ގެދޮރުވެރިޔާ ސްކީމުގެ ދަށުން އަލުން ފްލެޓްތަކަށް އެދި ފޯމު ހުށަހެޅުމުގެ ފުރުސަތު ހުޅުވާލި ކަމަށް ބުނެ ސްކޭމެއް ދައުރު ކުރާތީ އެކަަމަށް ސަމާލުވުމަށް ފުލުހުން އެދިއްޖެއެވެ.
ފުލުހުން ބުނީ، ގެދޮރުވެރިޔާ ސްކީމްގެ ދަށުން ފްލެޓްތަކަށް އެދި ހުށަހެޅުމަށް އަލުން ހުޅުވާލައިފި ކަމަށް ބުނެ، ސައްޙަ ނޫން މައުލޫމާތުތަކެއް އެކުލެވޭ މެސެޖެއް ލިންކާއެކު އަދިވެސް ދައުރު ކުރަމުންދާ ކަމަށެވެ.
އެހެންވެ، އެ ފަދަ ލިންކުތަކަށް ނުފިތުމަށް ފުލުހުން ވަނީ އިލްތިމާސްކޮށްފައެވެ.
ގެދޮރުވެރިޔާ ސްކީމުން ފްލެޓްތަކަށް ފޯމު ލުމުގެ ފުރުސަތު އެޗްޑީސީން އަލުން ހުޅުވާލައިފި ކަމަށް ބުނެ ސްކޭމެއް ހިންގާ ކަމަށް މިމަހުގެ 15ގައި ވެސް ފުލުހުން ބުނެފައިވެއެވެ.
އެކި ނަންނަމުގައި ސްކޭމްތައް ހިންގައި މީހުންގެ އަތުން ފައިސާ ފޭރުން ވަނީ ވަރަށް އިތުރުވެފައެވެ. އެކަން ހުއްޓުވުމަށް ފުލުހުން އަންނަނީ ގިނަ މަސައްކަތްތަކެއް ވެސް ކުރަމުންނެވެ. އޮޅުވާލައިގެން ސައްހަ ނޫން ބޭންކް ޓްރާންސްފާ ސްލިޕް ބޭނުންކޮށްގެން ވިޔަފާރިކުރާ މައްސަލަތައް ވެސް އިތުރުވެފައިވާ ކަމަށް ފުލުހުން މި ފަހުން ބުނެފައިވެއެވެ.
ފުލުހުންގެ ތަފާސްހިސާބުތަކުން ދައްކާ ގޮތުގައި މިދިޔަ އަހަރު އެކަނި ވެސް އޮޅުވާލައިގެން ފައިސާ ހޯދުމުގެ 1،661 މައްސަލައެއް ވަނީ ރިޕޯޓުކޮށްފައެވެ. އަދި އެ މައްސަލަތަކުގައި 20 މިލިއަން ރުފިޔާ ގެއްލިފައިވާ ކަމަށްވެސް މީގެ ކުރިން ފުލުހުން ބުނެފައިވެއެވެ.