމަތުތަކާ ގުޅިގެން ކަންބޮޑުވުން ފާޅުކޮށް، ރައްޔިތުންގެ މަޖިލީހަށް މިއަދު ކުއްލި މައްސަލައެއް އިދިކޮޅު އެމްޑީޕީން ހުށަހެޅިއެވެ. ނަމަވެސް ސަރުކާރު ހިންގާ ޕީއެންސީގެ ސުޕަމެޖޯރިޓީ އޮންނަ މަޖިލީހުން ވަނީ އެ މައްސަލައިގައި ޝަރުތު ހަމަނުވާކަމަށް ނިންމައި، ބޭރުކޮށްލައިފައެވެ.
ފާހަގަކޮށްލެވޭ ގޮތުގައި އެންސްޕާއިން ވަނީ އެ ތުހުމަތުތައް ދޮގުކޮށް، މައްސަލަ ބަލައިދޭން އެންޓި ކޮރަޕްޝަން ކޮމިޝަން (އޭސީސީ)ގައި އެދިފައެވެ.
އޭސީސީން ވަނީ އެ މައްސަލަ ބަލަން ފަށާފައެވެ. އެކަމަކު، އެ މައްސަލައާ ގުޅޭ ގޮތުން އިތުރު އެއްވެސް އެއްޗެއް އޭސީސީން ބުނެފައެއް ނުވެއެވެ.