ސިނގިރޭޓާއި ދުންފަތުން ނަގައި ޓެކްސް ބޮޑުކުރާއިރު ހަކުރު އެކުލެވޭ ބުއިންތަކުން ނަގާ ޓެކްސް ވެސް ބޮޑުކުރަންޖެހޭ ކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް މިއަދު ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި އޮތީ ސިނގިރޭޓާއި ދުންފަތުން ނަގައި ޓެކްސް ބޮޑުކުރުމާއި އީ-ސިނގިރޭޓު އަދި ވޭޕުން ނަގައި ޓެކްސް ވެސް މަނާކުރާ މުއްދަތާ ހަމައަށް ބޮޑުކުރަން ސަރުކާރުގެ ފަރާތުން ހުށަހެޅި ބިލުގެ ބަހުސެވެ.
އެ ބިލަށް ވާހަކަދައްކަވަމުން ނާޒިމް ވިދާޅުވީ، ހަކުރުން ޓެކްސް ނެގުމަކީ ބޭރުގެ ގައުމުތަކުގައި ކުރާ ކަމެއް ކަމަށެވެ. ރާއްޖޭގައި ވެސް މިހާރު އެކަން ކުރާ ގޮތަށް ވުރެ ހަރުދަނާ ގޮތެއްގައި ހަކުރުންނާއި ހަކުރު އެކުލެވޭ ބުއިންތަކުން ނަގައި ޓެކްސްގެ ކަންކަން ކުރިއަށް ގެންދަންޖެހޭ ކަމަށް އޭނާ ވިދާޅުވިއެވެ.
"މިދިޔަ ހަފުތާގައި މެލޭޝިއާގައި ތައާރަފުކުރި ބަޖެޓުގައި ވެސް ހަކުރުން ނެގޭ ޓެކްސް ވަނީ ބޮޑުކޮށްފައި. ހަކުރު އަޅައިގެން އުފައްދާ ޑްރިންކްސްތަކުގެ. އަދި، މިހާރު އިނގިރޭސިވިލާތުގައި ވެސް ޝުގަރީ ޑްރިންކްސްއިން ޓެކްސް ނަގައި،" ނާޒިމް ވިދާޅުވިއެވެ.
"އަޅުގަނޑުމެންގެ ރައްޔިތުންގެ ދުޅަހެޔޮކަން ޔަގީންކުރުމަށްޓަކައި ހަމައެކަނި ދުންފަތުގެ ބާވަތްތަކަށް ފޯކަސްކުރުމުގެ ބަދަލުގައި ހަކުރު ބާވަތްތަކުން ޓެކްސް ނެގުން މިހާރަށްވުރެ ފުރިހަމަ ގޮތެއްގައި ކުރަންޖެހޭ،"
މަޖިލީހުގެ ނައިބު ރައީސް އަހުމަދު ނާޒިމް: އޭނާ ވިދާޅުވީ އެނާޖީ ޑްރިންކްސްތަކުން ނަގައި ޓެކްސް ވެސް ބޮޑުކުރަންޖެހޭ ކަމަށް -- ފޮޓޯ/ މަޖިލީސް
އެހެންވެ، އޭނާ ވަނީ ދުންފަތުން ނަގައި ޓެކްސް ބޮޑުކުރާއިރު ހަކުރު އެކުލެވޭ ބުއިންތަކުން ނަގައި ޓެކްސް ވެސް ބޮޑުކުރަން ޖެހޭ ކަމަށް ވިދާޅުވެފައެވެ.
މީގެ އިތުރުން، އޭނާ ވިދާޅުވީ ސިނގިރޭޓުން ނަގައި ޓެކްސް ބޮޑުކުރާއިރު ސަރުކާރުން ހަރުދަނާ ގޮތެއްގައި ކުރަންޖެހޭ އިތުރު ކަންތައްތަކެއް ވެސް އެބަހުރި ކަމަށެވެ.
އެ ގޮތުން، ސިނގިރޭޓުން ނަގައި ޑިއުޓީ ބޮޑުކުރުމާ އެކު، އަގުހެޔޮ ބާވަތްތަކުގެ ސިނގިރޭޓު އެތެރެކުރުމުގެ ބިރު އޮތް ކަމަށް އޭނާ ވިދާޅުވިއެވެ. އެއީ، މިހާރު ރާއްޖޭގެ ބާޒާރުގައި ވިއްކާ ސިނގިރޭޓުގެ ބާވަވްތަކަށް ވުރެ މާ ގެއްލުން ބޮޑު ބާވަތްތަކެއްކަން އޭނާ ފާހަގަކުރެއްވިއެވެ.
"ގަވާއިދުތައް ރަނގަޅަށް ތަންފީޒުކުރެވި، ބްލެކް މާކެޓުގައި އެއްޗެހި ނުގަނެވޭނެ ގޮތްތަކެއް ރާވައި، ސްމަގްލް ނުކުރެވޭނެ ގޮތްތަކެއް ވެސް އަޅުގަނޑުމެން އެބަޖެހޭ ރާވަން،" ބްލެކް މާކެޓުގައި ސިނގިރޭޓު ވިއްކުމުގެ ބިރު އޮތްކަން ފާހަގަކުރައްވައި އޭނާ ވިދާޅުވިއެވެ.
ނާޒިމް ވިދާޅުވީ، ދޮށީ އުމުރުގެ މީހުން އާސަންދަ ނިޒާމު ވެސް ބޭނުންކުރަނީ 'ސޭފްޓީ ނެޓެއް'ގެ ގޮތުގައި ކަމަށެވެ.
މީހުން ސިނގިރޭޓާއި ދުންފަތް ބޭނުންކޮށްފައި އަދި އާދަތައް ވެސް ބޭނުންހާ ގޮތަކަށް ބެހެއްޓީމާ ވެސް މުސްކުޅި އުމުރަށް ދިޔައީމާ އާސަންދައިން ބޭސްކުރަން ޖެހޭތޯ އޭނާ ސުވާލު އުފެއްދެވިއެވެ.
"އާދަތައް ބޭނުންހާ ގޮތަކަށް ބަހައްޓާފައި، އުމުރުގެ ބޮޑުބައި ސިނގިރޭޓު ބޮއެފައި، ދުންފަތް ބޭނުންކޮށްފައި، އަދި އެނާޖީ ޑްރިންކްސް ފަދަ ހަކުރު އެޅި ޑްރިންކްސް ބޭނުންކޮށްފައި އެއްގޮތަކަށް ވެސް ސިއްހަތަށް ބަލައިލުމެއް ނެތި އުޅެފައި މުސްކުޅިވާ ދުވަހު އާސަންދައަށް ބަރޯސާވެގެން ދައުލަތުން ބޭސްކޮށްދޭންޖެހޭ،" އޭނާ ކަންބޮޑުވުން ފާޅުކުރެއްވިއެވެ.
ސަރުކާރުން ވަނީ ސިނގިރޭޓާއި ބިޑިން ނަގައި އިމްޕޯޓް ޑިއުޓީގެ ސްޕެސިފިކް ރޭޓް ތިން ރުފިޔާއިން އަށް ރުފިޔާއަށް މަތިކުރުން ހުށަހަޅާފައެވެ. އަދި، ސިނގިރެޓާއި ބިޑިން ނެގޭ އެޑްވަލޮރަމް ރޭޓް 50 އިންސައްތަ މަތިކުރުން ވެސް ވަނީ ހުށަހަޅާފައެވެ.
ރައީސް ވަނީ އެ ބާވަތްތައް ގަނެވޭނެ އެންމެ ހަގު އުމުރު ވެސް 18 އަހަރުން 21 އަހަރަށް މަތިކުރަން ހުށަހަޅުއްވާނެ ކަމަށް ވިދާޅުވެފައެވެ.
ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން އަންނަ މަހުގެ 15 ވަނަ ދުވަހުން ފެށިގެން މަނާކުރަން ހުށަހަޅާފައިވާއިރު އާއްމު ތަންތަނުގައި ދުންފަތުގެ އިސްތިޢުމާލުކުރުން ހުއްޓުވުމަށް ތަންފީޒީ އިދާރާތަކުގެ ދައުރު ވަރުގަދަކުރުމަށް ޚާއްސަ ފިޔަވަޅުތަކެއް އަޅަން ވެސް ވަނީ ނިންމައިފައެވެ.