އިޒްރޭލު ޕާސްޕޯޓު މަނާ ކުރުމަށް ރައްޔިތުންގެ މަޖިލީހަށް ހުށަހަޅާފައިވާ ބިލުގެ މަސައްކަތް ވީހާ ވެސް އަވަހަކަށް ނިންމުމުގެ މަސައްކަތް ފަށައިފިން ކަމަށް ޕީއެންސީގެ ޕީޖީ ލީޑަރު، އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު މިއަދު ވިދާޅުވެއްޖެއެވެ.
އިޒްރޭލު ޕާސްޕޯޓު މަނާ ކުރުމުގެ ބިލުވަނީ ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ (241) ކޮމިޓީގައި އެޖެންޑާ ކޮށްފައެވެ.
މި ކަމާ ގުޅިގެން "ސަން"އަށް މައުލޫމާތު ދެއްވަމުން ފަލާހު ވިދާޅުވީ، ކޮމިޓީ މަރުހަލާގައި މި ބިލު ދިރާސާ ކުރުމަށް ފަހު، ކަމާ ގުޅުންހުރި އިދާރާތަކުގެ ކޮމެންޓު ހޯއްދަވާނެ ކަމަށެވެ. އަދި ވީހާ ވެސް އަވަހަކަށް މި ބިލުގެ މަސައްކަތް ނިންމުމުގެ މަސައްކަތް ފަށާފައިވާ ކަމަށް އޭނާ ވިދާޅުވިއެވެ.
އިޒްރޭލު ޕާސްޕޯޓު މަނާކުރުމުގެ ބިލު ކޮމިޓީ މަރުހަލާގައި ތާށިވެފައި އޮންނަތާ މިއަދު މިއީ 153ވަނަ ދުވަހެވެ.
ބިލުގެ މަސައްކަތް ލަސްވަނީ ކީއްވެތޯ ސުވާލު ކުރުމުން ފަލާހު ވިދާޅުވީ، އެ ބިލާ ގުޅޭގޮތުން މަޝްވަރާ ކުރެވެމުންދާ ކަމަށެވެ. އަދި، އެ ނޫނަސް، މުހިންމު ބިލުތަކެއްގެ މާ ދިގުދެމިގެންދާ ކަމަށް ވެސް އޭނާ ވިދާޅުވިއެވެ.
"އިމިގްރޭޝަނުގެ ގާނޫނަށް ހުށަހެޅިފައި މި އޮތް އިސްލާހު ނޫނަސް ހަމަ މީގެ ތެރޭގައި އެބަހުރި ވަރަށް މުހިންމު ސަރުކާރުން ފޮނުވާފައިހުރި ބިލުތަކެއް އެބަހުރި ކޮމިޓީ މަރުހަލާގައި މާ ގިނަ ދުވަސްވެފައި... އެ ވާ ގޮތަކީ ކޮމިޓީއަށް އައިސް މުހިންމު ބިލްތަކުގައި މުހިންމު ކަންތައްތަކުގައި ފުދޭވަރަކަށް ވަގުތު ނަގާފާނެ ކޮމިޓީ މަރުހަލާގައި. މިއީ އަޅުގަނޑުމެން އެންމެ އިސްކަންދޭ އެއް ކަންތައް،" ފަލާހު ވިދާޅުވިއެވެ.
ކޮމިޓީ މަރުހަލާގައި ކުރާނެ އެންމެ ފުރަތަމަ އެއް މަސައްކަތަކީ ބިލުގެ މަސައްކަތް ނިންމާނެ ތާރީޚެއް ކަނޑައެޅުމެވެ. އަދި، ބިލު އިތުރަށް ދިރާސާކޮށް، ގެންނަންޖެހޭ އިސްލާހުތައް ގެނައުމުގެ މަަސައްކަތް ވެސް ކުރާނެއެވެ.
ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ހުށަހެޅުއްވި މި ބިލުގައިވާ ގޮތުން، އިޒްރޭލު މީހުންނާއި އެ ގައުމުގެ ޕާސްޕޯޓު ގެންގުޅޭ އެހެނިހެން ގައުމުގެ ތަކުގެ މީހުންނަށް ވެސް ރާއްޖެ އެތެރެއެއް ނުވެވޭނެއެވެ.
މި މައްސަލަ ކޮމިޓީ މަރުހަލާގައި ހުއްޓިފައި އޮތުމާ ގުޅިގެން އެކި ފަހަރުމަތިން އިދިކޮޅު މެންބަރުން ވަނީ، އެ ބިލުގެ މަސައްކަތް އަވަސްކުރުމަށް ގޮވާލައި، ކުއްލި މައްސަލަތައް ވެސް މަޖިލީހަށް ހުށަހަޅާފައެވެ. އެހެން ނަމަވެސް ސަރުކާރުގެ ސުޕަމެޖޯރިޓީ އޮންނަ މަޖިލީހުން ދިޔައީ އެ މައްސަލަތައް ބޭރުކޮށްލަމުންނެވެ.
އިޒްރޭލު ޕާސްޕޯޓު މަނާކުރަން ވަޒީރުންގެ މަޖިލީހުން ނިންމައި، އެކަން އިއުލާނުކުރުމާ އެކު މުޅި ދުނިޔޭގެ ސަމާލުކަން ލިބުނެވެ.