ކޯޓުތަކުގައި މަދަނީ މައްސަލަތައް ތޮއްޖެހި، މައްސަލަތަކުގެ ހުކުމްތައް ތަންފީޒުނުވެ މުޅި ނިޒާމަށް ދަތިތައް ކުރިމަތިވާތީ، ޖުޑީޝަލް ސާވިސް ކޮމިޝަން (ޖޭއެސްސީ)އިން އިސްނަގައިގެން، މަދަނީ އިޖުރާއާތުގެ ގާނޫނަށް އިސްލާހު ގެނައުމުގެ ބިލެއް ޑްރާފުޓްކޮށް، ބަންޑާރަނައިބުގެ އޮފީހަށް މިއަދު ފޮނުވައިފިއެވެ.
ޖޭއެސްސީން ބުނި ގޮތުގައި 2021 ވަނަ އަހަރުގެ ޑިސެންބަރު 16ގައި ތަސްދީގުކޮށް، އޭގެ ހަ މަސް ފަހުން ގާނޫނަށް އަމަލުކުރަން ފެށުމާ އެކު ރާއްޖޭގެ ކޯޓުތަކުގައި މަދަނީ މައްސަލަތައް ތޮއްޖެހި، މައްސަލަތައް ލަސްވެ އަދި މައްސަލަތަކުގެ ހުކުމްތައް ތަންފީޒުނުވެ މުޅި ނިޒާމަށް މިއިން ދުވަހަކު ކުރިމަތި ނުވާވަރުގެ ދަތިތައް ވަނީ ކުރިމަތިވެފައެވެ.
އޭގެ ސަބަބުން ބޭންކުތަކާއި، ވިޔަފާރި އިންސްޓިޓިއުޝަންތަކާއި، އާއްމު ރައްޔިތުންގެ ވިޔަފާރިތައް ހުއްޓި، މަދަނީ އަދުލުގެ ނިޒާމަށް ބޮޑެތި މައްސަލަތަކެއް ކުރިމަތިވެފައިވާ ކަމަށް އެ ކޮމިޝަނުން ފާހަގަކުރިއެވެ. އެ މައްސަލަތަކަށް ހައްލެއް ހޯދެން އޮތީ މިހިނދުން މިހިނދަށް ގާނޫނަށް އިސްލާހުތަކެއް ގެނެވިގެންކަމަށް ޖޭއެސްސީން ބުންޏެވެ.
އެހެންކަމުން އެ ކޮމިޝަނުގެ އިސްނެގުމުގެ މަތިން، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއާއި، އިންޓަނޭޝަނަލަށް ބެސްޓް ޕްރެކްޓިސްއާ އެއްގޮތަށް، މަދަނީ އިޖުރާއާތުގެ ގާނޫނަށް ގެންނަން ފެންނަ އިސްލާހުތައް ބަންޑާރަނައިބުގެ އޮފީހަށް ފޮނުވާފައިވާ ކަމަށް އެ ކޮމިޝަނުން ބުންޏެވެ.
ބަންޑާރަނައިބު މެދުވެރިކޮށް މި ގާނޫނު އިސްލާހުކުރުމުގެ ބިލު، ރައްޔިތުންގެ މަޖިލީހުގެ އިދާރާއަށް ފޮނުވުމަށް މިދިޔަ ހޯމަ ދުވަހު ބޭއްވުނު ކޮމިޝަންގެ 57 ވަނަ ޖަލްސާއިން ނިންމަވާފައިވާތީ، މިއަދު މި އިސްލާހުތައް ބަންޑާރަނައިބުގެ އޮފީހަށް ވަނީ ހުށަހަޅާފައި، ޖުޑީޝަލް ސާވިސް ކޮމިޝަން
ކޯޓުތަކުގައި މައްސަލަތައް ފުނިޖެހިފައިވާ ވާހަކައަކީ އަބަދު ވެސް ދެކެވޭ ވާހަކައެކެވެ. ހުކުމް ނުކުރެވި، އެތައް ބަޔަކު ވާނުވާ ބަންދުގައި ވެސް އެބަތިއްބެވެ.
މި ސަރުކާރުން ވެސް ވެރިކަމަށް އައީ ވާނުވާ ބަންދަށް ނިމުމެއް ގެނެސް ކޯޓުތަކުގައި ނުނިމި ހުރި މައްސަލަތައް ބަލައި، ބާރު ސްޕީޑުގައި މައްސަލަތައް ނިންމާނެ ކަމަށް ބުނަމުންނެވެ.
ކޯޓުތަކުގައި މައްސަލަތައް ލަސްވާ އެންމެ ބޮޑު އެއް ސަބަބަކީ ޖާގައިގެ ދަތިކަމާއި މުވައްޒަފުންގެ ދަތިކަމެވެ. އެ މައްސަލަތަކަށް ހައްލު ހޯދައިދޭނެ ކަމަށް ސަރުކާރުން މީގެ ކުރިން ވަނީ ބުނެފައެވެ.