ސަރުކާރުގެ ސިޔާސީ މަގާމުތަކުގައި ތިބި މީހުންގެ އަދަދާއި އެ މީހުންގެ މަސްއޫލިއްޔަތު ހާމަކުރުމަށް ގޮވާލައި، ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލަ ބޭރުކޮށްލައިފިއެވެ.
މަޖިލިސް ޖަލްސާގައި މި މައްސަލަ ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމެވެ.
އެއީ, ސަރުކާރުގެ ސިޔާސީ މަގާމުތަކަށް ރައީސުލްޖުމްހޫރިއްޔާ އައްޔަނު ކުރައްވާފައިވާ ފަރާތްތަކުގެ މައުލޫމާތު ހާމަ ކުރުމަށް ގޮވާލައި ހުށަހަޅާފައިވާ މައްސަލައެކެވެ.
އެ މައްސަލައިގައިވަނީ ދައުލަތުގެ ޚަރަދުތައް ކުޑަކުރުމުގެ ގޮތުން، ސަރުކާރުގެ އިދާރާތަކާއި ސަރުކާރު ހިއްސާވާ ކުންފުނިތަކުގެ މުސާރަކުޑަކުރަން ސަރުކާރުން ނިންމާފައިވާއިރު، މިއަދާ ހަމަޔަށް ވެސް ސަރުކާރުގެ އެކިއެކި މުއައްސަސާތަކުގައި ތިބި ސިޔާސީ މުވައްޒަފުންގެ އަދަދު ހާމަކޮށްފައިނުވާ ކަމަށެވެ.
އެ ގޮތުން, އެ ފަރާތްތަކުގެ މުސާރަތައް ކުޑަކުރުމަށް ހުށަހަޅާފައިވާ މި ދަނޑިވަޅުގައި ސިޔާސީ މަގާމުތަކުގައި ތިބި މީހުންގެ އަދަދާއި، އެ ފަރާތްތަކުގެ މަގާމުގެ މަސްއޫލިއްޔަތު ހާމަކޮށްދިނުމަށް ގޮވާލައި، އެ ކުއްލި މައްސަލަ މީކާއީލް ހުށަހެޅުއްވިއެވެ.
މިއަދު މަޖިލީހަށް 68 މެންބަރުން ހާޒިރުވެވަޑައިގެން ތިއްބެވިއިރު، އެ މައްސަަލަ ބަލައިގަންނަން ފެންނަ ކަމަށް ވޯޓު ދެއްވީ އަށް މެންބަރުންނެވެ. އަދި, އެ މައްސަލަ ބަލައިގަންނަން ނުފެންނަ ކަމަށް ލިބުނު 59 ވޯޓާ އެކު، އެ މައްސަލަ ވަނީ މަޖިލީހުގެ ތަޅުމުން ބޭރުކޮށްލައިފައެވެ.
ސަރުކާރުގެ ސިޔާސީ މަގާމުތަކުގެ އަދަދު ހާމަނުކުރާތީ، އިދިކޮޅު އެމްޑީޕީން އަންނަނީ އެ ކަމާ ގުޅިގެން ކަންބޮޑުވުން ފާޅުކޮށް، ބޮޑެތި ތުހުމަތުތަކެއް ވެސް ކުރަމުންނެވެ.
ސަރުކާރުގައި ތިބި ސިޔާސީ މުވައްޒަފުންގެ އަދަދު 2،000 އަށްވުރެ އިތުރުވާނެ ކަމަށް އިދިކޮޅު ފަރާތްތަކުން ތުހުމަތުކުރެއެވެ. ސަރުކާރުން އެ ތުހުމަތު ދޮގުކުރި ނަމަވެސް ސިޔާސީ މުވައްޒަފުންގެ އަދަދެއް ހާމަކޮށްފައިނުވެއެވެ.
ނަމަވެސް، މި ފަހުން މާލީ އިސްލާހުތަކެއް ގެންނަވައި، ރައީސް ޑރ. މުހައްމަދު މުއިއްޒު ވަނީ ސަރުކާރުގެ ޚަރަދު ކުޑަކުރަން 228 ސިޔާސީ މުވައްޒަފުން މަގާމުން ވަކިކުރަން ނިންމަވައިފައެވެ. އަދި، ސިޔާސީ މުވައްޒަފުންގެ މުސާރައިން 10 އިންސައްތަ ކުޑަކޮށް، އެ މަނިކުފާނުގެ މުސާރައިގެ 50 އިންސައްތަ ނުނަންގަވަން ވަނީ ނިންމަވައިފައެވެ.