ބަނގުރާބުއި ދިވެއްސެއް 40 އެތިފަހަރުން ޖަލްދުކޮށް، 2،700 ރުފިޔާއިން ޖޫރިމަނާ ކުރަން ކްރިމިނަލް ކޯޓުން މިދިޔަ ބުދަ ދުވަހު ހުކުމް ކޮށްފިއެވެ.
މި މައްސަލައިގައި ހުކުމްކުރީ، ބ. އޭދަފުށީ ކުއްޅަވައްގޭ އަބްދުލްފައްތާހު ހަސަންގެ މައްޗަށެވެ.
ދައުލަތުން އޭނާގެ މައްޗަށް ކުރި ދައުވާގައި ބުނެފައި ވަނީ މި އަހަރުގެ ޖުލައި 22ގައި މާލޭ ކާނިވާ ސަރަހައްދުގައި ޕާކުކޮށްފައި އޮތް ކާރެއްގައި، ފައްތާހު ބަނގުރާ ގެންގުޅުނު ކަމަށް ތުހުމަތު ކުރެވުމުން ސުވާލުކުރިކަމަށެވެ.
އެ ތަކެއްޗަކީ އޭނާ އަމިއްލައަށް ބޯން ގެންގުޅުނު ތަކެތި ކަމަށް އިއުތިރާފުވެފައިވާ ކަމަށް ވެސް ބުނެފައި ވެއެވެ.
މި މައްސަލައިގައި އޭނާގެ މައްޗަށް ކޮށްފައިވަނީ ބަނގުރާ ބުއިމުގެ ކުށުގެ ދައުވާއެވެ.
މި މައްސަލައިގައި އޭނާ ވަނީ ދައުލަތާއެކު އިއުތިރާފުގެ އެއްބަސްވުމެއް ހަދައި، އެއާ އެއްގޮތަށް އަދަބު ކަނޑައަޅައިދޭން ކޯޓުގައި އެދިފައެވެ. އެއްބަސްވުމުގައި ކަނޑައަޅާފައިވާ އަދަބަކީ، 13 ދުވަހާއި 12 ގަޑިއިރުގެ މުއްދަތަކަށް ޖަލަށްލުމުގެ އަދަބު ޖޫރިމަނާއަށް ބަދަލުކޮށް، 2،700 ރުފިޔާއިން ޖޫރިމަނާ ކުރުމަށެވެ. އަދި 40 އެތިފަހަރުން ޖަލްދު ކުރުމެވެ.
އެ ގޮތުން ކްރިމިނަލް ކޯޓުން ހުކުމްކޮށްފައި ވަނީ، ދައުލަތާއެކު ފައްތާހު ހަދާފައިވާ އެއްބަސްވުމުގެ ދަށުން، އޭނާ ތަންފީޒުކުރަންޖެހޭނެ ކަމަށް ދެ ފަރާތުން އެއްބަސްވެފައިވާ އަދަބު ކަމަށެވެ. އެއީ 40 އެތިފަހަރުން ޖަލްދުކޮށް 2،700 ރުފިޔާއިން ޖޫރިމަނާ ކުރުމެވެ.
ބަނގުރާ ބުއިމަކީ ގާނޫނުގައި ކަނޑައެޅިފައިވާ ކުށެކެވެ. އަދި ރާއްޖޭގައި ބަނގުރާ ގެންގުޅެވޭނީ ކަނޑައެޅިފައިވާ ގަވާއިދާ އެއްގޮތަށް، ހުއްދަ ހޯދައިގެންނެވެ.
ބަނގުރާ ބުއިމަކީ އިސްލާމްދީނުގައި ވެސް ހައްދު ކަނޑައެޅިފައިވާ ކުށެކެވެ. އެ ކުށުގެ އަދަބަކީ ހަށިގަނޑަށް ނުރައްކާތެރި އަނިޔާ ނުލިބޭނޭ ގޮތަށް، ހަންމުށިން ނުވަތަ ދުއްރައިން އެ މީހެއްގެ ގައިގައި ތެޅުމެވެ.