ޓިކްޓޮކްގައި ބޮޑު މަގުބޫލުކަމެއް ހޯދާފައިވާ މަރިޔަމް ސަމާއަށް ޓިކްޓޮކް ލައިވެއްގެ ތެރެއިން މަރުގެ އިންޒާރު ދިން މައްސަލައިގައި އަދި މީހަކު ހައްޔަރު ކޮށްފައިނުވާ ކަމަށް ފުލުހުން މިއަދު ބުނެފިއެވެ.
މިދިޔަ ބުރާސްފަތި ދުވަހު ފުލުހުން ބުނީ، ޓިކްޓޮކްގައި އަންހެނަކަށް މަރުގެ އިންޒާރު ދިން މައްސަލައެއް ފުލުހުންގެ ސަމާލުކަމަށް އައިސްފައިވާ ކަމަށެވެ
މި މައްސަލައާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށް އޭރު ފުލުހުން ބުންޏެވެ.
މި މައްސަލައާ ގުޅިގެން މިއަދު ފުލުހުން 'ސަން'އަށް ބުނީ، އެ މައްސަލައިގައި މިހާތަނަށް މީހަކު ހައްޔަރުކޮށްފައި ނުވާ ކަމަށާއި މިހާރު އެ މައްސަލަ އޮތީ ތަހުގީގީ މަރުހާލަގައި ކަމަށެވެ.
މި މައްސަލައަކީ ކޮން މައްސަލައެއް ކަން ފުލުހުން ބުނެފައި ނުވި ނަމަވެސް، ސަމާ ވަނީ ޓިކްޓޮކް ލައިވެއްގައި އޭނާއަށް މަރުގެ އިންޒާރު ދޭ ވީޑިއޯއެއް ސޯޝަލްމީޑިއާގައި ހިއްސާކޮށްފައެވެ. އެ ވީޑިއޯއިން އެނގޭ ގޮތުގައި ސަމާއަށް މަރުގެ އިންޒާރު ދިނީ ދިވެހި އަންހެނެކެވެ.
އެއީ، ޓިކްޓޮކް ލައިވެއްގެ ތެރެއިން ހިނގާ ދިޔަ ޒުވާބެއްގެ ތެރޭގައި ހިނގި ކަމެއް ކަމަށްވެއެވެ.
ޓިކްޓޮކްގެ މަގުބޫލުކަން އިތުރުވެ، ގިނަ ބަޔަކު އަންނަނީ ޓިކްޓޮކް ލައިވްތައް ހުށަހަޅަމުންނެވެ. ބައެއް ފަހަރު އެ ފަދަ ލައިވްތަކުގައި ޒުވާބުތައް ހިނގާ، ބޭއަދަބީ ބަސްތައް ވެސް ބޭނުންކުރެއެވެ.
ޓިކްޓޮކްގައި މީހުންނަށް އެހީ ހޯދައިދީގެން ވެސް ސަމާއަށް ބޮޑު ސަމާލުކަމެއް ލިބުނެވެ.