ސަރުކާރުން ބޭހުގެ އަގު ކޮންޓްރޯލް ކޮށް އަސަންދަ ރިޕޯމްކުރުމަށް ކުރާ މަސައްކަތުގެ ތެރެއިން، އާސަންދަ ސްކީމްގެ ދަށުން އެންމެ ގިނައިން ދޫކުރެވޭ 250 ބޭހެއްގެ އަގަށް ބަދަލުގެނައުމަށް ނިންމައިފިއެވެ.
ސަރުކާރުން ނިންމާފައި ވަނީ އަގު މުރާޖައާ ކުރެވިފައިވާ 87 ބޭހެއްގެ އަގަށް ނޮވެމްބަރު އެކަކުން ފެށިގެން ބަދަލު ގެނައުމަށެވެ. އަދި 126 ބޭހެއްގެ އަގަށް ނޮވެމްބަރު 24އިން ފެށިގެން ބަދަލު ގެނައުމަށެވެ.
މި ނިންމުމާ ގުޅިގެން ރައީސް އޮފީހުގެ ތަރުޖަމާނު އަދި ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ މެނޭޖިން ޑިރެކްޓަރު ހީނާ ވަލީދު ވިދާޅުވީ މި ނިންމުމާއެކު 220 މިލިއަން ރުފިޔާ ސަލާމަތްކުރެވޭނެ ކަމަށެވެ.
ހީނާ ވިދާޅުވީ މިއީ މާކުރިންވެސް އެކި ސަރުކާރުތަކުން ކުރުމަށް އެކި ތާރީޚުތައް ދީފައިވާ ކަމެއް ކަމަށެވެ. ނަމަވެސް މިއީ މިހާތަނަށް އެއްވެސް ސަރުކާރަކަށް ނުކުރެވި އޮތް ކަމެއް ކަމަށް ހީނާ ވިދާޅުވިއެވެ.
މި ބަދަލާއެކު ވެސް ހީލޭ ބޭސް ލިބުމަކަށް އެއްވެސް ބަދަލެއް ނާންނާނެ ކަމަށާއި އެސްޓީއޯ އަދި އެހެނިހެން ފާމަސީތަކުން ހިލޭ ބޭސް ލިބޭނެ ކަމަށް ހީނާ ވިދާޅުވިއެވެ.
މިއީ، ބަލްކް ޕްރޯކިއުމަންޓް ގެ ސިޔާސަތު ބަދަލުވުމެއް ނޫން. ބަލްކް ޕްރޮކިއުމަންޓް ކުރިންވެސް އިއުލާންކޮށްފައިވާ ގޮތަށް ކުރިޔަށް ދާނެ. މިއީ އެކަން ފުރިހަމަ ވަންދެންވެސް ހިނގަމުންދަ ބޮޑު އިސްރާފު ހުއްޓުވުމުގެ ފިޔަވަޅެއް، ރައީސް އޮފީހުގެ ތަރުޖަމާނު ހީނާ ވަލީދު
އެންސްޕާއިން ނެރުނު ބަޔާނެއްގައި ބުނީ، ދިވެހި ރައްޔިތުންނަށް ރަނގަޅު ފެންވަރުގެ އަސާސީ ސިއްޙީ ޚިދުމަތް ފޯރުކޮށްދިނުމަށްޓަކައި އާސަންދަ ސްކީމް، ދެމެހެއްޓެނިވި ގޮތެއްގައި ފެންވަރު ރަނގަޅު ޚިދުމަތްތަކެއް ފޯރުކޮށްދެވޭ ނިޒާމަކަށް ހެދުމަށްޓަކައި މަސައްކަތްތަކެއް ކުރަމުންދާ ކަމަށެވެ.
އެ މަގުސަދުތައް ހާސިލުކުރުމަށްޓަކައި އާސަންދަ ސްކީމްގެ ދަށުން އެންމެ ގިނައިން ދޫކުރެވޭ 250 ބޭހުގެ އަގަށް ބަދަލުގެނައުމަށް ނިންމީ ކަމަށް އެ އެޖެންސީން ބުންޏެވެ. އަދި އަގު މުރާޖައާ ކުރެވޭ ބޭހުގެ ތަފްސީލު އެ ތާރީޚަކުން ފެށިގެން އާސަންދަ ކުންފުނި ވެބްސައިޓުން ފެންނަން ހުންނާނެ ކަމަށް ވަނީ ބުނެފައެވެ.
އެ އެޖެންސީން ވަނީ ޝާއިއުކުރެވިފައިވާ ލިސްޓާ ޚިލާފަށް ޚިދުމަތްދޭ މަރުކަޒަކުން ބޭސް ދޫކުރާކަން ފާހަގަ ކުރެވިއްޖެނަމަ އެކަން "ޝިކާވަތި" ޗެޓްލައިން 7951400އަށް ރިޕޯޓް ކުރުމަށް އެދިފައެވެ.
ގައުމީ ސިއްހީ އިންޝުއަރެންސް ނިޒާމުކަމުގައިވާ އާސަންދައިން ކޮންމެ އަހަރަކު ވެސް އެންމެ ބޮޑު ޚަރަދެއް ކުރަނީ ބޭހަށެވެ. އެހެންކަމުން ބޭހަށް ކުރާ ޚަރަދު ވަނީ އިންތިހާއަށް ބޮޑުވެފައެވެ. އާސަންދައަށް މަޖިލީހުން ފާސްކުރާ ބަޖެޓަށް ވުރެ ބޮޑު ހޭދައެއް ކޮންމެ އަހަރަކު އާސަންދައަށް ކުރަންޖެހި އެ ނިޒާމުވަނީ ދައުލަތަށް ބޮޑު ބުރައަކަށް ވެފައެވެ.
އާސަންދައަށް މިއަހަރު ކަނޑައަޅާފައިވާ ބަޖެޓު ވެސް ހުސްވެ، ޚަރަދުތައް ދެ ބިލިއަން ރުފިޔާއަށް އަރައިފައިވާކަން އެ ކުންފުނީގެ ތަފާސްހިސާބުތަކުން ވަނީ ދައްކައިފައެވެ. މި އަހަރަށް އާސަންދައަށް ބަޖެޓުކުރީ 1.9 ބިލިއަން ރުފިޔާއެވެ. ނަމަވެސް ތިންވަނަ ކުއާޓަރު ނިމުނުއިރު އާސަންދައިން 2.5 ބިލިއަނަށް ވުރެ ގިނަ ރުފިޔާ ޚަރަދުކޮށްފައިވެއެވެ.
ރާއްޖެއިން ފެންވަރު ރަނގަޅު ބޭސް ލިބޭނެ ގޮތް ކަށަވަރު ކުރުމަށްޓަކައި، ޔޫރަޕްގެ ގައުމުތަކުގައި ބޭނުންކުރުމަށް އެގައުމުތަކުގެ ސިއްހީ އިދާރާތަކުން ހުއްދަދީފައިވާ ބޭސް މި އަހަރުގެ ޖުލައި މަހުގެ 22 ގައި ފުރަތަމަ ފަހަރަށް ވިއްކަން ވެސް ވަނީ ފަށައިފައެވެ.
އާސަންދައިގެ ނިޒާމު އޮންނަ ގޮތަށް އަބަދު ވެސް ފާޑުކިޔުން އަމާޒުވެއެވެ. މި ސަރުކާރުން ވަނީ އާސަންދް ރިފޯމް ކުރުމުގެ މަސައްކަތްތައް ފަށައިފައެވެ.
އެގޮތުން، ޕްރައިވެޓް އިންޝުއަރެންސް އޮންނަ މީހުންނަށް އާސަންދަ ދޭ އުސޫލު ބަދަލުކުރާނެ ކަމަށާއި، އާސަންދަ ދިނުމުގައި އާސަންދައިގެ ހައްގުވެރިންނަށް އިސްކަން ދޭނެކަމަށް މީގެ ކުރިން ސަރުކާރުން ވަނީ ބުނެފައެވެ.