ކުރީގެ ރައީސް އަބްދުﷲ ޔާމީން އަބްދުލްގައްޔޫމާ ދެކޮޅަށް ދައުލަތުން އުފުލާފައިވާ ދައުވާތައް ރިވިއުކޮށްދޭން އެ މަނިކުފާނުގެ ފަރާތްޕުޅުން ޕްރޮސެކިއުޓާ ޖެނެރަލް (ޕީޖީ) އޮފީހުގައި އެދިވަޑައިގެންފައިވާކަން އެނގިއްޖެއެވެ.
ކުރީގެ ޕީޖީ ހުސައިން ޝަމީމްގެ ނިންމުންތަކާ ގުޅޭ ގޮތުން ޝަކުވާ ހުށަހަޅަން މި މަހު ވަނީ 20 ދުވަހު ފުރުސަތެއް ހުޅުވާލައިފައެވެ. އެ މުއްދަތު ހަމަވިއިރު 539 ޝަކުވާ ހުށަހަޅާފައިވާ ކަމަށް ޕީޖީ އޮފީހުން ބުންޏެވެ.
ޔާމީންގެ ގާނޫނީ ވަކީލު އަދި އެންމެ އަރިސްކޮށް މިހާރު މަސައްކަތްކުރައްވާ ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވަނީ މައްސަލަތައް ރިވިއުކުރަން ޔާމީންގެ ފަރާތްޕުޅުން ޕީޖީ އޮފީހަށް ހުށަހެޅިކަން 'ސަން'އަށް ކަށަވަރުކޮށްދެއްވައިފައެވެ.
އެކަމަކު، މައްސަލައާ ގުޅޭ އިތުރު ތަފުސީލެއް އޭނާ ނުދެއްވައެވެ.
މިދިޔަ ސަރުކާރުގެ ދުވަސްވަރު ޖުމުލަ ތިން މައްސަލައެއްގައި ޔާމީނާ ދެކޮޅަށް ދައުވާކުރިއެވެ. އެންމެ ފުރަތަމަ އެ މަނިކުފާނާ ދެކޮޅަށް ދައުވާކުރީ ގއ. ވޮޑަމުލާ ކުއްޔަށް ދިނުމުގެ މުއާމަލާތާ ގުޅިގެންނެވެ.
އެ މައްސަލަ ޔާމީންގެ މައްޗަށް ސާބިތުވާ ކަމަށް ކަނޑައަޅައި ފަސް އަހަރު ދުވަހުގެ ޖަލު ހުކުމެއް އިއްވިއެވެ. އެކަމަކު، ފަހުން ސުޕްރީމް ކޯޓުން ވަނީ އެ މައްސަލަ ޔާމީންގެ މައްޗަށް ސާބިތުނުވާ ކަމަށް ކަނޑައަޅައި އެ މަނިކުފާނު މިނިވަންކޮށްފައެވެ.
އޭގެ ފަހުން އެ މަނިކުފާނާ ދެކޮޅަށް ދައުވާކުރީ ވ. އާރަށް ކުއްޔަށް ދޫކުރުމުގައި ޚިޔާނާތްވެ، އެ ފައިސާ ލޯންޑާކުރި ކަމަށް ބުނެއެވެ. އެ ދެ ދައުވާ ވެސް ސާބިތުވާ ކަމަށް ކަނޑައަޅައި އެ މަނިކުފާނުގެ މައްޗަށް ދަށު ކޯޓުން 2022 ވަނަ އަހަރު 11 އަހަރުގެ ޖަލު ހުކުމެއް އިއްވިއެވެ.
އެކަމަކު، ހައިކޯޓުން މި އަހަރުގެ އޭޕްރީލް 18 ގައި ވަނީ ދަށު ކޯޓު މަރުހަލާގައި ބޮޑެތި ގޯސްތަކެއް ހަދާފައިވާކަން ފާހަގަކޮށް ހުކުމް ބާތިލުކޮށްފައެވެ. ހައިކޯޓުންވަނީ ދަށު ކޯޓުން އެ މައްސަލަ އަލުން ބަލަން އަންގައިފައެވެ.
ޔާމީނާ ދެކޮޅަށް ދަށު ކޯޓުގައި އިތުރު މައްސަލައެއް ވެސް އެބަ ހިނގައެވެ. އެހެންވެ، މިހާރު އެ މަނިކުފާނާ ދެކޮޅަށް ހިނގަނީ އެ ދެ މައްސަލައިގެ ދައުވާއެވެ.
ދިވެހި ތާރީޚުގައި ހިނގި އެންމެ ބޮޑު ޚިޔާނާތް، އެމްއެމްޕީއާރުސީ ޚިޔާނާތާ ގުޅުވައި އިދިކޮޅު ފަރާތްތަކުން ޔާމީނަށް ބޮޑެތި ތުހުމަތުތަކެއް ކުރެއެވެ. އެކަމަކު، އެ މަނިކުފާނު ގެންދަވަނީ އެ ތުހުމަތުތައް ދޮގުކުރައްވަމުންނެވެ. ޔާމީން މީގެ ކުރިން ވިދާޅުވި ގޮތުގައި އެ މަނިކުފާނު ބޭނުންފުޅުވަނީ އިންސާފުވެރި ޝަރީއަތެއްގެ ތެރެއިން މައުސޫމްކަން ސާބިތުކޮށްދެއްވާށެވެ.