މި ސީޒަންގެ ފުރަތަމަ ކްރޫޒްލައިނާ، 2،779 ފަސިންޖަރުންނާއެކު މިއަދު ރާއްޖެ އަތުވެއްޖެއެވެ.
ސީޒަންގެ ފުރަތަމަ ކްރޫޒްލައިނާ، "އެމްއެސް އައިޑާ ސްޓެލާ" މިއަދު މާލެއަށް ބަނދަރުކުރީ މެންދުރު 11:00 ގައެވެ. މި ކްރޫޒްލައިނާއިން 2،140 ފަސިންޖަރުންނާއި 639 ފަޅުވެރިން އައިސްފައިވެއެވެ.
އެކްސްގައި ކުރި ޕޯސްޓެއްގައި މޯލްޑިވްސް އެސޯސިއޭޝަން ފޯ ޔޮޓް އެޖެންޓްސް (މާޔާ)އިން ބުނީ ކްރޫޒްލައިނާއިން އައި ފަސިންޖަރުން ރާއްޖޭގެ ރަށްތަކަށް ޒިޔާރާތްކުރުމުގައި ދެ ދުވަސް ހޭދަކުރާނެ ކަމަށެވެ.
އެކަމާ ގުޅިގެން "ސަން" އަށް މައުލޫމާތުދެއްވާ މާޔާގެ ރައީސް މުހައްމަދު ނަޝީދު ވިދާޅުވީ މިއަދު އައި ކްރޫޒްލައިނާ ރާއްޖެ އައީ އޮމާންގެ ވެރިރަށް މަސްކެޓުން ކަމަށެވެ. އަދި ދެ ދުވަހު ރާއްޖޭގައި މަޑުކުރުމަށްފަހު ދެން އެ ކްރޫޒްލައިނާގެ މަންޒިލަކީ ސްރީލަންކާގެ ވެރި ރަށް ކޮލޮމްބޯ ކަމަށް ނަޝީދު ވިދާޅުވިއެވެ.
ނަޝީދު ވިދާޅުވީ މި ސީޒަންގައި ގާތްގަނޑަކަށް 14 ނުވަތަ 15 ކްރޫޒްލައިނާ ރާއްޖެ އަންނާނެ ކަމަށް ލަފާކުރެވޭ ކަމަށެވެ. މި ސީޒަން ނިމޭނީ އަންނަ އަހަރުގެ މާޗު މަހަށް ކަމަށް ފާހަގަކުރައްވައި ނަޝީދު ވިދާޅުވީ މިއަހަރު ރާއްޖެ އަންނަ ކްރޫޒްލައިނާގެ އަދަދަކީ މާޔާއިން އުންމީދުކުރާ ވަރަށް ވުރެ ދަށް އަދަދެއް ކަމަށެވެ.
ޓޫރިޒަމް މިނިސްޓްރީގެ ގަވާއިދަށް އިސްލާހެއް ނުގެނެވި އެތައް ދުވަހެއްވުމުގެ ސަބަބުން ރާއްޖެއަށް އަންނަން އުޅޭ ޔޮޓުތަކާއި ކްރޫޒްލައިނާތައް ކެންސަލް ކުރަމުންދާތީ މީގެ ކުރިން ވެސް މާޔާއިން ކަންބޮޑުވުން ފާޅުކުރިއެވެ.
ޔޮޓުތަކާއި ކްރޫޒްލައިނާތައް ރާއްޖޭގައި ހޭދަކުރާ ދުވަހުގެ އަދަދު ވެސް ވަރަށް ބޮޑަށް ލިމިޓުކޮށްފައިވާ އިރު ރާއްޖެ އައިސް ޚިދުމަތެއް ނުލިބި އޮންނަންޖެހޭ ކަމަށް މާޔާއިން ކުރިން ފާހަގަކުރެއެވެ.
ނަޝީދު ވިދާޅުވީ އެކަމުގެ ސަބަބުން މިއަހަރު ކުރީކޮޅުގެ ސީޒަންއާއި މި ފެށުނު ސީޒަންގައި މާބޮޑު ކުރިއެރުމެއް ނުވަތަ ފައިދާއެއް ނުލިބޭނެ ކަމަށެވެ.
އެހެންނަމަވެސް މި ސަރުކާރު އައުމަށްފަހު އެ ގަވާއިދުތައް ޓޫރިޒަމް މިނިސްޓްރީން މިހާރު ބަދަލުކޮށްދީފި ކަމަށާއި، އަންނަ އަހަރުގެ ފަހުކޮޅުގެ ސީޒަނުން ފެށިގެން ރަނގަޅުވާނެ ކަމަށް އުންމީދުކުރާ ކަމަށް ނަޝީދު ވިދާޅުވިއެވެ.