ކުރިއަށް އޮތް 2026 ވަނަ އަހަރުގެ ކުރިން ރާއްޖޭގެ ހުރިހާ ރަށެއްގައި ބޭންކް އޮފް މޯލްޑިވްސް (ބީއެމްއެލް)ގެ އޭޓީއެމް ޚިދުމަތްދޭން އެއްބަސްވުމެއްގައި މިއަދު ސޮއިކޮށްފިއެވެ.
އެ ކަމަށް ޚާއްސަކޮށް ބޭއްވި ރަސްމިއްޔާތެއްގައި، މީހުން ދިރިއުޅޭ ހުރިހާ ރަށަކަށް އޭޓީއެމްގެ ޚިދުމަތް އިފުތިތާހުކޮށްދެއްވީ ރައީސް ޑރ. މުޙައްމަދު މުއިއްޒެވެ.
އެ ޚިދުމަތް ފޯރުކޮށްދިނުމަށް ބީއެމްއެލާއި އިކޮނޮމިކް މިނިސްޓްރީއާ އެއްކޮށް އެއްބަސްވުމެއްގައި ސޮއިކޮށްފައިވެއެވެ. މިގޮތުން، އެއްބަސްވުމުގައި ސޮއިކުރެއްވީ ބީއެމްއެލްގެ މެނޭޖިން ޑިރެކްޓަރު މުޙައްމަދު ޝަރީފާއި އިކޮނޮމިކް މިނިސްޓަރު މުޙައްމަދު ސައީދެވެ.
މި މަޝްރޫއުގެ ދަށުން ބީއެމްއެލްއިން ގާއިމުކުރި 150 ވަނަ އޭޓީއެމް ހުޅުވީ މިއަދު އދ. އޮމަދޫގައެވެ.
ރާއްޖޭގެ ހުރިހާ ރަށެއްގައި ބީއެމްއެލްގެ އޭޓީއެމް ގާއިމުކުރަން އެއްބަސްވުމުގައި ސޮއިކުރަނީ -- ފޮޓޯ/ ރައީސް އޮފީސް
މި ރަސްމިއްޔާތުގައި ވާހަކަދައްކަވަމުން، ސީއީއޯ ޝަރީފް ވިދާޅުވީ، މި މަޝްރޫއު ކާމިޔާބުކުރުމަށް މި އަންނަ އަހަރު ނިމެންވާއިރަށް ހުރިހާ ރަށެއްގައި އޭޓީއެމްތައް ގާއިމުކުރެވޭނެ ކަމަށެވެ.
މި މަޝްރޫއަކީ ހުރިހާ ރައްޔިތުންނަށް މާލީ އެހީތެރިކަން ފޯރުކޮށްދިނުމަށް ބީއެމްއެލުން ކުރަމުން އަންނަ މަސައްކަތުގެ ހެއްކެއް ކަމަށް ޝަރީފް ވިދާޅުވިއެވެ.
އޭޓީއެމްގެ ޚިދުމަތް ފެށިތާ އަންނަ އަހަރަށް 25 އަހަރު ފުރޭއިރު، އަމާޒަކީ އަންނަ އަހަރު ތެރޭ 100 އަށް ވުރެ ގިނަ ރަށުގައި އޭޓީއެމްތައް ހުޅުވުން ކަމަށް ޝަރީފް ވިދާޅުވެފައިވެއެވެ.
ޝަރީފް ވިދާޅުވީ، މި މަޝްރޫއަކީ ކަސްޓަމަރުންނަށް ރައްކާތެރިކަމާ އެއްކޮށް، ޚިދުމަތް ފޯރުކޮށްދިނުމަށް ކަމަށެވެ. މީގެ އިތުރުން، ބުރަ މަސައްކަތްތަކެއް ކޮށް، އަންނަ އަހަރު ނިމެންވާއިރަށް މުޅި ރާއްޖޭގައި އޭޓީއެމްގެ ޚިދުމަތް ތައާރަފުކުރެވޭނެ ކަމަށް އޭނާ ވިދާޅުވިއެވެ.