މިދިޔަ އަހަރުގެ ރެކޯޑު މުގުރާލައި، 1.8 މިލިއަނަށް ވުރެ ގިނަ ފަތުރުވެރިން މިހާތަނަށް ރާއްޖެ ޒިޔާރާތްކޮށްފިއެވެ.
ޓޫރިޒަމް މިނިސްޓްރީން އެންމެ ފަހުން އާއްމުކުރި ތަފާސްހިސާބުތަކުން ދައްކާ ގޮތުގައި އިއްޔެގެ ނިޔަލަށް 1،877،567 ފަތުރުވެރިން ރާއްޖެ ވަނީ ޒިޔާރާތްކޮށްފައެވެ. މިދިޔަ އަހަރު ރާއްޖެއަށް އައިއިސްފައި ވަނީ 1،878،543 ފަތުރުވެރިންނެވެ.
މި އަހަރުގެ އަމާޒަކީ ދެ މިލިއަން ފަތުރުވެރިން ރާއްޖެ ގެނައުމެވެ.
އެކަމާ ގުޅިގެން ޓޫރިޒަމް މިނިސްޓަރު އިބްރާހީމް ފައިސަލް އެކްސްގައި ކުރެއްވި ޕޯސްޓެއްގައި ވިދާޅުވީ މިދިޔަ އަހަރު ރާއްޖެއައި ޓޫރިސްޓުންގެ އަދަދު ފަހަތަށް ޖައްސާލައިފި ކަމަށެވެ. އަދި އެ ކާމިޔާބީން ދައްކުވައިދެނީ ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކުގެ ހިތްވަރާއި، ޒިޔާރަތްކުރާ ފަރާތްތަކުގެ އެއްބާރުލުން ކަމަށް ފައިސަލް ވިދާޅުވިއެވެ.
އަދި މިއަހަރަށް ކަނޑައަޅާފައިވާ ދެ މިލިއަން ފަތުރުވެރިންގެ އަމާޒަށް ވާސިލްވުމުގައި ދެމިތިބޭނެ ކަމަށް މިނިސްޓަރު ވިދާޅުވިއެވެ.
މީގެ ކުރިން ފައިސަލް ވިދާޅުވި ގޮތުގައި މި މަހުގެ 25 ވަނަ ދުވަހަށް ދެ މިލިއަން ފަތުރުވެރިން ހަމަވާނެ ކަމަށް ތަފާސްހިސާބުން އަންދާޒާކުރެވެއެވެ.
ފާހަގަކޮށްލެވޭ ގޮތުގައި ވޯލްޑް ޓްރެވެލް އެވޯޑްސްގައި ރާއްޖެއަށް ވިދިވިދިގެން ފަސް ވަނަ ފަހަރަށް މި އަހަރު ވަނީ ވޯލްޑް ލީޑިން ޑެސްޓިނޭޝަންގެ އެވޯޑު ވެސް ލިބިފައެވެ. އޭގެ އިތުރުން މިއަހަރު ވަނީ އިތުރު އަށް ކެޓަގަރީއަކުން އެވޯޑް ހާސިލް ކޮށްފައެވެ. އޭގެތެރޭގައި ހިމެނެނީ:
- ވޯލްޑްސް ލީޑިން ގްރީން ޑެސްޓިނޭޝަން - ދިވެހިރާއްޖެ
- ވޯލްޑްސް ލީޑިން ސީޕްލޭން އޮޕަރޭޓާރ 2024 - ޓްރާންސް މޯލްޑިވިއަން އެއާވޭސް
- ވޯލްޑްސް ލީޑިން އެއާޕޯޓް ރިސޯޓް 2024 - ހުޅުލެ އައިލެންޑް ހޮޓެލް، ދިވެހިރާއްޖެ
- ވޯލްޑްސް ލީޑިން ލަގްޒަރީ ހަނީމޫން ރިސޯޓް 2024 - ވަކަރު މޯލްޑިވްސް
- ވޯލްޑްސް ލީޑިން ލަގްޒަރީ އައިލެންޑް ރިސޯޓް 2024 - ދަ ސެއިންޓް މޯލްޑިވްސް ވޮއްމުލި ރިސޯޓް
- ވޯލްޑްސް ލީޑިން ޕްރައިވެޓް އައިލެންޑް ރިސޯޓް 2024 - ވެލާ ޕަރައިވެޓް އައިލެންޑް، ދިވެހިރާއްޖެ
- ވޯލްޑްސް ލީޑިން ވޯޓާ ވިލާ ރިސޯޓް 2024 - އެމެރަލްޑް މޯލްޑިވްސް ރިސޯޓް އެންޑް ސްޕާ
މިނިސްޓަރު ފައިސަލް ވިދާޅުވި ގޮތުގައި އަންނަ އަހަރުގެ އަމާޒަކީ ވޯލްޑް ޓްރެވެލް އެވޯޑްސްގައި ގިނަ ކެޓަގަރީތަކަކުން ވާދަކޮށް މަދުވެގެން 15 އެވޯޑު ހާސިލްކުރުމެވެ.