ބަންޑާރަނައިބުގެ އޮފީސް، ސިވިލް ސާވިސްއިން ވަކިކޮށް، ވަކި ޚިދުމަތަކަށް ހަދަން އުޅެނީ އެ އޮފީހަށް ސިޔާސީ ނުފޫޒު ފޯރުވުމުގެ ގޮތުން ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ އެމްޑީޕީ މެންބަރު ޑރ. އަހުމަދު ޝަމްހީދު މިއަދު ވިދާޅުވެއްޖެއެވެ.
މި ބިލު ސަރުކާރުގެ ފަރާތުން ހުށަހެޅުއްވީ މާފަންނު ދެކުނު ދާއިރާގެ މެންބަރު އަބްދުﷲ ރިފާއުއެވެ.
ބިލަށް ބަހުސްކުރައްވާ މިއަދު ޝަމްހީދު ވިދާޅުވީ އެންމެ ފުރަތަމަ ވެސް ބަލަން ބޭނުންވަނީ އެފަދަ ބިލެއް ކުއްލިއަކަށް މަޖިލީހަށް ފޮނުވި ސަބަބު ކަމަށެވެ. އެ ބިލުގައި އިތުރަށް ބަންޑާރަނައިބަށް ލިބިގެންދާ ބާރުތަކެއްވާ ކަމަށާއި، އެބާރުތަކުގެ ތެރޭގައި ބަންޑާރަނައިބަށް އެ އޮފީހަށް މުވައްޒަފުން އައްޔަނުކުރުމާއި، އޮނިގަނޑު އެކުލަވާލުމުގެ އިތުރުން މުވައްޒަފުންގެ އިނާޔަތްތައް ކަނޑައެޅުމުގެ ބާރުވެސް ލިބިދޭ ކަމަށް ޝަމްހީދު ވިދާޅުވިއެވެ.
އެނޫން އިތުރުކަމެއް ހާސިލުވާތަނެއް އެ ބިލު ކިޔާލުމުން ފާހަގަނުވާ ކަމަށް ޝަމްހީދު ވިދާޅުވިއެވެ.
"ފަހަރެއްގަ ވެދާނެ ބަންޑާރަނައިބުގެ އޮފީހަށްވާ ޓެކްނިކަލް މީހުން ހޯދުމަށް ދަތިވީ ކަމަށް. އެވާހަކައެއް ނެތް ފާހަގަކޮށްފައެއް. މިހާރު ސިވިލް ސާވިސްގެ ދަށުގަ އޮންނަ މުއައްސަސާއަކަށްވެ، އެ އޮނިގަނޑު ތެރެއިން އުޖޫރަ ދެވޭ ބޭބޭފުޅުންނަށް އުޖޫރަ ދިނުމުގަ ދަތިތަކެއް އުޅެނީ ކަމަށް،" ޝަމްހީދު ވިދާޅުވިއެވެ.
އޭނާ ވިދާޅުވީ، މި ބިލުގެ ސަބަބުން ދިވެހިރާއްޖޭގެ އެންމެ ޒިންމާދާރު އެއް މުއައްސަސާ ކަމަށްވާ ބަންޑާރަނައިބުގެ އޮފީހަކީ އެންމެ މީހެއްގެ މުއައްސަސާއަކަށް އެއްކޮށް ބަދަލުކޮށްލުމުގެ ފުރުސަތު ލިބޭކަމަށެވެ.
އެހެން ވެއްޖެ ނަމަ ކޮންމެ ފަސް އަހަރަކުން ފެނިގެންދާނީ އާ ބަންޑާރަނައިބުގެ އޮފީހަކާއި މުޅިން އާ މުވައްޒަފުންތަކެއް ކަމަށް ޝަމްހީދު ވިދާޅުވިއެވެ.
"މީގެ ސަބަބުން މި އިންސްޓިޓިއުޓް ވަރަށް ބޮޑުތަނުން ސިޔާސީ ވެގެން ގޮއްސަ އިންސްޓިޓިއުޝަނަލް މެމޮރީ އެއްކޮށް ގެއްލިގެން ދިޔުމުގެ ފުރުސަތު އެބައޮތް،" ޝަމްހީދު ވިދާޅުވިއެވެ.
އަދި މިހާރު ދައުލަތަށް ލިބޭ އާމްދަނީއާ ކުރާ ހޭދަ ނުބައްދަލު ވާހަކަ އަބަދު ދައްކަމުންދާއިރު، މި ބިލުގެ ބޭނުމަކީ މުވައްޒަފުންގެ މުސާރަ ބޮޑުކުރުން ކަމަށް އޭނާ ތުހުމަތުކުރެއްވިއެވެ. އޭރުން ޚަރަދުތައް އަނެއްކާވެސް އިތުރުވާނެ ކަމަށް ޝަމްހީދު ވިދާޅުވިއެވެ.
ބިލު ހުށަހެޅުމުގެ ބޭނުމެއްގެ ގޮތުގައި ފާހަގަކޮށްފައި ވަނީ ގާނޫނުއަސާސީގެ 133ވަނަ މާއްދާގެ (ހ)ގެ ދަށުން ބަންޑާރަނައިބުގެ މަގާމަށް އައްޔަނުކުރެވޭ ފަރާތެއްގައި ހުންނަންޖެހޭ ޝަރުތުތަކާއި، ބަންޑާރަނައިބުގެ ޒިންމާތަކާއި މަސްއޫލިއްޔަތުތަކާއި، އެ ޒިންމާތަކާއި މަސްއޫލިއްޔަތުތައް އަދާކުރުމުގައި ބަންޑާރަނައިބު ތަބާވާންޖެހޭ ހަމަތައް ކަނޑައެޅުމެވެ.
އަދި ބަންޑާރަނައިބާ މަތިކޮށްފައިވާ ޒިންމާތަކާއި މަސްއޫލިއްޔަތުތައް އަދާކުރުމަށްޓަކައި ބަންޑާރަނައިބުގެ އޮފީހުގެ ނަމުގައި ސިވިލް ސާވިސްގައި ނުހިމެނޭ ސަރުކާރުގެ ވަކި އޮފީހެއް ގާއިމުކުރުމަށް އެ ބިލުގައި ވަނީ ހިމަނާފައެވެ. އޭގެތެރޭގައި އެ އޮފީހުގެ މަސައްކަތްތައް ރޭވިފައިވާ ގޮތާއި، އެ އޮފީސް ހިންގުމާގުޅޭ އުސޫލުތަކާއި، އެ އޮފީހުގެ މުވައްޒަފުންނާ ގުޅޭ އެންމެހާ އުސޫލުތައް ކަނޑައެޅުމަށް ބޭނުންވާ ގާނޫނީ އޮނިގަނޑު އެކުލަވާލުން ހިމެނެއެވެ.
މިހާރު ބަންޑާރަނައިބުގެ އޮފީހަކީ ސިވިލް ސާވިސްގެ ދަށުން ހިންގާ އޮފީހެކެވެ.