މި އަހަރުގެ މިހާތަނަށް ރާއްޖެއަށް ޒިޔާރާތްކުރި އިންޑިއާ ފަތުރުވެރިންގެ އަދަދު އެއްލައްކައަށް އަރައިފިއެވެ.
އިންޑިއާއަކީ މިއަހަރު ފެށުނުއިރު އެއްވަނަ މާކެޓު ކަމަށްވީ ނަމަވެސް، މިހާރު އޮތީ ލިސްޓުގެ ހަވަނައިގައެވެ.
ޓޫރިޒަމް މިނިސްޓްރީން މިއަދު ހާމަކުރި ތަފާސްހިސާބުތަކުން ދައްކާ ގޮތުން، އިއްޔެގެ ނިޔަލަށް އިންޑިއާއިން ވަނީ 101,963 ފަތުރުވެރިން ޒިޔާރާތްކޮށްފައެވެ. އެގައުމުގެ މާކެޓް ހިއްސާ މިހާރު ހުރީ 6.1 ޕަސެންޓުގައެވެ. އެއީ މިދިޔަ މަސް ފެށުނުއިރު ވެސް އިންޑިއާ މާކެޓުގެ ހިއްސާ އޮތް މިންވަރެވެ.
ރާއްޖެއަށް މިއަހަރު އެންމެ ގިނަ ފަތުރުވެރިން ޒިޔާރަތްކުރާ ޗައިނާއިން މިހާތަނަށް 240,401 މީހުން އައިސްފައިވެއެވެ. އެ ލިސްޓުގެ ދެވަނައިގައި މިހާރު އޮތީ ރަޝިއާއެވެ. އެ ގައުމުން އިއްޔެގެ ނިޔަލަށް 187,270 ފަތުރުވެރިން އައިސްފައިވެއެވެ.
ފަތުރުވެރިންތަކެއް: އިންޑިއާ ފަތުރުވެރިންގެ އަދަދު އެއް ލައްކައަށް އަރައި، މާކެޓުގެ 6.1 ޕަސެންޓު ކުރިއެރުމަކަށް --- ސަން ފޮޓޯ/ އަމަން ލަތީފް
އޭގެއިތުރުން، އެ ލިސްޓުގެ ތިންނަވައިގައި އޮތް އިނގިރޭސި ވިލާތުން 143،909 ފަތުރުވެރިން ޒިޔާރަތްކޮށްފައިވެއެވެ.
ލިސްޓުގައި ހިމެނޭ އިތުރު މާކެޓުތައް:
- ޖަރުމަނު: 127,446 ފަތުރުވެރިން
- އިޓަލީ: 115,425 ފަތުރުވެރިން
- ޔޫއެސްއޭ: 55,976 ފަތުރުވެރިން
- ފްރާންސް: 44,879 ފަތުރުވެރިން
- ސްޕެއިން: 39,568 ފަތުރުވެރިން
- ސްވިޒަލެންޑް: 32,903 ފަތުރުވެރިން
މިއަހަރުގެ މިހާތަނަށް 1.6 މިލިއަނަށް ވުރެ ގިނަ ފަތުރުވެރިން ޒިޔާރާތްކޮށްފައިވާއިރު، ސަރުކާރުގެ އަމާޒަކީ އަހަރުގެ ނިޔަލަށް އެ އަދަދު ދެ މިލިއަނަށް އެރުވުމެވެ.
މި މަހުގެ މިހާތަނަށް ބަލާއިރު، އެންމެ ގިނައިން ފަތުރުވެރިން ޒިޔާރަތްކޮށްފައި ވަނީ އިއްޔެއެވެ. އެގޮތުން، އިއްޔެ 6،828 ފަތުރުވެރިން ރާއްޖެއަށް އައިސްފައިވާ ކަމަށް ތަފާސްހިސާބުތަކުން ދައްކައެވެ.
އޭގެއިތުރުން، އެވަރެޖުކޮށް ދުވާލަކަށް 5،465 ފަތުރުވެރިން ރާއްޖެއަށް ޒިޔާރަތްކުރާއިރު، އާންމުކޮށް ހޭދަކުރަނީ 7.9 ދުވަހެވެ.
ފަތުރުވެރިން ރާއްޖޭގެ ރިސޯޓެއްގައި: އިންޑިއާ ފަތުރުވެރިންގެ އަދަދު އެއް ލައްކައަށް އަރައި، މާކެޓުގެ 6.1 ޕަސެންޓު ކުރިއެރުމަކަށް ---
މި ވެރިކަމުގެ ކުރީކޮޅު ދެ ގައުމުގެ ގުޅުން ގޯސްވެ، ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި އިންޑިއާއިން އަންނަ ފަތުރުވެރިންގެ އަދަދު ވަރަށް ބޮޑަށް މަދުވިއެވެ.
މީގެކުރިން، ރައީސް ޑރ. މުޙައްމަދު މުއިއްޒު ވަނީ ދިވެހިރާއްޖެއަށް ޒިޔާރަތްކުރާ އިންޑިއާ ފަތުރުވެރިންގެ އަދަދު އިތުރުކުރަން ބޭނުންފުޅުވާ ކަމަށް ވިދާޅުވެފައެވެ. އަދި ސަރުކާރުން އަންނަނީ އެ ގައުމުގެ ފަތުރުވެރިން ގެނައުމަށް ކެމްޕެއިންތައް ވެސް ހިންގަމުންނެވެ.