ނަން ވަނީ އެ މަނިކުފާނު ކަމަށާއި އެކަމަކު، އަސްލު ކޮރަޕްޝަންގެ އަމަލުތައް ހިންގި މީހުން ތިބީ މިދިޔަ ވެރިކަމާއި މި ވެރިކަމުގައި ކަމަށް ވިދާޅުވެ، ކުރީގެ ރައީސް އަބްދުﷲ ޔާމީން އަބްދުލްގައްޔޫމް ރޭ ސަރުކާރަށް ވަރަށް ބޮޑަށް ފާޑު ވިދާޅުވެއްޖެއެވެ.
ބައެއް މަޝްރޫއުތަކާ ގުޅިގެން އިދިކޮޅު ފަރާތްތަކުން އަންނަނީ މި ސަރުކާރަށް ކޮރަޕްޝަންގެ ތުހުމަތުތައް ކުރަމުންނެވެ. އެކަމަކު، ސަރުކާރުން އަންނަނީ ގަވާއިދުން އެ ތުހުމަތުތައް ދޮގުކުރައްވަމުންނެވެ.
ސިލްސިލާ ގޮތެއްގައި ޔާމީންގެ އާ ޕާޓީ، ޕީއެންއެފުން ބާއްވަމުން އަންނަ ޖަލްސާތަކުގެ ތެރެއިން ޖަލްސާއެއްގައި ވާހަކަދައްކަވަމުން އެ މަނިކުފާނު ރޭ ވިދާޅުވީ، ކޮރަޕްޝަންގެ ވާހަކަ ސިޔާސީ ބޭބޭފުޅުން ދައްކަވަނީ ހެޔޮ ނިޔަތެއްގައިތޯ ސުވާލު އުފައްދަން ޖެހޭ ކަމަށެވެ. އެއީ، ރައްޔިތުންނަށް އެކަން މުހިންމުވާ މިންވަރާ މެދު ސުވާލު އުފެދޭތީ ކަމަށް އެ މަނިކުފާނު ވިދާޅުވިއެވެ.
ޔާމީން ވިދާޅުވީ، އެ މަނިކުފާނަށް ކުރާ ދައުވާތަކާ ގުޅިގެން 'ކޮރަޕްޓް މީހާއަށް' ވަނީ އެ މަނިކުފާނު ކަމަށެވެ.
އެކަމަކު، މީގެ ކުރިން އެ މަނިކުފާނުގެ މައްޗަށް ސާބިތުވި ކޮރަޕްޝަންގެ ދެ ދައުވާއިން ވެސް މަތީ ކޯޓު މަރުހަލާއިން ސަލާމަތްވެވަޑައިގެންކަން ފާހަގަކުރައްވައި ޔާމީން ވަނީ އުފާކުރައްވައިފައެވެ. އެއީ، އެ މަނިކުފާނު މައުސޫމްވުމުން ކަމުގައި ސިފަކުރެއްވިއެވެ.
"އެކަމަކު، އަސްލުގައި މި ކަންކަން ކުރި މީހުން އެ ތިބީ. ވެރިކަން ފޭބީ ވެސް އޭގެ މީހުން، ވެރިކަމަށް އަރާ މި ތިބީ ވެސް އޭގެ މީހުން،" ޔާމީން ތުހުމަތުކުރެއްވިއެވެ.
ކުރީގެ ރައީސް ޔާމީން: އެ މަނިކުފާނު ވިދާޅުވީ ވައްކަމުގެ -- ސަން ފޮޓޯ/ މޫސާ ނަދީމް
އެ މަނިކުފާނު ވިދާޅުވީ، ކޮންމެ ބަޔަކު ވެސް ވެރިކަމަށް އަންނަން ކެމްޕޭންކުރާއިރު ވަރަށް ވަރުގަދައަށް ކޮރަޕްޝަންގެ ވާހަކަތައް ދައްކާ ކަމަށެވެ. އެކަމަކު، ކެމްޕޭން ނިންމައި، ވެރިކަމަށް އައުމަށް ފަހުގައި އެއްވެސް ސަރުކާރަކަށް އޭގެ ކުރީ ސަރުކާރުގައި ހިންގާފައި ހުރި ކޮރަޕްޝަންގެ މައްސަލަތައް ބަލައިލަން ނުކެރޭ ކަމަށް އެ މަނިކުފާނު ތުހުމަތުކުރެއްވިއެވެ.
ޔާމީން ވިދާޅުވީ، ކުރީގެ ރައީސް އިބްރާހިމް މުޙައްމަދު ޞާލިޙްގެ ސަރުކާރުގެ ކޮރަޕްޝަންގެ ވާހަކަ އެންމެ އަޑުހަރުކޮށް ދެއްކި މީހުން މިހާރު ތިބީ ވެރިކަމުގައި ކަމަށެވެ. އެހެންވީއިރު އެ މައްސަލަތައް ނުބެލެނީ ކީއްވެތޯ އެ މަނިކުފާނު ސުވާލު އުފެއްދެވިއެވެ.
"އަބަދު ވެސް ދައްކާނީ ކޮންމެ ވެސް މީހަކު މިވެނި ފައިސާއެއް ނެގިއޭ. ދެން އަޅުގަނޑު ހިތަށް އަރަނީ ކޮންމެ މީހަކަށް ވެސް މި އުނދަގޫވަނީ އޭނައަށް އެ ފައިސާ ނުލިބި އެހެން މީހަކު ނެގީމާ އުނދަގޫވަނީއޭ،" ސަމާސާ ރާގަކަށް ޔާމީން ވިދާޅުވިއެވެ.
ޔާމީންގެ މައްޗަށް ދަށު ކޯޓު މަރުހަލާއިން ކޮރަޕްޝަނާއި މަނީ ލޯންޑްރިންގެ ދެ ދައުވާއެއް ސާބިތުވިއެވެ. ފުރަތަމަ ފަހަރު އެ މަނިކުފާނު ޖަލުން މިނިވަންވެވަޑައިގަތީ ސުޕްރީމް ކޯޓު މަރުހަލާއިންނެވެ. އެންމެ ފަހުން އެ މަނިކުފާނުގެ މައްޗަށް ސާބިތުވި، ވ. އާރަށާ ގުޅޭ މައްސަލައިން އެ މަނިކުފާނު ސަލާމަތްވެވަޑައިގަތީ ހައިކޯޓު މަރުހަލާއިންނެވެ.
ހައިކޯޓުން ވަނީ އެ މައްސަލަ ބާތިލުކޮށް، އަލުން މައްސަލަ ބަލައި ހުކުމްކުރަން ދަށު ކޯޓަށް އަމުރުކޮށްފައެވެ.