ގެދޮރުވެރިޔާ ސްކީމުގެ ދަށުން އަލުން ފްލެޓްތަކަށް އެދި ފޯމު ހުށަހެޅުމުގެ ފުރުސަތު ހުޅުވާލި ކަމަށް ބުނެ ސްކޭމެއް ކުރިއަށް ގެންދާތީ އެކަަމަށް ސަމާލުވުމަށް ފުލުހުން އިލްތިމާސް ކޮށްފިއެވެ.
ފުލުހުން ބުނީ ސްކޭމް ހިންގަނީ ގެދޮރުވެރިޔާ ސްކީމުން ފްލެޓްތަކަށް ފޯމު ލުމުގެ ފުރުސަތު އެޗްޑީސީން އަލުން ހުޅުވާލައިފި ކަމަށް ބުނެ ކަމަށެވެ. އަދި ފްލެޓަށް އެދި ހުށަހަޅާނެ ފޯމް ވެބްސައިޓުން ލިބެން ހުންނާނެކަމަށް ބުނެ ލިންކު ހިމެނޭގޮތަށް ދައުރުކުރަމުންދާ މެސެޖަކީ ސައްހަ މެސެޖެއް ނޫން ކަަމަށް ފުލުހުން ވަނީ ބުނެފައެވެ.
ފުލުހުން ކޮށްފައިވާ ޕޯސްޓުން ފެންނަ ގޮތުގައި މި މެސެޖު ދައުރުކުރަމުންދަނީ އެޗްޑީސީގެ ނަމުގައެވެ.
މިކަމަށް ސަމާލުވާން ފުލުހުން ވަނީ އިލްތިމާސްކޮށްފައެވެ.
މި ސްކޭމް ހިންގަން ފަށާފައި މިވަނީ މިދިޔަ ސަރުކާރުން އިމާރާތް ކުރަން ފެށި ފްލެޓްތަކުގެ ލިސްޓް މި މަހު އިއުލާނު ކުރާނެކަން ހައުސިން މިނިސްޓްރީން ހާމަކޮށްފައި ވަނިކޮށެވެ.
އެކި ނަންނަމުގައި ސްކޭމްތައް ހިންގައި މީހުންގެ އަތުން ފައިސާ ފޭރުން ވަނީ ވަރަށް އިތުރުވެފައެވެ. އެކަން ހުއްޓުވުމަށް ފުލުހުން އަންނަނީ ގިނަ މަސައްކަތްތަކެއް ވެސް ކުރަމުންނެވެ.
އެގޮތުން މީގެ ފަސް ވަރަކަށް ދުވަސް ކުރިން ފުލުހުން ވަނީ ސައްޚަ ނޫން ބޭންކު ސްލިޕްތައް ބޭނުންކޮށްގެން ވިޔަފާރި ކުރަމުންދާތީ އެކަމަށް ހޭލުންތެރިކުރުމުގެ ގޮތުން "އޮޕަރޭޝަން ފޭކް ސްލިޕް" ގެ ނަމުގައިވެސް ހަރަކާތެއް ފަށާފައެވެ.
ފުލުހުންގެ ތަފާސްހިސާބުތަކުން ދައްކާ ގޮތުގައި މިދިޔަ އަހަރު އެކަނި ވެސް އޮޅުވާލައިގެން ފައިސާ ހޯދުމުގެ 1،661 މައްސަލައެއް ވަނީ ރިޕޯޓުކޮށްފައެވެ. އަދި އެ މައްސަލަތަކުގައި 20 މިލިއަން ރުފިޔާ ގެއްލިފައިވާ ކަމަށްވެސް މީގެ ކުރިން ފުލުހުން ވަނީ ބުނެފައިވެއެވެ.