ހަށިގަނޑުގައި ރައްކާކޮށްގެން އެއް ކިލޯގެ މަސްތުވާތަކެތި ރާއްޖެއަށް އެތެރެކުރަން މަސައްކަތް ކުރި ބްރެޒިލްގެ މީހަކާއި، އެ ތަކެއްޗާ ހަވާލުވުމަށް ދިޔަ ކަމަށް ތުހުމަތު ކުރެވޭ ދިވެއްސަކު ހައްޔަރުކޮށް، ބަންދުގެ މުއްދަތު ޖަހައިފިއެވެ.
މި މައްސަލައިގައި ހައްޔަރުކޮށްފައިވަނީ އުމުރުން 44 އަހަރުގެ ބްރެޒިލް މީހަކާއި އޭނާ އެތެރެކުރަން މަސައްކަތްކުރި މަސްތުވާތަކެއްޗާ ހަވާލުވާން ދިޔަ ކަމަށް ތުހުމަތު ކުރެވޭ އުމުރުން 39 އަހަރުގެ ހުސައިން ފަރުޝާން ކިޔާ ދިވެއްސެކެވެ.
މި ދެ މީހުންގެ މައްޗަށް ވެސް ކުރަނީ މަސްތުވާތަކެތި ދިވެހިރާއްޖެއަށް އެތެރެކޮށް، ބޭނުންކޮށް، ގެންގުޅެ, ވިޔަފާރިކުރި ކަމުގެ ދައުވާއެވެ.
ކޯޓު އަމުރުގައި ބުނެފައިވާ ގޮތުގައި މިއީ ހަށިގަނޑު ތެރޭގައި މަސްތުވާތަކެތި ރައްކާކޮށްގެން ދިވެހިރާއްޖެއަށް އެތެރެކުރި ކަމަށް ތުހުމަތުކުރެވޭ މައްސަލައެއްގައި ފުލުހުން ހިންގި ކޮންޓްރޯލް ޑެލިވަރީ އޮޕަރޭޝަނެއްގައި އެތަކެއްޗާ އޭނާ ހަވާލުވާން އައިކަމަށް ތުހުމަތުކުރެވޭ މައްސަލައެކެވެ. އަދި މި މައްސަލާގައި މަސްތުވާތަކެތި ކަމަށް ޝައްކުކުރެވޭ 107 ބުލެޓް ފެނިފައިވާއިރު، ވަގުތީ ބަރުދަނުގައި އެއް ކިލޯއަށްވުރެ ގިނައިން ހުރި ކަމަށް ފުލުހުން ބުނެފައިވާ ކަމަށް އެ އަމުރުގައި ބުނެފައިވެއެވެ.
މި މައްސަލައަކީ ރޭވިގެން، ޖަމާއަތް ހަދައިގެން ހިންގާފައިވާ އަމަލެއް ކަމަށް ބެލެވޭ ކަމަށް އަމުރުގައި ވަނީ ފާހަގަކޮށްފައެވެ.
މި މައްސަލާގައި ދިވެހި ފިރިހެން މީހާގެ މައްޗަށް ތުހުމަތުކުރެވޭ ކޮންމެވެސް މިންވަރަކަށް ހެއްކާއި ގަރީނާ ހުށަހަޅާފައިވާއިރު، އޭގެ ތެރޭގައި ސީނަށް ދިޔަ ފުލުހުންގެ ބަޔާން ހިމެނެއެވެ. އަދި އޭނާގެ ކުޑަކަމުދާތަކެތީގެ ވަގުތީ ނަތީޖާއިން މަސްތުވާތަކެތީގެ ބާވަތެއް ކަމަށްވާ އޭއެމްޕީއަށް ޕޮޒިޓިވްވެފައިވާ ކަމަށް އިންވެސްޓިގޭޓިވް އޮފިސަރު ވަނީ ބުނެފައެވެ.
އެހެންކަމުން އޭނާ ބަންދުގައި ބަހައްޓަންޖެހޭ ހާލަތެއްގެ ގޮތުގައި ކޯޓު އަމުރުގައި ބުނެފައި ވަނީ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެކަމަށްޓަކައެވެ.
ހަމައެއާއެކު ކޯޓު އަމުރުގައި ބުނެފައިވާ ގޮތުން ބްރެޒިލް މީހާގެ މައްޗަށް ވެސް ތުހުމަތު ކުރެވޭ މިންވަރަށް ހެއްކާއި ގަރީނާ ހުށަހަޅާފައިވެއެވެ. އެގޮތުން މޯލްޑިވްސް ކަސްޓަމްސް ސާވިސްގެ މައްސަލަ ހަވާލުކުރާ ފޯމާއި، ސީޓީ ސްކޭން ރިޕޯޓުގެ އިތުރުން ސީނަށް ދިޔަ ފުލުހުންގެ ބަޔާނާއި، މަސްތުވާތަކެތީގެ މަންޒަރު ފެންނަ ފޮޓޯ ރިޕޯޓާއި އިތުރު ހެއްކާއި ގަރީނާ ވަނީ ހުށަހަޅާފައެވެ.
ދެމީހުން ވެސް ފަސް ދުވަހަށް ބަންދު ކުރުމަށް އަމުރުކޮށްފައިވާއިރު، އެ ދެމީހުންގެ ބަންދުގެ މުއްދަތު ހަމަވާނީ އަންނަ ހުކުރު ދުވަހަށެވެ.