މަންމައަށް ވަޅިން ބިރުދައްކާ އަނިޔާކުރިކަމުގެ ތުހުމަތުގައި އިއްޔެ ހައްޔަރުކުރި މީހާގެ ބަންދަށް ހުޅުމާލޭ މެޖިސްޓްރޭޓް ކޯޓުން މިއަދު 10 ދުވަސް ޖަހައިފިއެވެ.
މަންމައަށް ވަޅިން ހަމަލާދީ މަރާލާނެކަމުގެ އިންޒާރުދީ، އަނިޔާކުރުމަށް ފަހު، ފޭރުނުކަމުގެ ތުހުމަތުގައި ފުލުހުން ހައްޔަރުކޮށްފައިވަނީ ހ. އެހަޑަ އުމުރުން 28 އަހަރުގެ މުޙައްމަދު އިސްމާއީލެވެ. އޭނާ ހައްޔަރުކުރީ އިއްޔެއެވެ.
ފުލުހުން ބުނީ، އެ މީހާގެ ބަންދާ މެދު ގޮތެއް ނިންމަން ހުޅުމާލޭ މެޖިސްޓްރޭޓް ކޯޓަށް ހާޒިރުކުރުމުން އޭނާގެ ބަންދަށް 10 ދުވަސް ދީފައިވާ ކަމަށެވެ.
ފުލުހުން ބުނީ ހުޅުމާލޭ ދެވަނަ ފިޔަވަހީގައި ހުންނަ ހިޔާ ފުލެޓުގެ އެޗް13ގެ އެޕާޓްމަންޓަކުން އަންހެނަކު ރޯ އަޑު އިވޭ ކަމަށް އިއްޔެ އިރުއޮއްސި 18:17 އެހާކަންހާއިރު ފުލުހުންނަށް ރިޕޯޓުކުރި ކަމަށެވެ.
އަދި، އެ އެޕާޓްމަންޓަށް ފުލުހުން ދިއުމުން، ދޮރު ހުޅުވީ 57 އަހަރުގެ އަންހެނެއް ކަމަށާއި އެ މީހާގެ ދަރިފުޅު މުހައްމަދު އިސްމާއިލް އެ މީހާއަށް އަނިޔާކުރުމަށް ފަހު، ވަޅިން ހަމަލާދީ މަރާލާނެ ކަމަށް ބުނެ، އިންޒާރުދީފައިވާ ކަމަށް އެ މީހާއާ ހަވާލާދީ ފުލުހުން އިއްޔެ ވަނީ ބުނެފައެވެ.
މުހައްމަދު އިސްމާއިލް އޭނާގެ މަންމަގެ ފޯނު ވެސް ފޭރިގެންފައިވާ ކަމަށް ފުލުހުން ވަނީ ތުހުމަތުކޮށްފައެވެ.
އެ އަންހެން މީހާއަށް ލިބުނު އަނިޔާތަކަށް ހޮސްޕިޓަލުގައި ފަރުވާ ދިނުމަށް ފަހު، ހޮސްޕިޓަލުން ދޫކޮށްލާފައިވާއިރު ފުލުހުން ގެންދަނީ މި މައްސަލަ ތަހުގީގުކުރަމުންނެވެ.