އދ.ގެ އިންޓަނޭޝަނަލް އެޓޮމިކް އެނާޖީ އޭޖެންސީ (އައިއޭއީއޭ)ގައި ބަައިވެރިވާން ރައްޔިތުންގެ މަޖިލީހުން މިއަދު ރުހުން ދީފިއެވެ.
މަޖިލީހުން އެޓޮމިކް އެނާޖީ އޭޖެންސީގައި ބައިވެރިވާން ފާސްކޮށްފައި ވަނީ ވޯޓުގައި ބައިވެރިވި 61 މެންބަރުންގެ އިއްތިފާގުންނެވެ.
ސަރުކާރުން އައިއޭއީއޭގައި ބައިވެރިވުމަށް ނިންމާފައި ވަނީ މިދިޔަ މަހު އެކެއްގައި ބޭއްވި ވަޒީރުންގެ މަޖިލީހުގައެވެ.
އެ ކެބިނެޓުގެ ބައްދަލުވުމުގައި އޭރުގެ ފޮރިން މިނިސްޓަރު އަދި މިހާރުގެ ފިނޭންސް މިނިސްޓަރު މޫސާ ޒަމީރު ވިދާޅުވީ، އައިއޭއީއޭގައި ބައިވެރި ވަނީ ރާއްޖޭގައި އަޅާ ކެންސަރު ހޮސްޕިޓަލުގެ މަސައްކަތުގައި އެހީ ހޯދުމަށް ކަމަށެވެ.
އެގޮތުން، އެ ހޮސްޕިޓަލް ނިމެންވާއިރަށް އެ އޭޖެންސީގައި ބައިވެރިވެ، އައިއޭއީއޭއިން ލިބެންވާ ފައިދާތައް ލިބޭނެ ކަމުގެ އުއްމީދު އޮތް ކަމަށް ޒަމީރު ވިދާޅުވިއެވެ.
އަދި، އެކަމާ ގުޅޭ ކެބިނެޓްގެ ނިންމުން ދެން ރައްޔިތުންގެ މަޖިލީހަށް ހުށަހަޅާނެ ކަމަށާއި އެކަމަށް މަޖިލީހުން ރުހުން ދިނުމުން އެ އޭޖެންސީއާ ގުޅުމުގެ މަސައްކަތްތައް ކުރިއަށްގެންދާނެ ކަމަށް އޭރު ވިދާޅުވެފައިވެއެވެ.
މިނިސްޓަރު އޭރު ވިދާޅުވެފައި ވަނީ 178 ގައުމު ބައިވެރިވާ އެ އޭޖެންސީގައި މިހާރު މި ސަރަހައްދުން ބައިވެރިނުވެ އޮތީ ރާއްޖެއާއި ބޫޓާން އެކަނި ކަމަށެވެ.