މިފަހުން މާލޭގައި ކަފިހި ހުރަސް މަތީ ހިނގި ދެ އެކްސިޓެންޓު ތަހުގީގު ކުރުމަށް ފަހު ފިޔަވަޅު އެޅުމަށް މިހާރު ޓްރާންސްޕޯޓް މިނިސްޓްރީއަށް ފޮނުވައިފައި ވާނެކަމަށް ފުލުހުން ބުނެފިއެވެ.
ކަފިހި ހުރަސްމަތިން މަގު ހުރަސްކުރި ކުޑަކުއްޖެއްޖެ ގައިގައި ސައިކަލުން ޖެހުނީ މިމަހުގެ 10ވަނަ ދުވަހުއެވެ. އެއަށް ފަހު، އެފަދަ ދެވަނަ އެކްސިޑެންޓެއް ހިނގީ މިދިޔަ ހޮނިހިރު ދުވަހުއެވެ. އެ ހާދިސާގައި ކާރަކުން ޖެހި އަނިޔާވީ އަންހެނަކަށެވެ.
މި ދެ އެކްސިޑެންޓުގަިއ އަނިޔާވި މީހުންނަށް ވެސް ހޮސްޕިޓަލުގައި ފަރުވާ ދިނެވެ.
މިކަމާ ގުޅުވައި 'ސަން' އިން ސުވާލުކުރުމުން ފުލުހުން ބުނީ، އެ ދެ މައްސަލައިގައި ވެސް ޓްރެފިކް ގަވާއިދާ ޚިލާފުވެފައި ވާތީ ފިޔަވަޅު އެޅުމަށް ޓްރާންސްޕޯޓް މިނިސްޓްރީއަށް މިހާރު ފޮނުވާފައިވާ ކަމަށެވެ.
މިކަމާ ގުޅިގެން ޓްރާންސްޕޯޓް މިނިސްޓަރީގެ ބަހެއް ހޯދަން ކުރި މަސައްކަތް ކާމިޔާބުވާގޮތެއް ނުވިއެވެ.
އޭގެއިތުރުން، މިފަހުން މާލެއިން ހުޅުމާލެއަށް ދުއްވާ ހައިވޭގައި ކުޑަކުއްޖަކަށް ސައިކަލު ހުންގާނުގެ ކޮންޓްރޯލު ދީގެން ދުއްވި މައްސަލައެއް ވެސް ފެންމަތިވިއެވެ.
އެމައްސަލައިގަ ފިޔަވަޅު އަޅަން ޓްރާންސްޕޯޓް މިނިސްޓްރީއަށް ފޮނުވާފައިވާއިރު، ފިޔަވަޅު އަޅަން ފޮނުވީ ޓްރެފިކް ގާނޫނާ ޚިލާފުވެފައި ވާތީ ކަމަށް ފުލުހުން ބުނެފައިވެއެވެ.
މަގުމަތީގެ އެކްސިޑެންޓުތައް މަދުކުރަން ފުލުހުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން، ފުލުހުން ވަނީ މަގުތައް މަތީ ހަރަކާތްތެރިވާން ފަށާފައެވެ.