އަސްކަރިއްޔާގެ ގާބިލުކަން އިތުރުކުރުން ހުއްޓިފައި އޮތުމަށްފަހު ފެށީ މިދައުރުގައި: ޣައްސާން

ދިވެހި އަސްކަރިއްޔާގެ ގާބިލުކަން އިތުރުކުރުމުގެ މަސައްކަތް މީގެ 15 އަހަރުކުރިން ހުއްޓުމަކަށް އައިސް އޮތުމަށްފަހު އަލުން ފަށާފައި ވަނީ މި ސަރުކާރު އައުމަށްފަހު ކަމަށް ޑިފެންސް މިނިސްޓަރު ޣައްސާން މައުމޫން މިރޭ ވިދާޅުވެއްޖެއެވެ.

ނަސްރުގެ ދުވަހުގެ ޚާއްސަ ޖަލްސާގައި މިރޭ ވާހަކަދައްކަވަމުން ޣައްސާން ވަނީ ނަސްރުގެ ދުވަސް ފާހަގަކުރުން ހީނަރުވެގެން އައި އައުން ހުއްޓުވައި، އަލުން ވަރަށް ކުލަގަދަކޮށް ފާހަގަކުރަން ފެއްޓެވިކަމަށްޓަކައި ރައީސް ޑރ. މުހައްމަދު މުއިއްޒަށް ޝުކުރުއަދާކުރައްވާފައެވެ.

ޣައްސާން ވިދާޅުވީ، ނޮވެމްބަރު 3ގައި ރާއްޖެއަށް އަރައިގަނެ ދިން އުދުވާނީ ހަމަލާތަކުން އެނގުނު އެއްޗަކީ ދިވެހި އަސްކަރިއްޔާގެ ގާބިލުކަން އިތުރުކުރަންޖެހިއްޖެކަން ކަމަށެވެ.

އެ ދުވަހުން އެނގުނު ގޮތަކީ، ދިވެހި އަސްކަރިއްޔާގެ ގާބިލުކަން އިތުރުކުރަން ޖެހިއްޖެކަމުގެ ރަނގަބީލު އެޅީ. އެ މަސައްކަތް އެ ހިސާބުން ފެށިގެން އައިސް 20 އަހަރުފަހުން ހުއްޓިފައި އަލުން ފެށިގެން ދިޔައީ 15 އަހަރުފަހުން މިދިޔަ ނޮވެމްބަރު 17ގައި، ޑިފެންސް މިނިސްޓަރު ޣައްސާން މައުމޫން

ޣައްސާން ވިދާޅުވީ އަސްކަރިއްޔާ ގާބިލުކުރުމުގެ މަސައްކަތުގެ ދަށުން މި ސަރުކާރަށް މަދު ދުވަސްކޮޅެއްގެ ތެރޭގައި ގިނަ ކާމިޔާބީތަކެއް ހޯދިއްޖެ ކަމަށެވެ. އެ ކާމިޔާބީތަކާއެކު ޣައްސާން ވަނީ ސިފައިންނަށް މެސެޖެއް ވެސް ދެއްވައިފައެވެ.

އެގޮތުން މިއަދަކީ ރައީސް މުއިއްޒު ގެނެސްދެއްވާ ޒަމާނީ ވަސީލަތްތައް ގައުމުގެ ދިފާއުގައި އަތުރާލާ ވިލަރެސްކުރަންވީ ދުވަސް ކަމަށް ޣައްސާން ވިދާޅުވިއެވެ. އަދި މިއަދަކީ ގައުމަށް ވަފާތެރި، ދިވެހި ރައްޔިތުންނަށް އިޚުލާސްތެރި، އަމުރަށް ކިޔަމަންތެރި، ހަރަކާތްތެރިވުމުގައި ހުޝިޔާރު، ކެރޭ، ގާބިލު އަދި ދިވެހި މިނިވަންކަން ދިފާއުކުރުމަށް ތައްޔާރަށް އޮތް ލަޝްކަރެއް އޮތްކަން ދުނިޔެއަށް ދައްކަންވީ ދުވަސް ކަމަށް ޣައްސާން ވިދާޅުވިއެވެ. ހަމައެއާއެކު މިއަދަކީ އަމިއްލަ ނަފުސަށްވުރެ ގައުމު އިސްކުރަންވީ ދުވަސް ކަމަށް ވިދާޅުވެ ޣައްސާން ވަނީ ސިފައިންނަށް ނަސޭހަތްތެރިވެ ވަޑައިގެންފައެވެ.

މިރޭ އަޅުގަނޑު ދޭ ޔަގީންކަމަކީ ދިވެހި އަސްކަރިއްޔާ ދެމިއޮތްހާ ހިނދަކު، މިރާއްޖޭގެ މިނިވަންކަމާއި، ސިޔާދަތާ އިސްތިގުލާލް، ސިފައިންގެ ހުވާގައިވާ ގޮތުގެ މަތިން ލެޔާއި ފުރާނައިން ގުރުބާންވެގެން ހިމާޔަތްކުރާނެކަން، ޑިފެންސް މިނިސްޓަރު ޣައްސާން މައުމޫން

ޣައްސާން ވަނީ ނޮވެމްބަރު 3ގެ ހަނދާންތައް އާކުރައްވައި އެ ދުވަހުގެ ލީޑަރުންގެ އަގުވަޒަންކުރައްވާފައެވެ.

ނޮވެމްބަރު 3ގެ ހަމަލާއަކީ ހ. ހާޖަރާގޭ އަބްދުﷲ ލުތުފީ އާއި ސ. ހިތަދޫ ޕެރިސްހޮލިޑޭ އަހުމަދު ނާސިރު އިސްވެ ހުރެ، ތަމަޅައިންނާއެކު އަރައި، ހަތިޔާރާއެކު ދިން އުދުވާނީ ހަމަލާއެވެ. އެ ދުވަހު ރާއްޖެއަށް ނަސްރު ލިބިގެން ދިޔައީ ދިވެހި އަސްކަރިއްޔާއިން ކުރި ހިތްވަރުގަދަ ޖިހާދުންނެވެ. އެ ޖިހާދުގައި 19 ބޭފުޅުން ޝަހީދުވެފައިވެއެވެ.