ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބުނު މީހުންނަށް އަލުން ބިން ކަނޑައަޅަން ގުރުނެގުމުގެ މަސައްކަތުގައި ގޯތި ލިބޭ މީހުންގެ ބަދަލުގައި ސަރުކާރުގެ އޮފިޝަލުން ގުރުނަގާތީ އެއީ ކޮރަޕްޝަނަށް މަގުފަހިވާ ކަމެއްކަން ފާހަގަކޮށް، މިއަދުގެ ރައްޔިތުންގެ މަޖިލީހުގެ ޖަލްސާއަށް ހުށަހެޅި ކުއްލި މައްސަލަ ބޭރުކޮށްލައިފިއެވެ.
މި ކުއްލި މައްސަލަ ހުށަހަޅާފައި ވަނީ އިދިކޮޅު އެމްޑީޕީއަށް ނިސްބަތްވާ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމެވެ.
މި ކުއްލި މައްސަލަ ބަލައިގަނެ، ބަހުސްކުރުމަށް ނެގި ވޯޓުގައި ކުއްލި މައްސަލަ ބަލައިގަތުމަށް ވޯޓުދެއްވީ އެންމެ 10 މެންބަރުންނެވެ. ކުއްލި މައްސަލަ ބަލައިނުގަތުމަށް 46 މެންބަރުން ވޯޓުދެއްވިއެވެ.
އެއާއެކު ކުއްލި މައްސަލަ ވަނީ މަޖިލީހުން ބޭރުކޮށްލާފައެވެ.
ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބުނު މީހުންނަށް އަލުން ބިން ކަނޑައަޅަން ގުރުނެގުމުގެ މަސައްކަތް އިއްޔެ ވަނީ ފަށައިފައެވެ.
އެ ކުއްލި މައްސަލަ މެންބަރު މީކާއިލް ހުށަހެޅުއްވީ ބިންވެރިޔާ ސްކީމްގެ ދަށުން ގުޅިފަޅުން ގޯތި ލިބުނު މީހުންނަށް ސަރުކާރުން ހަމަޖައްސައިދޭ ޕްލޮޓްތަކުގެ ގުރުނެގުމަށް ސަރުކާރުގެ އޮފިޝަލުން ހަމަޖައްސާފައިވާ މައްސަލައާއި ގޯއްޗާއި ފުލެޓު ލިބުނު މީހުންނަށް އެ ތަންތަން ހަވާލުކުރުން ލަސްވެފައިވާ މައްސަލައިގައި ކަންބޮޑުވުން ފާޅުކޮށްފައެވެ.
އެގޮތުން ގުރުނެގުމުގެ މަސައްކަތް ކުރިއަށް ގެންގޮސްފައި ވަނީ ގޯތީގެ ހައްގުވެރިންނަށް ދުރާލާ އެންގުމަކާ ނުލާ ކަމަށް މީކާއިލް ވިދާޅުވިއެވެ. އަދި މިނިސްޓްރީގެ އޮފިޝަލުން ގުރުނެގުމުގެ މަސައްކަތް ކުރާތީ އެއީ، އެތައް ހާސް ރައްޔިތުންގެ ހައްގަކަށް އަރައިގަތުން ކަމަށް މީކާއިލް ވިދާޅުވިއެވެ. އެކަމުގެ ސަބަބުން ކޮރަޕްޝަނަށް މަގުފަހިވާކަމަށް ވެސް މީކާއިލް ވިދާޅުވިއެވެ.
މީކާއިލް ވިދާޅުވި ގޮތުގައި މިއީ އެކަމުގައި ރައްޔިތުންގެ ކަންބޮޑުވުން އޮތް ކަމެކެވެ.
"...ސަރުކާރުން އަމަލުކުރާގޮތް ކުށްވެރިކޮށް، ދެފުއްފެންނަ ހާމަކަންބޮޑު ގޮތަކަށް އެކަން ކުރުމަށް އަދި ފްލެޓް ލިސްޓް އަވަހަށް ލަސްނުކޮށް ހާމަކުރުމަށް ގޮވާލަން،" މީކާއިލް ވިދާޅުވިއެވެ.
މީގެ ކުރިން ވެސް ގުޅީފަޅާއި ގިރާވަރުފަޅުން ގޯތި ލިބުނު މީހުންނަށް ގޯތި ލިބުނު ތަންތަނުގެ އިތުރުން ގޯތީގެ ރަޖިސްޓްރީ ހަވާލުކޮށްފައި ވާއިރު މިހާރު އަލުން ގުރު ނަގަނީ މުޅި ގުޅީފަޅުގެ ލޭންޑް ޔޫސް ޕްލޭން އެއްކޮށް ބަދަލުކުރުމުން، މިނިސްޓްރީން އަލުން ގުރުނެގުމަށް ނިންމުމުންނެވެ.
ގުޅީފަޅުން މިހާރު ދޫކުރުމަށް ނިންމާފައި ވަނީ 3،520 ގޯއްޗެވެ. މީގެތެރޭގައި ގިރާވަރުފަޅުން ލިބުނު ގޯތި ގުޅީފަޅަށް ބަދަލުކުރި މީހުން ވެސް ހިމެނެއެވެ. ގޯތިލިބޭ މީހުންގެ ގުރުއަތުނަގާ ނިމުމުން، ގޯތިތަކުގެ ރަޖިސްޓްރީއާއި، ބިން ލިބޭ މީހުންނާއެކު ހަދާ އެއްބަސްވުންތަކާ ގުޅޭ މައުލޫމާތު ހައުސިން މިނިސްޓްރީން ދޭނެކަން ވަނީ އިއުލާންކޮށްފައެވެ.
ނިމިދިޔަ ސަރުކާރުން ވަނީ ގުޅިފަޅުން 150 ހެކްޓަރުގެ ބިން ހިއްކާފައެވެ. އަދި މިހާރުގެ ސަރުކާރުން ވަނީ ގުޅީފަޅުން އިތުރު 85 ހެކްޓަރު ހިއްކުމަށް ނިންމާފައެވެ.
ނިމިދިޔަ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއެއް ކަމަށްވާ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ވަނީ ނިންމައިފައެވެ. އެ ސްކީމްގެ ދަށުން ގޯތި ދޫކުރަނީ ގިރާވަރުފަޅާއި ގުޅިފަޅުގެ އިތުރުން ހުޅުމާލެ ހިއްކައިގެންނެވެ.