މިހާތަނަށް މުސާރަ ހާމަނައިޒްކޮށްފައިނުވާ ހުރިހާ ސިވިލް ސާވަންޓުންނާއި ޖުޑިޝަރީގައި މަސައްކަތްކުރާ މުވައްޒަފުންގެ މުސާރަތައް އަންނަ އަހަރު ތެރޭ ހާމަނައިޒްކުރަން އަންނަ އަހަރަށް ލަފާކޮށް މިއަދު ރައްޔިތުންގެ މަޖިލީހަށް ހުށަހެޅި ބަޖެޓުގައި ހިމަނައިފިއެވެ.
ޖުމުލަ 56.6 ބިލިއަން ރުފިޔާގެ ބަޖެޓުގައި ޕޭ ހާމަނައިޒޭޝަންގެ މަސައްކަތަށް 500 މިލިއަން ރުފިޔާ ވަނީ ހިމަނާފައެވެ.
މިދިޔަ އެމްޑީޕީގެ ސަރުކާރުގައި ވަނީ ދައުލަތުގެ ހުރިހާ މުވައްޒަފުންގެ މުސާރަތައް ހާމަނައިޒްކުރުމުގެ މަސައްކަތް ފަށާފައެވެ. އެ މަސައްކަތުގެ ތެރެއިން މިހާތަނަށް ސިއްހީ ދާއިރާއާއި ތައުލީމީ ދާއިރާއާއި ސަލާމަތީ ޚިދުމަތްތަކުގެ މުސާރަތައް ވަނީ ބޮޑުކޮށްފައެވެ.
އަންނަ އަހަރަށް ލަފާކުރާ ބަޖެޓު ހުށަހަޅަން މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި މާލީ ވަޒީރު މޫސާ ޒަމީރު ވިދާޅުވީ، މިހާތަނަށް ޕޭ ހާމަނައިޒްކޮށްފައިނުވާ ހުރިހާ ސިވިލް ސާވަންޓުންނާއި ޖުޑިޝަރީގައި މަސައްކަތްކުރާ މުވައްޒަފުންގެ މުސާރަތަކަށް ބަދަލު ގެންނަން ޖުމުލަ 500 މިލިއަން ރުފިޔާ ހިމަނާފައިވާނެ ކަމަށެވެ.
"އެ ނޫން އެހެން ހުރިހާ މުވައްޒަފުންގެ މުސާރަތަކަށް 2026 ވަނަ އަހަރު ބަދަލުގެނައުމަށް ވަނީ ރާވާފައި،" އޭނާ ވިދާޅުވިއެވެ.
ޕޭ ހާމަނައިޒްކުރުމުގެ މަސައްކަތް ފެށީ ދައުލަތުގެ ހުރިހާ މުވައްޒަފުންގެ މުސާރަތައް އެއްހަމަކޮށް، ކަރަމާތްތެރި ދިރިއުޅުމެއް އުޅެން ބޭނުންވާ ވަރުގެ ރަނގަޅު އުޖޫރައެއް ދިނުމުގެ މަގުސަދުގައެވެ.
ފާހަގަކޮށްލެވޭ ގޮތުގައި މި އަހަރު މިހާތަނަށް ވެސް މިދިޔަ އަހަރާ އަޅައިބަލާއިރު މުސާރައާއި އިނާޔަތްތަކަށް ކުރާ ހޭދައިން 1.3 ބިލިއަނެއްހާ ރުފިޔާ އިތުރުވެފައިވާ ކަމަށް މާލީ ހިސާބުތަކުން ވަނީ ދައްކާފައެވެ. އެއީ، ޕޭ ހާމަނައިޒްކުރުމުގެ ސަބަބުން އިތުރުވި މިންވަރެއް ކަމަށް މާލީ ވުޒާރާއިން ބުނެއެވެ.
އެހެންވެ، ޕޭ ހާމަނައިޒްކުރުމާ އެކު މުސާރައާއި އިނާޔަތްތަކަށް ކުރާ ހޭދަ ވަރަށް ބޮޑަށް ބޮޑުވާނެއެވެ.
އަންނަ އަހަރަށް ލަފައިކުރާ ބަޖެޓުގެ ޖުމުލަ ޚަރަދަކީ 49.2 ބިލިއަން ރުފިޔާއެވެ. އެއީ، ރިކަރަންޓް ޚަރަދުގެ ގޮތުގައި 35.9 ބިލިއަން ރުފިޔާއާއި ކެޕިޓަލް ޚަރަދުގެ ގޮތުގައި 13.3 ބިލިއަން ރުފިޔާއެވެ. އަންނަ އަހަރުގެ ޖުމުލަ އާމްދަނީއާއި ހިލޭ އެހީ 39.8 ބިލިއަން ރުފިޔާއަށް އަރާނެ ކަމަށްވަނީ އަންދާޒާކޮށްފައެވެ. އެއީ، ހިލޭ އެހީގެ ގޮތުގައި 2.5 ބިލިއަން ރުފިޔާ ހިމަނައިގެންނެވެ.
ދަރަނި އަނބުރާ ދައްކަން އަންނަ އަހަރުގެ ބަޖެޓުގައި 3.9 ބިލިއަން ރުފިޔާ ވަނީ ހިމަނާފައެވެ.
މާލީ ވުޒާރާއިން ބުނީ އަންނަ އަހަރުގެ ބަޖެޓުގައި ޖުމުލަ 11.5 ބިލިއަން ރުފިޔާގެ ފިސްކަލް އިސްލާހީ ފިޔަވަޅު ހިމަނާފައިވާ ކަމަށެވެ.
އެ ގޮތުން، ބަޖެޓުގައި ހިމަނާފައިވާ މާލީ އިސްލާހީ ފިޔަވަޅުތަކާ އެކު ދައުލަތުގެ ޚަރަދުން 6.6 ބިލިއަން ރުފިޔާ ކުޑަކުރެވޭނެ ކަމަށް ބަޖެޓުގައި ހިމަނާފައިވެއެވެ. އެ ކުޑަކުރާއިރު، އާމްދަނީ އިތުރުކުރަން އަޅާފައިވާ ފިޔަވަޅުތަކުގެ ސަބަބުން އާމްދަނީއަށް 4.9 ބިލިއަން ރުފިޔާ އިތުރުވާނެއެވެ.