ރާއްޖޭގެ އެކި ކަންކޮޅުތަކުގައި ބޭންކް އޮފް މޯލްޑިވްސް (ބީއެމްއެލް)ގެ ޚިދުމަތް ފެށިތާ މިއަދަށް 42 އަހަރު ވީއެވެ. ފައިސާ ނެގުމާއި ޓްރާންސްފާ ކުރުމާއި އެ ނޫން ވެސް މާލީ ޚިދުމަތްތައް ދިނުމުގެ ދިގު ދަތުރުގައި އަދިވެސް އެބަ ދެމިތިއްބެވެ. އެ ހުވަފެނުގައި ކުލަޖެހި، ހަގީގަތަކަށް ހަދަމުން އައީ އެ ބެންކުގެ މިންނަތް މަސައްކަތުންނެވެ.
ނަމަވެސް، އެ ބެންކުން އަދިވެސް ތިބީ ޚިދުމަތްތައް ހުއްޓާލާ ގޮތަކަށް ނޫނެވެ. އިތުރު ކުރުއެރުންތައް ހޯދަން އާ ޖޯޝަކާ އެއްކޮށް، ކުރިއަށްދާން ހިތްވަރު ލައިގެނެވެ. މުޖުތަމައަށް ފައުދާކުރަނިވި މާލީ ޚިދުމަތްތައް އިތުރަށް ފުޅާ ކުރުމުގެ މަސައްކަތުގައެވެ.
ބީއެމްއެލްގެ ޑޮލަރު އޭޓީއެމް މާފުށީގައި -- ފޮޓޯ/ ބީއެމްއެލް
42 އަހަރުގެ ޚިދުމަތުގައި ހާސިލުކުރި ކާމިޔާބީތައް
ބީއެމްއެލްގެ މާޒީއަށް ބަލައިލިޔަސް ރައްޔިތުންނަށް އެތައް އިންވެސްޓުމަންޓުތަކެއް ކޮށްފައި ހުރިކަން ހާމަވެއެވެ. ބީއެމްއެލްގެ މި އަހަރުގެ ތިންވަނަ ކުއާޓަރުގެ ރިޕޯޓު ދައްކާ ގޮތުން، މި ކުއާޓަރުގައި ހިންގުމުގެ ފައިދާއަށް 718 މިލިއަން ރުފިޔާ ހޯދާފައިވެއެވެ. މިއީ ކުރީ ކުއާޓަރާ އަޅާބަލާއިރު 2.9 ޕަސަންޓުގެ އިތުރުވުމެކެވެ.
މިގޮތުން، ތިންވަނަ ކުއާޓަރުގައި ސާފު ފައިދާއަށް 492 މިލިއަން ރުފިޔާ ހޯދައި، ދެވަނަ ކުއާޓަރަށް ވުރެ 9.6 ޕަސެންޓު ކުރިއަށް ޖައްސާލައިފިއެވެ. އެ ކުއާޓަރަށް އެކަނި ބެލިޔަސް، ވަކިވަކި ފަރުދުންނަށާއި ވިޔަފާރިތަކަށް 1.2 ބިލިއަން ރުފިޔާގެ އައު ލޯނު ދޫކޮށްފައިވެއެވެ.
މި އަދަދުތަކުން އެކަނި ވެސް ބީއެމްއެލްއިން ހޯދަމުން އަންނަ ކުރިއެރުންތައް ހާމަކޮށްދެއެވެ.
ބީއެމްއެލްގެ ސީއީއޯ މުޙައްމަދު ޝަރީފް --- ފޮޓޯ/ ރައީސް އޮފީސް
މިކަމުގެ އިތުރަށް ވެސް އޭޓީއެމްގެ ޚިދުމަތް މުޅި ރާއްޖޭގެއަށް ފުޅާ ކުރަން މަޝްރޫއެއް ވެސް ބީއެމްއެލްއިން ވަނީ އިފުތިތާހުކޮށްފައެވެ، އެ މަޝްރޫއުގެ ދަށުން އަންނަ އަހަރު ނިމެންވާއިރައަށް 100 އަށް ވުރެ ގިނަ ރަށުގައި އޭޓީއެމްތައް ބަހައްޓާނެއެވެ.
މިހާތަނަށް އައިއިރު، 90 ރަށުގައި ބީއެމްއެލްގެ 150 އޭޓީއެމް އެބަހުއްޓެވެ. އަލަށް ފެށި މަޝްރޫއާ އެއްކޮށް، އެ ބެންކުގެ އޭޓީއެމްގެ އަދަދު 250 އަށް އަރާނެއެވެ.
ދުނިޔޭގެ ކޮންމެ ތަނެއްގައި ހުރެގެން ވިޔަސް، ކަސްޓަމަރުންނަށް ފައިސާ ދެއްކޭނެ މަގު އެ ބެންކުން ވަނީ ތަނަވަސްކޮށްދީފައެވެ. ރާއްޖެއަށް ޒިޔާރަތްކުރާ ފަތުރުވެރިންނަށް ވެސް އެ ބޭންކުގެ ލުއި ފަސޭހަތައް ލިބޭނެ ގޮތްތައް ފަހިކޮށްދީފިއެވެ. މިގޮތުން، ފަތުރުވެރިންނަށް ވީޗެޓްޕޭ އަލިޕޭ، އެޕަލް ޕޭ އަަދި ގޫގުލް ޕޭ ފަދަަ މަގުބޫލު ޑިޖިޓަލް ވޮލެޓުތަކުން ފައިސާ ދެއްކޭނެ ގޮތް ވަނީ ހަދައިދީފައެވެ.
ޚިދުމަތް ފުޅާ ކުރަން އޮތް ތަޞައްވުރު ބޮޑު
މިދިޔަ ބުރާސްފަތި ދުވަހު ރައީސް އޮފީހުގައި ބޭއްވި ރަސްމިއްޔާތެއްގައި ބީއެމްއެލްގެ މެނޭޖިން ޑިރެކްޓަރު މުޙައްމަދު ޝަރީފް ވަނީ ކުރަން ރާވާފައި ހުރި ބައެއް ކަންތައްތަކަށްއ އަލިއަޅުއްވާލައްވާފައެވެ.
މިހާރު ވެސް އެ ބެންކުގެ ޕޭމަންޓުތައް 7،000 އަށް ވުރެ ގިނަ ވިޔަފާރިތަކުން ބޭނުންކުރާއިރު، އެ ބެންކުގެ ޚިދުމަތްތައް ފުޅާކުރަން ގިނަ މަސައްކަތްތަކެއް ކުރަން ބީއެމްއެލްއިން ވަނީ ނިންމާފައެވެ.
ހުޅުމާލޭގެ ފިތުރޯނު މަގުގައި ހުންނަ ރިނާޓަސް އިތާމުއިގައި ހުޅުވި ބޭންކިން ސެންޓަރު -- ފޮޓޯ/ ބީއެމްއެލް
"ބޭންކުގެ ޑިޖިޓަލް ބޭންކިންގެ ޚިދުމަތްތައް އިތުރަށް ތަރައްގީކޮށް، ފުރިހަމަ ކުރުމަށް ބޮޑެތި މަސައްކަތްތަކެއް މި އަންނަ އަހަރުން ފެށިގެން ކުރެވިގެންދާނެ. މީގެ ތެރޭގައި މޮބައިލް ބޭންކިން އެޕް، އިންޓަނެޓް ބޭންކިން ޕޭމެންޓް ގޭޓްވޭ ފަދަަ ޚިދުމަތްތަކަށް ފައިނޭންޝަލް ޓެކްނޮޖީއަށް އަންނަ ބަދަލުތަކާ އެއްގޮތްވާ ގޮތުގެ މަތިން ޒަމާނީ ބަދަލުތައް ގެނެސް އިތުރަށް ޑިޖިޓަލް ޚިދުމަތްތައް ތަޢާރަފުކުރުން ހިމެނޭ،" އަންނަ އަހަރުގެ ޕްލޭންތައް ޝަރީފް ތަފުސީލުކޮށްދެއްވިއެވެ.
ބީއެމްއެލްއަކީ ދިވެހީންގެ ބޭންކު ކަމަށްވާއިރު، ބީއެމްއެލްއިން ތިބީ ކަސްޓަމަރުންނަށް ރައްކާތެރި ޚިދުމަތްތަކެއް ދެވޭނެ ކަމުގެ އުންމީދުގައެވެ. މިހާރަށް ވުރެ ޚިދުމަތްތައް ފުޅާކުރުމަށް އަތުކުރި އޮޅާލައިގެންނެވެ. ބުރަ މަސައްކަތްތަކެއް ކުރުމުގެ ޖޯޝުގައެވެ. އެކިއެކި މަގުބޫލު މާލީ ޕްލެޓުފޯމުތަކާއި އެ ނޫން ވެސް ޚިދުމަތްތައް ތައާރަފުކުރާ ހިތުން ކެތްމަދުވެފައެވެ. މުސްތަގުބަލުގެ މިސްރާބަށް މަގުކޮށަން ތައްޔާރަށެވެ. ރައްޔިތުންގެ ހައްގުގައި ދެ ގޮތެއް ނެތި ކުރިއަށް ގޮސް، މޫނުތަކަށް ހިނިތުންވުމެއް ވެރިކުރެވޭނެ ދުވަހެއްގެ އިންތިޒާރުގައެވެ.