ރާއްޖޭގެ އެކި ސަރަހައްދުތަކުގައި އާބަން ސެންޓަރުތައް ގާއިމުކުރުމާ ގުޅޭ ގޮތުން ހުށަހަޅައިފައިވާ އާބަން ޑިވެލޮޕްމެންޓް ބިލާ ގުޅޭ ގޮތުން ހުރި ކަންބޮޑުވުންތައް ފާޅުކުރުމަށް, ލޯކަލް ގަވަމެންޓް މިނިސްޓަރު އާދަމް ޝަރީފް އުމަރާ ބައްދަލުކުރަން އެމްޑީޕީއިން މިއަދު މަސައްކަތްކޮށްފިއެވެ.
އެމްޑީޕީގެ މެންބަރުންތަކެއް މިއަދު ހެނދުނު ލޯކަލް ގަވަމެންޓް މިނިސްޓްރީއަށް ގޮސް، މަސައްކަތް ކުރީ މިނިސްޓަރާ ބައްދަލުކޮށް، އާބަން ޑިވެލޮޕްމެންޓް ބިލާ ގުޅޭ ގޮތުން ހުރި ކަންބޮޑުވުންތައް ހިމެނޭ ސިޓީއެއް ހަވާލުކުރުމަށެވެ. ނަމަވެސް، އެ މެންބަރުންނާ ބައްދަލުކުރެއްވީ މިނިސްޓަރުގެ ނައިބު މުޙައްމަދު އާރިފެވެ.
ސަރުކާރުގެ ފަރާތުން، ވިލިނގިލި ދާއިރާގެ މެންބަރު އާޒިމް އަބްދުލްއަޒީޒް ހުށަހަޅުއްވާފައިވާ އާބަން ޑިވެލޮޕްމެންޓް ބިލު ދިރާސާ ކުރަމުން އަންނަނީ ތަރައްގީ އާއި ތަރިކައިގެ ކޮމިޓީއާއި ލާމަރުކަޒީ ކޮމިޓީގެ ޖޮއިންޓް ކޮމިޓީއަކުންނެވެ.
އެ ކޮމިޓީގައި ހިމެނިވަޑައިގަންނަވާ ތޮއްޑޫ ދާއިރާގެ އެމްޑީޕީގެ މެންބަރު ހުސައިން ސަމީރު ނޫސްވެރިންނާ ވާހަކަދައްކަވަމުން ވިދާޅުވީ އާބަން ޑިވެލޮޕްމެންޓް ބިލާ ގުޅޭ ގޮތުން ކައުންސިލްތަކާއި ޖަމިއްޔާ ޖަމާއަތްތަކުގެ ގިނަ ކަންބޮޑުވުންތަކެއް ހުރި ކަމަށެވެ. އެގޮތުން ސިޓީގައި ފާހަގަކޮށްފައިވަނީ އެ ކަންބޮޑުވުންތައް ކަމަށް އޭނާ ވިދާޅުވިއެވެ.
"އެމްއެންޔޫއިން ވާނެ މިކަމާ ބެހޭ ދިރާސާއެއް ހަދައިފައި، އެ ދިރާސާއިން ވަރަށް ސާފުކޮށް އެބަ ދައްކާ މި ރާއްޖޭގެ ރައްޔިތުން ބޭނުންވަނީ މިހާރު މި އޮތް ގޮތަށް އެމްޑީޕީން މި ގެނައި ގޮތަށް ލާމަރުކަޒީ ނިޒާމު އިތުރަށް ފައްކާ ކޮށް އިތުރަށް އޭގައި ހުރި މައްސަލަތައް ހައްލުކޮށްގެން ކުރިއަށްދާންކަން،" ސަމީރު ވިދާޅުވިއެވެ.
އޭނާ ވިދާޅުވީ އެ މައްސަލައިގައި ކައުންސިލް ތަކުން ކޮމިޓީއަށް ގޮސް ކަންބޮޑުވުންތައް ފާޅުކުރަން ބޭނުންވާ ކަމަށާއި އެ ޖޮއިންޓް ކޮމިޓީގައި ވެރިކަން ކުރާ ޕީއެންސީގެ 20 މެންބަރުން ތިއްބަވާއިރު، އެމްޑީޕީން ތިބެނީ ދެ މެންބަރުން ކަމަށެވެ.
މީގެ އިތުރުން ބިލްގެ މަސައްކަތަށް އެއް މަސް ދޭން ސަމީރު އެދިވަޑައިގަތް ނަމަވެސް ކޮމިޓީން ނިންމީ އަންނަ އަންގާރަ ދުވަހަށް މަސައްކަތްތައް ނިންމަން ކަމަށް އޭނާ ވިދާޅުވިއެވެ. އަދި އެމްޑީޕީގެ ސިޓީ ހުށަނޭޅިއްޖެ ނަމަ ބިލުގެ މަސައްކަތް ނިމެނީ އެ ޕާޓީއާއި ކައުންސިލްތަކުގެ ކަންބޮޑުވުންތަކަށް ރިއާޔަތް ނުކޮށް ކަމަށް ސަމީރު ވިދާޅުވިއެވެ.
"އަޅުގަނޑަށް ޔަގީންވާ ކަމަކީ މިއަދު މިކަން ނުވެއްޖެ ކަމަށްވާނަމަ އަޅުގަނޑުމެންގެ ލާމަރުކަޒީ ގާނޫނުގެ ބާރު ކެނޑި ރައްޔިތުން ބުނާ، ރައްޔިތުން ގާތުން ކުރަމުންދާ ވެރިކަން ނިމުމަކަށް އަންނާނެކަން ޔަގީންވެގެންދާނެ،" އޭނާ ވިދާޅުވިއެވެ.
ސަމީރު ވިދާޅުވީ އެ ބިލް ފާސްކުރުމުން ކައުންސިލްތަކުގެ ބާރު ކެނޑި، ހަމައެކަނި މުނިސިޕަލް މަސައްކަތް ކުރަން ތިބޭ ބަޔަކަށް ކައުންސިލްތައް ވާނެ ކަމަށާއި އެހެންކަމުން ބިލާ ގުޅޭ ގޮތުން ކަންބޮޑުވުން ފާޅުކުރުމުގައި ކައުންސިލްތަކުން ވެސް ބައިވެރިވާން ޖެހޭ ކަމަށެވެ.
އެމްޑީޕީން މިއަދު ލޯކަލް ގަވަމެންޓް މިނިސްޓަރާ ބައްދަލުކުރަން އެ މިނިސްޓްރީއަށް ދިޔައިރު، އާންމު އުސޫލެއްގެ ގޮތުން މިނިސްޓަރުންނާ ބައްދަލުކުރެވޭނީ އެޕޮއިންޓްމެންޓް ހައްދައިގެންނެވެ.
ރާއްޖޭގައި އާބަން ސެންޓަރުތައް ހެދުމަކީ ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެކެވެ. އެ ވައުދުފުޅުގެ ދަށުން ރާއްޖޭގެ އެންމެ އުތުރާއި އެންމެ ދެކުނުގައި، އިންޓަގްރޭޓެޑް ޑިވެލޮޕްމަންޓް ޒޯނުގެ ދެ ޒޯނެއް ތަރައްގީކޮށް، ރާއްޖޭގެ އެހެން ސަރަހައްދުތައް ޝާމިލުވާހެން ހަތް އާބަން ސެންޓަރެއް ހަދާނެއެވެ.